ຂອງ ກຊສ ຂຶ້ນໃນວັນທີ 14 ພຶດສະພາ ນີ້ ທີ່ຫ້ອງປະຊຸມຂອງກະຊວງ, ພາຍໃຕ້ການເປັນປະທານຂອງສະຫາຍນາງ ບຸນຄໍາ ວໍລະຈິດ ກໍາມະການສູນກາງພັກ ເລຂາຄະນະພັກ ລັດຖະມົນຕີ ກຊສ; ມີຄະນະປະຈຳພັກ, ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກພ້ອມດ້ວຍສະມາຊິກພັກ ແລະ ພະນັກງານ-ລັດຖະກອນ ພາຍໃນ ກຊສ ເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ແນໃສ່ການຜັນຂະຫຍາຍວຽກງານກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ ແລະ ວຽກງານກວດກາທົ່ວປະເທດປະຈຳປີ 2024 ພ້ອມກັບການສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ ແລະ ວຽກງານກວດກາໄລຍະ 1 ປີຜ່ານມາ (2024) ແລະ ທິດທາງແຜນການ 1 ປີ (2025) ຂອງ ກຊສ ໃຫ້ແກ່ຄະນະພັກ, ສະມາຊິກພັກ, ພະນັກງານ-ລັດຖະກອນ ພາຍໃນກະຊວງເພື່ອສ້າງຄວາມຮັບຮູ້, ເຂົ້າໃຈຢ່າງເລິກເຊິ່ງທັງສ້າງຄວາມເອກະພາບທາງດ້ານທັດສະນະຕໍ່ເນື້ອໃນວຽກງານກໍ່ສ້າງພັກ-ພະນັກງານ, ການປັບປຸງກົງຈັກການຈັ້ດຕັ້ງ ແລະ ວຽກງານກວດກາ ທົ່ວປະເທດ ທັງພ້ອມກັນເປັນເຈົ້າການນໍາພາຈັດຕັ້ງຜັນຂະຫຍາຍເປັນທິດທາງແຜນການໃນຕໍ່ໜ້າໂດຍເລັ່ງໃສ່ເສີມຂະຫຍາຍດ້ານຕັ້ງໜ້າ, ແກ້ໄຂດ້ານອ່ອນ-ຂໍ້ຄົງຄ້າງ ແລະ ສິ່ງຫຍໍ້ທໍ້ຕ່າງໆ ແນໃສ່ເຮັດໃຫ້ບັນດາວຽກງານດັ່ງກ່າວ ບັນລຸຄາດໝາຍທີ່ວາງໄວ້.
ໃນພາກເຊົ້າ, ກອງປະຊຸມ ໄດ້ມີການສະເໜີ ແລະ ເຜີຍແຜ່ ການສັງລວມເນື້ອໃນວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດປະຈໍາປີ 2024 ແລະ ທິດທາງປີ 2025, ຂຶ້ນສະເໜີໂດຍ ສະຫາຍ ພູວົງ ຫຼວງໄຊຊະນະ ກໍາມະການປະຈໍາພັກກະຊວງ ຮອງລັດຖະມົນຕີ ກຊສ; ມີການສະເໜີບົດສະຫຼຸບຫຍໍ້ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງປະຈຳປີ 2024 ແລະ ທິດທາງແຜນການປີ 2025 ຂອງ ກຊສ, ຂຶ້ນສະເໜີໂດຍ ສະຫາຍ ນາງ ທອງຈັນ ອະຄະມາເຂດ ກໍາມະການປະຈຳພັກ ກະຊວງ ຫົວໜ້າກົມຈັດຕັ້ງ ແລະ ພະນັກງານ. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມໄດ້ມີການປະກອບຄຳເຫັນຕາມຄຳຖາມເຈາະຈີ້ມຢ່າງກົງໄປກົງມາໃນວຽກງານກໍ່ສ້າງພັກ-ພະນັກງານ, ວຽກງານປັບປຸງກົງຈັກການຈັດຕັ້ງໂດຍປະທານກອງປະຊຸມແມ່ນໄດ້ເນັ້ນໜັກເຖິງຜົນການຈັດຕັ້ງປະຕິບັດຕົວຈິງໃນແຕ່ລະວຽກງານເຊັ່ນ: ວຽກງານການເມືອງ-ແນວຄິດ; ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ວຽກງານປັບປຸງກົງຈັກການຈັດຕັ້ງໄປຕາມມະຕິ 03 ຂອງຄະນະບໍລິຫານງານສູນກາງພັກ; ການຄຸ້ມຄອງພະນັກງານໃນສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ; ວຽກງານຂໍ້ແຂ່ງຂັນຮັກຊາດ ແລະ ພັດທະນາຕິດພັນກັບການຈັດຕັ້ງປະຕິບັດວຽກງານວິຊາສະເພາະໜ້າທີ່ການເມືອງຂອງຕົນ. ພ້ອມນີ້, ໄດ້ມີການມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ຈໍານວນ 25 ໜ່ວຍພັກໃນຈໍານວນທັງໝົດ 30 ໜ່ວຍພັກ ແລະ ໄດ້ມີການປະດັບຫຼຽນກາລະນຶກ 70 ປີ ວັນສ້າງຕັ້ງຄະນະຈັດຕັ້ງສູນກາງພັກ ໃຫ້ພະນັກງານ-ລັດຖະກອນ ກົມຈັດຕັ້ງ ແລະ ພະນັກງານ ກຊສ ຈໍານວນ 17 ສະຫາຍ (ຍິງ 7 ສະຫາຍ) ຢ່າງສົມກຽດ.
ໃນພາກບ່າຍ, ໄດ້ຈັດໃຫ້ມີກອງປະຊຸມຜັນຂະຫຍາຍເນື້ອໃນວຽກງານກວດກາທົ່ວປະເທດ ປະຈໍາປີ 2024 ພ້ອມກັບການສະຫຼຸບວຽກງານກວດກາ ຂອງ ກຊສ ຊຶ່ງເນື້ອໃນເອກະສານນໍາສະເໜີ ແລະ ເຜີຍແຜ່ບົດສະຫຼຸບຫຍໍ້ຕີລາຄາການເຄື່ອນໄຫວວຽກງານກວດກາທົ່ວປະເທດ ປະຈໍາປີ 2024 ແລະ ທິດທາງແຜນການ ປະຈໍາປີ 2025, ຂຶ້ນສະ ເໜີໂດຍ ສະຫາຍ ສົມແພງ ໄຊຍະແສງ ຄະນະພັກກະຊວງ ຮອງປະທານກວດກາພັກກະຊວງ ຫົວໜ້າກົມກວດກາ;ບົດສະຫຼຸບຫຍໍ້ການຈັດຕັ້ງ ແລະ ເຄື່ອນໄຫວວຽກງານກວດກາ ປະຈໍາປີ 2024 ແລະ ທິດທາງແຜນການປີ 2025ຂອງ ກຊສ, ຂຶ້ນສະເໜີໂດຍ ສະຫາຍ ນາງ ອຸທອນ ເພັດຫຼວງສີ ຄະນະພັກກະຊວງ ຮອງປະທານກວດກາພັກ ກະຊວງ; ລະບຽບຂອງອົງການກວດກາແຫ່ງລັດ ວ່າດ້ວຍການເກັບຮັກສາເອກະສານ ກ່ຽວກັບການກວດກາ ສະບັບເລກທີ 138/ອກຫລ, ລົງວັນທີ 9 ເມສາ 2024, ຂຶ້ນສະເໜີໂດຍ ສະຫາຍ ວິລະສັກ ຈຸນດາລາ ຄະນະພັກກະຊວງ ຮອງປະທານກວດກາພັກ ກະຊວງ; ຮັບຟັງ ຄຳເຫັນຊີ້ນໍາຂອງ ສະຫາຍ ໄຊຄຳ ອຸ່ນມີໄຊ ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຕໍ່ກອງປະຊຸມຄັ້ງນີ້.
ໃນກອງປະຊຸມບັນດາຄະນະພັກ ກະຊວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ໂດຍສະເພາະຜູ້ເຮັດວຽກງານກວດກາ ໄດ້ມີຮັບຮູ້ເຂົ້າໃຈ ແລະ ກໍາແໜ້ນບັນດາເນື້ອໃນຈິດໃຈຕົ້ນຕໍທີ່ຕ້ອງປະຕິບັດ, ສູ້ຊົນສ້າງການຫັນປ່ຽນແບບບຸກທະລຸຢ່າງເປັນຮູບປະທຳ, ໂດຍສະເພາະໃນການສືບຕໍ່ນໍາພາຈັດຕັ້ງປະຕິບັດບັນດາຄາດໝາຍຂອງກອງປະຊຸມໃຫຍ່ຄັ້ງທີ XI ຂອງພັກ ແລະ ກອງປະຊຸມໃຫຍ່ວຽກງານກວດກາທົ່ວປະເທດ ຄັ້ງທີ IV ພ້ອມດຽວກັນກໍໄດ້ມີການປະກອບຄຳເຫັນ ຢ່າງກົງໄປກົງມາ ໂດຍສະເພາະບັນຫາທີ່ຍັງຄົງຄ້າງຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ;
ໃນວາລະທ້າຍກອງປະຊຸມຄັ້ງນີ້, ສະຫາຍປະທານກອງປະຊຸມກໍໄດ້ກ່າວມີທິດຊີ້ນຳຕໍ່ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກໃຫ້ສືບຕໍ່ນໍາເອົາຜົນເນື້ອໃນຈິດໃຈຂອງກອງປະຊຸມໃນຄັ້ງນີ້ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃນຄວາມຮັບຜິດຊອບຂອງຮາກຖານພັກຕົນ ເພື່ອເຮັດໃຫ້ບັນດາສະມາຊິກພັກເຂົ້າໃຈແລະ ມີການຫັນປ່ຽນຢ່າງແຂງແຮງ, ເລິກເຊິ່ງຂຶ້ນກວ່າເກົ່າ.
(ຂ່າວ-ພາບ: ສຳນານ + ແສງຈັນ)
ຄໍາເຫັນ