ກຊສ ສະຫຼຸບການຈັດຕັ້ງປະຕິບັດວຽກງານຮອບດ້ານ ແລະ ປະກາດການແຕ່ງຕັ້ງ

ໃນທີ່ປະຊຸມໄດ້ຮັບຟັງບົດລາຍງານການຜ່ານການຈັດຕັ້ງປະຕິບັດວຽກງານຮອບດ້ານ ຂອງ ກຊສ ໄລຍະປີ 2021-2025 ຈາກທ່ານ ຈັນທະເນດ ບົວລະພາ ກໍາມະການຄະນະປະຈໍາພັກ ຮອງລັດຖະມົນຕີ ກຊສ. ຫຼັງຈາກນັ້ນ, ທ່ານ ນາງ ທອງຈັນ ອະຄະມາເຂດ ກຳມະການຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ໄດ້ຜ່ານຄຳສັ່ງ ຂອງຄະນະເລຂາທິການສູນກາງພັກ ແລະ ດຳລັດວ່າດ້ວຍການແຕ່ງຕັ້ງຮອງລັດຖະມົນຕີ ກຊສ ໂດຍຕົກລົງແຕ່ງຕັ້ງ ທ່ານ ໄຊນະຄອນ ອິນທະວົງ ເປັນຮອງລັດຖະມົນຕີ ກຊສ, ພ້ອມທັງຜ່ານແຈ້ງການ ຂອງຄະນະປັບປຸງກົງຈັກການຈັດຕັ້ງກ່ຽວກັບກົງຈັກ ແລະ ບຸກຄະລາກອນ ແລະ ການອອກການຮັບອູດໜູນບຳນານຂອງພະນັກງານຈຳນວນ 6 ທ່ານ.

ຕອນທ້າຍຂອງກອງປະຊຸມ, ທ່ານລັດຖະມົນຕີ ໄດ້ມີຄຳເຫັນໂອ້ລົມ ຊຶ່ງກ່ອນອື່ນໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ, ລັດຖະກອນທັງໝົດພາຍໃນກະຊວງ ໂດຍສະເພາະບັນດາທ່ານນອນໃນເປົ້າໝາຍອອກພັກການຮັບອູດໜູນບຳນານ ທີ່ໄດ້ອຸທິດເຫື່ອແຮງ, ສະຕິປັນຍາ ແລະ ຄວາມຮູ້, ຄວາມສາມາດຂອງຕົນ ເຂົ້າໃນການພັດທະນາວຽກງານຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ. ພ້ອມກັນນີ້, ທ່ານລັດຖະມົນຕີ ຍັງໄດ້ຊີ້ນຳໃຫ້ ຄະນະພັກ, ຄະນະນຳແຕ່ລະຂັ້ນ ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ, ລັດຖະກອນຂອງຕົນຮັບຮູ້,ເຂົ້າໃຈຢ່າງເລິກເຊິ່ງຕໍ່ນະໂຍບາຍຂອງພັກ, ລັດຖະບານ ໃນການປັບປຸງກົງຈັກການຈັດຕັ້ງຄັ້ງນີ້ ແລະ ພ້ອມກັນປະຕິບັດໜ້າທີ່ອັນໃໝ່ໃຫ້ມີຜົນສຳເລັດທີ່ໜັກແໜ້ນກວ່າເກົ່າ.

(ຂ່າວ: ກຊສ, ພາບ: ສຸກສະຫວັນ)