 |
ໃນວັນທີ 13 ສິງຫາ 2025 ທີ່ ກະຊວງການຕ່າງປະເທດຟີລິບປິນ, ທ່ານ ທອງສະຫວັນ ພົມວິຫານ ແລະ ທ່ານ ນາງ ມາເຣຍ ເທເຣຊາ ພີ ລາຊາໂຣ ໄດ້ພົບປະສອງຝ່າຍ ແລະ ເປັນປະທານຮ່ວມກອງປະຊຸມຄະນະກຳມາທິການຮ່ວມມືສອງຝ່າຍ (JCBC) ຄັ້ງທີ 3 ລະຫວ່າງ ສປປ ລາວ ແລະ ສ ຟີລິບປິນ ເພື່ອທົບທວນຄືນການພົວພັນຮ່ວມມືສອງຝ່າຍ ໃນໄລຍະ 2 ປີຜ່ານມາ ພາຍຫຼັງກອງປະຊຸມ JCBC ລາວ-ຟີລິບປິນ ຄັ້ງທີ 2 ທີ່ໄດ້ຈັດຂຶ້ນຢູ່ ສປປ ລາວ ໃນເດືອນສິງຫາ 2023, ຊຸກຍູ້ສົ່ງເສີມການພົວພັນຮ່ວມມືສອງຝ່າຍ ໃນດ້ານຕ່າງໆໃນປັດຈຸບັນ, ພ້ອມທັງໄດ້ຮ່ວມກັນກໍານົດທິດທາງແຜນການຮ່ວມມືໃນຕໍ່ໜ້າ ເພື່ອຮັດແໜ້ນສາຍພົວພັນ ແລະ ເສີມຂະຫຍາຍການຮ່ວມມືສອງຝ່າຍໃຫ້ຂະຫຍາຍຕົວຍິ່ງໆຂຶ້ນໄປເລື້ອຍໆ.
 |
ໃນກອງປະຊຸມຄັ້ງນີ້, ທ່ານ ນາງ ມາເຣຍ ເທເຣຊາ ພີ ລາຊາໂຣ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການເດີນທາງຢ້ຽມຢາມ ຟີລິບປິນ ຢ່າງເປັນທາງການ ຂອງ ຄະນະຜູ້ແທນ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງສອງປະເທດ ທັງເປັນການປະກອບສ່ວນສະເຫຼີມສະຫຼອງສາຍພົວພັນການທູດ ຄົບຮອບ 70 ປີ ລະຫວ່າງສອງປະເທດ ໃນປີ 2025 ນີ້. ພ້ອມນີ້, ຍັງໄດ້ປຶກສາຫາລືກ່ຽວກັບການເຊື້ອເຊີນ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ມາຢ້ຽມຢາມປະເທດຟີລິບປິນໃນທ້າຍປີ 2025 ນີ້ ເພື່ອເປັນການສະເຫຼີມສະຫຼອງຄົບຮອບປີສຳຄັນດັ່ງກ່າວ ຂອງສອງປະເທດ. ໃນຂະນະດຽວກັນ, ທ່ານ ທອງສະຫວັນ ພົມວິຫານ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຕໍ່ ທ່ານ ນາງ ມາເຣຍ ເທເຣຊາ ພີ ລາຊາໂຣ ທີີ່ໄດ້ຮັບການແຕ່ງຕັ້ງເປັນລັດຖະມົນຕີກະຊວງການຕ່າງປະເທດ ແຫ່ງ ສ ຟີລິບປິນ ຄົນໃໝ່, ພ້ອມທັງ ໄດ້ເຊື້ອເຊີນໄປຢ້ຽມຢາມ ສປປ ລາວ ຢ່າງເປັນທາງການ ໃນເວລາທີ່ສະດວກ.
 |
ນອກຈາກນີ້, ສອງຝ່າຍໄດ້ປຶກສາຫາລື ແລະ ທົບທວນຄືນການພົວພັນຮ່ວມມືໃນດ້ານຕ່າງໆ ເປັນຕົ້ນໃນດ້ານການເມືອງ, ດ້ານປ້ອງກັນຊາດ ແລະ ປ້ອງກັນຄວາມສະຫງົບ, ດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ກະສິກໍາ, ພະລັງງານ, ເຕັກໂນໂລຊີ ແລະ ການສື່ສານ, ການສຶກສາ, ວັດທະທໍາ-ສັງຄົມ ແລະ ອື່ນໆ, ລວມທັງການຮ່ວມມືລະຫວ່າງສອງກະຊວງການຕ່າງປະເທດລາວ ແລະ ຟີລິບປິນ ແລະ ເຫັນດີຊຸກຍູ້ສົ່ງເສີມການຮ່ວມມືໃນດ້ານຕ່າງໆດັ່ງກ່າວ ໃຫ້ຂະຫຍາຍຕົວກວ່າເກົ່າ ເພື່ອນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດ, ພ້ອມທັງໄດ້ແລກປ່ຽນທັດສະນະຕໍ່ບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.
ສອງຝ່າຍ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ຕະຫຼອດໄລຍະ 70 ປີ ຜ່ານມາ ຊຶ່ງໄດ້ຮັບການເສີມຂະຫຍາຍ ແລະ ພັດທະນາຂຶ້ນເປັນກ້າວໆ ເຫັນໄດ້ຈາກມີການແລກປ່ຽນການຢ້ຽມຢາມຂອງການນຳຂັ້ນສູງ ແລະ ພົບປະກັນໃນໂອກາດເຂົ້າຮ່ວມກອງປະຊຸມພາກພື້ນ ແລະ ສາກົນ ຂອງການນໍາຂັ້ນສູງ ແລະ ຂັ້ນຕ່າງໆ ຂອງສອງປະເທດຢ່າງເປັນປົກກະຕິ.
 |
ໃນຕອນທ້າຍກອງປະຊຸມ, ທ່ານ ທອງສະຫວັນ ພົມວິຫານ ແລະ ທ່ານ ນາງ ມາເຣຍ ເທເຣຊາ ພີ ລາຊາໂຣ ໄດ້ຮ່ວມກັນລົງນາມຮັບຮອງເອົາບົດບັນທຶກກອງປະຊຸມຄະນະກຳມາທິການຮ່ວມມືສອງຝ່າຍ ຄັ້ງທີ 3 ລະຫວ່າງ ສປປ ລາວ ແລະ ສ ຟີລິບປິນ ຊຶ່ງເປັນເອກະສານສໍາຄັນໃນຜົນສຳເລັດຂອງການຢ້ຽມຢາມຄັ້ງນີ້ ເພື່ອເປັນບ່ອນອີງໃຫ້ແກ່ສອງກະຊວງການຕ່າງປະເທດ ກໍຄືຂະແໜງການກ່ຽວຂ້ອງຂອງສອງຝ່າຍ ສືບຕໍ່ຊອກຫາຊ່ອງທາງຮ່ວມມືກັນໃນຂະແໜງທີ່ສອງປະເທດມີທ່າແຮງຕາມຂົງເຂດທີ່ໄດ້ກຳນົດໃນເນື້ອໃນຂອງບົດບັນທຶກສະບັບດັ່ງກ່າວ ເປັນຕົ້ນແມ່ນດ້ານພະລັງງານສະອາດ, ກະສິກໍາທັນສະໄໝ, ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ; ພ້ອມກັນນີ້, ທັງສອງຝ່າຍຍັງໄດ້ຮ່ວມກັນເປີດກາສັນຍາລັກສະເຫຼີມສະຫຼອງ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສອງປະເທດ ຢ່າງເປັນທາງການ.
ໃນວັນດຽວກັນ, ທ່ານ ທອງສະຫວັນ ພົມວິຫານ ພ້ອມດ້ວຍຄະນະ ຍັງໄດ້ໄປວາງພວງມາລາ ທີ່ ອະນຸສາວະລີຂອງ ທ່ານ ຣີຊານ (Rizal) ທີ່ເປັນວິລະບູລຸດຂອງປະຊາຊົນຟີລິບປິນ ໃນການຕໍ່ສູ້ເອົາເອກະລາດຈາກຕ່າງຊາດ; ໄປວາງກະຕ່າດອກໄມ້ ທີ່ຮູບປັ້ນຂອງ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ສວນອາຊຽນ; ໄດ້ໄປຢ້ຽມຢາມຫໍພິພິຕະພັນແຫ່ງຊາດ ຂອງປະເທດຟີລິບປິນ. ນອກຈາກນັ້ນ, ຍັງໄດ້ໄປຢ້ຽມຢາມ ແລະ ໃຫ້ກຽດໂອ້ລົມພະນັກງານຢູ່ສະຖານເອກອັກຄະລັດທະທູດ ແຫ່ງ ສປປ ລາວ ປະຈຳ ສາທາລະນະລັດ ຟີລິບປິນ.
(ຂ່າວ: ກຕທ)
ຄໍາເຫັນ