 |
ສະຫາຍພັນໂທຟອງສະໝຸດພົມມະຈັນຮອງຫົວໜ້າພະແນກກວດເຂດນອກໂຮງໝໍສູນກາງ 103 ກອງທັບ, ຄະນະຮັບຜິດຊອບການຝຶກຊ້ອມພາກສະໜາມໄດ້ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າ: ເພື່ອເປັນການຮັບປະກັນໃນການຝຶກຊ້ອມກອບກູ້ໄພພິບັດຮ່ວມ 3 ກອງທັບກຳປູເຈຍ-ລາວ-ຫວຽດນາມໃຫ້ມີຜົນສໍາເລັດຕາມແຜນການຂອງຂັ້ນເທິງວາງໄວ້ນັ້ນ, ເມື່ອໄດ້ຮັບຄໍາສັ່ງຈາກຂັ້ນເທິງເຫຼົ່າຮົບເສນາຮັກໄດ້ຈັດຕັ້ງກໍາລັງ 57 ສະຫາຍເຂົ້າຢຶດສະໜາມໃນວັນທີ 1 ຕຸລາ 2025ແລະກໍ່ສ້າງສະໜາມສໍາເລັດໄດ້ຈັດຕັ້ງປະຕິບັດການຝຶກຊ້ອມຊ່ວຍເຫຼືອຜູ້ຖືກຜົນກະທົບຈາກໄພພິບັດທາງທໍາມະຊາດຢູ່ສະໝາມໂດຍໄດ້ຈໍາລອງເຫດການແລະຈັດຕັ້ງເປັນໂຮງໝໍຂັ້ນ 1, ຂັ້ນ 2. ໃນນັ້ນ, ໂຮງໝໍຂັ້ນ 1 ປະກອບມີ: ສູນບັນຊາພາກສະໜາມ 3 ຝ່າຍກໍາປູເຈຍ-ລາວ-ຫວຽດນາມແລະເຮືອແພດສຸກເສີນ, ມີໜ່ວຍຮັບຕ້ອນຄົນເຈັບທາງນໍ້າແລະທາງບົກ, ໜ່ວຍຄັດແຍກຄົນເຈັບປະກອບມີ 18 ສະຫາຍ (ລາວ 8 ສະຫາຍ, ກໍາປູເຈຍ 5 ສະຫາຍ, ຫວຽດນາມ 5 ສະຫາຍ), ໜ່ວຍປິ່ນປົວຄົນເຈັບກາງປະກອບມີ: ຫວຽດນາມ 5 ສະຫາຍ, ໜ່ວຍປິ່ນປົວຄົນເຈັບເບົາປະກອບມີກຳປູເຈຍ 5 ສະຫາຍ; ໂຮງໝໍຂັ້ນ 2 ປະກອບມີ: ໜ່ວຍຮັບຕ້ອນຄົນເຈັບໜັກມີຫວຽດນາມ 8 ສະຫາຍ; ໜ່ວຍປິ່ນປົວຄົນເຈັບມີກໍາປູເຈຍ 8 ສະຫາຍ, ໜ່ວຍປິ່ນປົວຄົນເຈັບນໍາສົ່ງໂຮງໝໍແນວຫຼັງມີທີມແພດກອງທັບລາວ 6 ສະຫາຍ. ນອກນັ້ນ, ຍັງມີໜ່ວຍຜ່າຕັດເຄື່ອນທີ່.
 |
ການຝຶກຊ້ອມກອບກູ້ໄພພິບັດຮ່ວມ 3 ກອງທັບໃນຄັ້ງນີ້, ເຫຼົ່າຮົບເສນາຮັກໄດ້ມີການຈັດແບ່ງໜ້າທີ່ແລະຄັດແຍກຜູ້ບາດເຈັບ(ໜັກ, ກາງ, ເບົາ), ຊ່ວຍເຫຼືອຜູ້ປະສົບໄພທີ່ຕິດຄ້າງຕາມບ້ານ, ເຮືອນ, ຕົ້ນໄມ້ແລະເກາະດອນ, ກອບກູ້ແລະຊ່ວຍເຫຼືອເອົາຜູ້ປະສົບໄພທີ່ຖືກບາດເຈັບໄຫຼມາຕາມກະແສນໍ້າ, ໜ່ວຍແພດສຸກເສີນປະຖົມພະຍາບານຂັ້ນຕົ້ນກ່ອນນໍາສົ່ງໄປໂຮງໝໍພາກສະໜາມ; ຊ່ວຍເຫຼືອຜູ້ປະສົບໄພດິນເຈື່ອນທັບຖົມ, ປະຕິບັດການຊ່ວຍເຫຼືອຜູ້ປະສົບໄພທາງດ້ານການແພດຕໍ່ຜູ້ບາດເຈັບແລະເສຍຊີວິດແລ້ວນໍາສົ່ງຜູ້ປະສົບໄພທີ່ມີອາການເຈັບໜັກໄປໂຮງໝໍແນວຫຼັງດ້ວຍເຮືອບິນ (MI-17).
 |
ຜ່ານການຝຶກຊ້ອມໃນໄລຍະຫຼາຍວັນທີ່ຜ່ານມາ, ເຖິງວ່າວຽກງານວິຊາສະເພາະບາງດ້ານຈະຍັງບໍ່ທັນສອດຄ່ອງກໍຕາມ, ແຕ່ຍ້ອນການນຳພາ-ຊີ້ນຳຢ່າງໃກ້ຊິດຕິດແທດຂອງຂັ້ນເທິງ, ພະນັກງານວິຊາການແພດໝໍ-ນັກຝຶກຊ້ອມແລະນັກສະແດງໄດ້ພ້ອມກັນຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ສຸມສະຕິປັນຍາ, ກຳລັງແຮງກາຍ, ແຮງໃຈເຂົ້າໃນການຈັດຕັ້ງປະຕິບັດການຝຶກຊ້ອມກອບກູ້ໄພພິບັດຮ່ວມກັບກອງທັບກໍາປູເຈຍແລະຫວຽດນາມຕາມແຜນການເຄື່ອນໄຫວຝຶກຊ້ອມຕາມແຕ່ລະບາດກ້າວດ້ວຍຄວາມເອົາໃຈໃສ່ແລະເປັນຂະບວນການຟົດຟື້ນ.
 |
ໃນບັ້ນຝຶກຊ້ອມກອບກູ້ໄພພິບັດຮ່ວມ 3 ກອງທັບ, ເຫຼົ່າຮົບເສນາຮັກຈະໄດ້ສືບຕໍ່ຝຶກຊ້ອມໃຫ້ມີຄວາມເປັນເອກະພາບ, ກຳແໜ້ນທິດສະດີ, ຫຼັກການແລະພາກປະຕິບັດຕົວຈິງເພື່ອນຳໄປຈັດຕັ້ງຝຶກຊ້ອມຮ່ວມກັບກຳລັງກອງທັບກໍາປູເຈຍແລະຫວຽດນາມໃຫ້ແທດເໝາະກັບຄວາມເປັນຈິງ. ຄາດວ່າຈະສາມາດຮັບປະກັນໃຫ້ການເຂົ້າຮ່ວມຝຶກຊ້ອມກອບກູ້ໄພພິບັດຮ່ວມ 3 ກອງທັບໃນຄັ້ງນີ້ໃຫ້ມີຜົນສໍາເລັດຕາມແຜນການ.
ຂ່າວ: ສຸເວດສີດາຄໍາ
ຄໍາເຫັນ