ທ່ານລິນຄຳດວງສະຫວັນລັດຖະມົນຕີກະຊວງກະສິກຳແລະປ່າໄມ້ ໄດ້ຕອບຄຳຊັກຖາມຂອງສະມາຊິກສະພາແຫ່ງຊາດ (ສສຊ) ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ໃນວັນທີ 13 ມິຖຸນານີ້ ພາຍໃຕ້ການເປັນປະທານຂອງທ່ານໄຊສົມພອນພົມວິຫານປະທານສະພາແຫ່ງຊາດ.
ທ່ານ ລິນຄໍາ ດວງສະຫວັນ ໄດ້ກ່າວວ່າ: ກະຊວງກະສິກໍາ ແລະ ປ່າໄມ້ ໄດ້ເປັນເຈົ້າການ ໃນການຈັດຕັ້ງປະຕິບັດວຽກງານຊົນລະປະທານ ເພື່ອສະໜອງໃຫ້ແກ່ການຜະລິດ ຊຶ່ງໃນທົ່ວປະເທດ ມີເນື້ອທີ່ນາທັງໝົດ 805.900 ເຮັກຕາ; ໃນນັ້ນ, ມີໂຄງການທີ່ສາມາດສະໜອງນໍ້າໃນລະດູຝົນທັງໝົດ 19.453 ໂຄງການ (ມີປະເພດໂຄງການຊົນລະປະທານນໍ້າໄຫຼເອງ ຈໍານວນ 4.007 ໂຄງການ, ສ່ວນທີ່ເຫຼືອແມ່ນປະເພດໂຄງການຊົນລະປະທານຈັກສູບນ້ໍາໄຟຟ້າ, ຈັກສູບນ້ໍາພະລັງງານແສງອາທິດ ແລະ ຝາຍ ປວງຊົນຂະໜາດນ້ອຍ) ສາມາດສະໜອງນໍ້າ ໄດ້ 317.400 ເຮັກຕາ ໂດຍສະໜອງນໍ້າໃຫ້ການຜະລິດເຂົ້ານາ ປີ 263.300 ເຮັກຕາ ເທົ່າກັບ 32% ຂອງເນື້ອທີ່ປູກເຂົ້ານາປີທັງໝົດ, ສ່ວນເຫຼືອແມ່ນສະໜອງໃຫ້ການປູກພືດ. ໃນລະດູແລ້ງ, ໂຄງການທີ່ສາມາດສະໜອງນໍ້າໃຫ້ແກ່ການຜະລິດທັງໝົດມີ 11.602 ໂຄງການ, ສາມາດສະໜອງນໍ້າໄດ້ 182.500 ເຮັກຕາ ໂດຍສະໜອງໃຫ້ການຜະລິດເຂົ້ານາແຊງ 92.200 ເຮັກຕາ ເທົ່າກັບ 11.5% ຂອງເນື້ອທີ່ນາທັງໝົດ.
ປັດຈຸບັນ, ໂຄງການທີ່ກໍາລັງດໍາເນີນ ໂດຍການລົງທຶນຂອງລັດຖະບານ ມີທັງໝົດ 8 ໂຄງການ, ຖ້າສໍາເລັດຈະສາມາດສະໜອງນໍ້າໄດ້ທັງໝົດ 24.900 ເຮັກຕາຊຶ່ງກວມເອົາ 8 ເມືອງ ຂອງ 5 ແຂວງ; ໃນນັ້ນ, ມີໂຄງການມີຄວາມຄືບໜ້າຕ່ໍາສຸດ 22% ແລະ ສູງສຸດ 78%. (ຊຶ່ງໃນນັ້ນ ໄດ້ກວມເອົາ 3 ໂຄງການທີ່ສະມາຊິກສະພາໄດ້ຍົກຂຶ້ນມີ ຫ້ວຍທ່າຮາວ, ຫ້ວຍອາໄກ ແລະ ຫ້ວຍພະແລງ).ນອກຈາກ 8 ໂຄງການທີ່ກ່າວມານັ້ນ, ເພື່ອຫຼຸດຜ່ອນຄ່າໃຊ້ຈ່າຍໃນການນໍາໃຊ້ນໍ້າ ກະຊວງກະສິກຳ ແລະ ປ່າໄມ້ ຍັງໄດ້ສຸມໃສ່ການສຶກສາ, ສໍາຫຼວດ-ອອກແບບຊົນລະປະທານນໍ້າໄຫຼເອງ ດັ່ງທີ່ສະມາຊິກສະພາແຫ່ງຊາດຫຼາຍທ່ານໄດ້ສະເໜີ ມີ 4 ໂຄງການ ຊຶ່ງກວມ 4 ເມືອງ ຂອງ 4 ແຂວງ. ຖ້າຫາກໂຄງການໄດ້ຮັບການຈັດຕັ້ງປະຕິບັດສໍາເລັດ ຈະສາມາດສະໜອງນໍ້າຕື່ມອີກ 10.200 ກວ່າເຮັກຕາ.
ທ່ານລັດຖະມົນຕີກະຊວງກະສິກຳ ແລະ ປ່າໄມ້ ຍັງກ່າວກ່ຽວກັບວຽກງານການຄຸ້ມຄອງ ແລະ ນໍາໃຊ້ຊົນລະປະທານວ່າ: ນອກຈາກສຸມໃສ່ການລົງທຶນໃນການກໍ່ສ້າງພື້ນຖານໂຄງລ່າງແລ້ວ, ກໍໄດ້ອອກນິຕິກໍາຈໍານວນໜຶ່ງເຊັ່ນ:ຂໍ້ຕົກລົງວ່າດ້ວຍການສ້າງຕັ້ງ ແລະ ຄຸ້ມຄອງກຸ່ມຜູ້ນໍາໃຊ້ນໍ້າ ຊົນລະປະທານ; ຂໍ້ຕົກລົງວ່າດ້ວຍການສ້າງຕັ້ງ ແລະ ຄຸ້ມຄອງກອງທຶນພັດທະນາຊົນລະທານ ປະກາດໃຊ້ໃນປີ 2024.
ສໍາລັບການແກ້ໄຂບັນຫາໃນຕໍ່ໜ້າ, ໂດຍສະເພາະໂຄງການ ຫ້ວຍອາໄກ້ ທີ່ມີຄວາມຄືບໜ້າ 74% ແລະ ຫ້ວຍຜາແລງ ມີຄວາມຄືບໜ້າ 36%; ທັງສອງໂຄງການ ບໍລິສັດຮັບເໝົາກໍ່ສ້າງ ມີຄວາມກຽມພ້ອມໃນການຈັດຕັ້ງປະຕິບັດ, ຍັງແຕ່ລໍຖ້າການດັດແກ້ມູນຄ່າໂຄງການ ຊຶ່ງປັດຈຸບັນ ລັດຖະບານກໍາລັງຄົ້ນຄວ້າ ເພື່ອສະເໜີສະພາແຫ່ງຊາດ ພິຈາລະນາຮັບຮອງ; ສ່ວນໂຄງການຫ້ວຍທ່າຮາວ, ແມ່ນໄດ້ຮັບຮອງເອົາການສະເໜີ ຂໍດັດແກ້ມູນຄ່າ ຈາກສະພາແຫ່ງຊາດແລ້ວ, ມາຮອດປັດຈຸບັນ ການກໍ່ສ້າງຄືບໜ້າ 68% ແລະ ຄາດຄະເນວ່າຈະສໍາເລັດຕາມແຜນ ໃນທ້າຍປີ 2026.
(ຂ່າວ: ສຸກສະຫວັນ: ພາບ: ເກດສະໜາ)
ຄໍາເຫັນ