ລັດຖະບານຍີ່ປຸ່ນຊ່ວຍເຫຼືອດ້ານຄົມມະນາຄົມ ຜ່ານໂຄງການກໍ່ສ້າງຂົວໃນແຂວງຫຼວງພະບາງ

ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າປະມານ 64O.000ໂດລາ ເພື່ອປັບປຸງລະດັບໂຄງລ່າງພື້ນຖານ ໃນແຂວງຫຼວງພະບາງ ໃນວັນທີ 9 ກຸມພາ ຜ່ານມາພາຍໃຕ້ໂຄງການຊ່ວຍເຫຼືອຜ່ານອົງການ NGO ຍີ່ປຸ່ນ; ໂຄງການນີ້ຈະສະໜັບສະໜູນທຶນຮອນ ໃນການກໍ່ສ້າງຂົວຈົມທັງໝົດ 3 ແຫ່ງ ໃນເມືອງປາກອູ, ໂພນໄຊ ແລະ ປາກແຊງ ແຂວງຫຼວງພະບາງ ເພື່ອຍົກລະດັບສະພາບການຄົມມະນາຄົມ-ຂົນສົ່ງໃນແຂວງເປົ້າໝາຍ.
ການເຊັນສັນຍາໂຄງການດັ່ງກ່າວ ເປັນການລົງນາມລະຫວ່າງ ທ່ານ ໂຄບະຢະຊິ ເຄັນອິຈິເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ທ່ານ ນະກະໂອະ ທະດະຮິໂກະປະທານອົງການ ຄູ່ຮ່ວມພັດທະນາໂຄງລ່າງພື້ນຖານສາກົນ (Japan Infrastructure Partners)ໂດຍມີຜູ້ຕາງໜ້າຈາກຫຼາຍກະຊວງທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ; ທ່ານ ນະກະໂອະ ທະດະຮິໂກະປະທານອົງການ ຄູ່ຮ່ວມພັດທະນາໂຄງລ່າງພື້ນຖານສາກົນ (JIP) ຕາງໜ້າໃຫ້ອົງການກ່າວສະແດງຄວາມປິຕິຍິນດີທີ່ທາງອົງການໄດ້ຮ່ວມເຊັນສັນຍາໂຄງການຊ່ວຍເຫຼືອ ກັບສະຖານທູດຍີ່ປຸ່ນໃນຄັ້ງນີ້; ທ່ານ ນະກະໂອະ ຍັງໄດ້ໃຫ້ຄຳເຫັນຕື່ມວ່າ:“ອົງການJIP ແມ່ນເກີດຂຶ້ນຈາກການຮ່ວມມືກັນຂອງອະດີດພະນັກງານລັດປະຈຳຢູ່ກະຊວງທີ່ດິນ, ໂຍທາທິການ, ຄົມມະນາຄົມ ແລະ ທ່ອງທ່ຽວຍີ່ປຸ່ນ, ແຕ່ຫຼັງຈາກບຳນານແລ້ວ ກໍຍັງຢາກປະກອບສ່ວນເຂົ້າໃນວຽກງານກໍ່ສ້າງໂຄງລ່າງພື້ນຖານ ຈຶ່ງໄດ້ສ້າງຕັ້ງອົງການດັ່ງກ່າວຂຶ້ນ. ພວກຂ້າພະເຈົ້າເຫັນເຖິງຄວາມຈຳເປັນໃນການກໍ່ສ້າງຂົວຈົມຢູ່ປະເທດລາວ ເນື່ອງຈາກວ່າມີຫຼາຍໝູ່ບ້ານທີ່ລົດບໍ່ສາມາດເດີນທາງໄປເຖິງໄດ້ໃນເວລາລະດູຝົນ. ຂ້າພະເຈົ້າຫວັງວ່າ ການກໍ່ສ້າງຈະສຳເລັດລຸລ່ວງໄປດ້ວຍດີ ແລະ ປະຊາຊົນໃນທ້ອງຖິ່ນມີຮອຍຍິ້ມທີ່ສົດໃສໃນວາລະທີ່ໂຄງການສຳເລັດ”. 
ໃນພິທີດັ່ງກ່າວທ່ານ ໂຄບະຢະຊິ ເຄັນອິຈິໄດ້ໃຫ້ຄຳເຫັນ “ແຂວງຫຼວງພະບາງເປັນເມືອງມໍລະດົກໂລກ ທີ່ດຶງດູດນັກທ່ອງທ່ຽວຈາກທັງພາຍໃນ ແລະ ຕ່າງປະເທດ ຊຶ່ງການເປີດນຳໃຊ້ທາງລົດໄຟລາວ-ຈີນໃນ2-3 ປີມານີ້ ໄດ້ກາຍເປັນການຍົກລະດັບໂຄງລ່າງພື້ນຖານຂອງແຂວງຢ່າງກ້າວກະໂດດ. ແຕ່ເນື່ອງຈາກວ່າ ແຂວງຫຼວງພະບາງມີເນື້ອທີ່ສ່ວນໃຫຍ່ເປັນເຂດພູດອຍ ແລະ ແມ່ນ້ຳລຳເຊໄຫຼຜ່ານຫຼາຍ ເຮັດໃຫ້ຍັງມີຫຼາຍບ່ອນທີ່ລົດບໍ່ສາມາດຜ່ານໄປໄດ້ ຍ້ອນລະດັບນ້ຳທີ່ເພີ່ມຂຶ້ນໃນລະດູຝົນ. ສະພາບການດັ່ງກ່າວ ໄດ້ສົ່ງຜົນກະທົບອັນໃຫຍ່ຫຼວງໃຫ້ແກ່ການທຳມາຫາກິນ ແລະ ດຳລົງຊີວິດຂອງປະຊາຊົນໃນທ້ອງຖິ່ນ ຊຶ່ງເປັນສາເຫດຫຼັກທີ່ພາໃຫ້ເກີດມີຄວາມແຕກໂຕນດ້ານຄວາມເປັນຢູ່ພາຍໃນແຂວງ”. 
ພ້ອມກັນນັ້ນ, ທ່ານຍັງໄດ້ມີຄຳເຫັນຕື່ມວ່າ “ຂ້າພະເຈົ້າຄາດຫວັງວ່າ ການຊ່ວຍເຫຼືອໃນຄັ້ງນີ້ ຈະເປັນການປະກອບສ່ວນໃຫ້ການເດີນທາງໄປມາຫາສູ່ກັນຂອງປະຊາຊົນໃນ 3 ເມືອງຈະໄດ້ຮັບການປັບປຸງ ແລະ ຍັງເປັນການກະຕຸ້ນເສດຖະກິດໃນທ້ອງຖິ່ນ ທີ່ຊ່ວຍໃຫ້ສະພາບຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບ, ພ້ອມທັງກາຍເປັນການສ້າງພື້ນຖານໃນການພັດທະນາໂຄງລ່າງພື້ນຖານທີ່ຍືນຍົງໃນອະນາຄົດອີກດ້ວຍ”; ໂຄງການຊ່ວຍເຫຼືອຜ່ານອົງການບໍ່ສັງກັດລັດຖະບານ (NGO) ຍີ່ປຸ່ນແມ່ນ ໄດ້ຮັບການສະໜອງທຶນຈາກກະຊວງການຕ່າງປະເທດຍີ່ປຸ່ນ ເພື່ອໃຫ້ອົງການ NGO ຍີ່ປຸ່ນເປັນຜູ້ວາງແຜນ ແລະ ນຳໃຊ້ໃນການຈັດຕັ້ງປະຕິບັດໂຄງການເພື່ອການພັດທະນາເສດຖະກິດ-ສັງຄົມໃນປະເທດກຳລັງພັດທະນາ ລວມເຖິງສປປ ລາວ. 
ໃນໄລຍະ 5 ປີຜ່ານມາ, ລັດຖະບານຍີ່ປຸ່ນໄດ້ໃຫ້ການສະໜັບສະໜູນແກ່ສປປ ລາວ ໃນດ້ານ ການສຶກສາ, ສາທາລະນະສຸກ, ເກັບກູ້ລະເບີດບໍ່ທັນແຕກ, ການທ່ອງທ່ຽວ ແລະ ດ້ານອື່ນໆ ລວມເປັນມູນຄ່າຫຼາຍກວ່າ 13 ລ້ານໂດລາ. ປະເທດຍີ່ປຸ່ນຈະສືບຕໍ່ຮ່ວມມືກັບອົງການ NGO ເພື່ອໃຫ້ການຊ່ວຍເຫຼືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ.
(ຂ່າວ: ສະຖານທູດຍີ່ປຸ່ນ)