 |
ທ່ານ ອື່ງສິດ ນິມິດບັນຊາ ຮອງປະທານຄະນະກໍາມະການປົກຄອງເມືອງ, ທັງເປັນປະທານຄະນະກໍາມະການຄຸ້ມຄອງໄພພິບັດຂັ້ນເມືອງໄດ້ລາຍງານວ່າ: ເນື່ອງຈາກລົມມໍລະສຸມຕາເວັນຕົກສຽງໃຕ້ທີ່ພັດຜ່ານເມືອງເຊບັ້ງໄຟ ເຮັດໃຫ້ມີຝົນຕົກໜັກຕິດຕໍ່ກັນຫຼາຍວັນ ຈິ່ງເຮັດໃຫ້ລະດັບນໍ້າເຊບັ້ງໄຟເພີ່ມຂຶ້ນຢ່າງໄວວາ ວັດແທກໄດ້ໃນຄັ້ງວັນທີ 25 ສິງຫາ 2026 ລະດັບນໍ້າເຊຂຶ້ນສູງສຸດ 20.85 ແມັດ, ໄດ້ໄຫຼເຂົ້າພື້ນທີ່ຢູ່ອາໄສ ແລະ ພື້ນທີ່ກະສິກໍາ. ນັບແຕ່ວັນທີ 1-26 ສິງຫາ 2026 ນໍ້າໄດ້ຖ້ວມບ້ານເຮືອນປະຊາຊົນມີ 19 ບ້ານຄື: ຢູ່ເຂດຕາແສງຄໍາແພໃຕ້ມີ 7 ບ້ານ ຖືກນໍ້າຖ້ວມ, ເຂດຕາແສງສີບຸນເຮືອງມີ 10 ບ້ານ ຖືກນໍ້າຖ້ວມ ແລະ ເຂດຕາແສງຄໍາແພເໜືອ 2 ບ້ານຖືກນໍ້າຖ້ວມ,ເຂດຕາແສງແສນຄໍາສົມບູນມີ 1 ບ້ານ.
ເພື່ອກະກຽມຄວາມພ້ອມໃນການຕອບໂຕ້ໄພພິບັດທີ່ເກີດຂຶ້ນພາຍໃນເມືອງ, ຄະນະກໍາມະການຄຸ້ມຄອງໄພພິບັດຂັ້ນເມືອງໄດ້ສົມທົບກັບຄະນະພັກເມືອງ, ກໍາລັງ ປກຊ-ປກສ ເມືອງ,ກອງພັນໃຫຍ່ 401,ກອງພັນ 107,ກອງພັນ 123 ແລະ ສົມທົບກັບບັນດາຕາແສງ, ອໍານາດການປົກຄອງບ້ານ ແລະ ພາກສ່ວນທີ່ກ່ຽວຂ້ອງລົງເຄື່ອນໄຫວຕິດຕາມ,ເຝົ້າລະວັງ ແລະ ໃຫ້ການຊ່ວຍເຫຼືອ ຜູ້ປະສົບໄພນໍ້າຖ້ວມໂດຍມີການອົບພະຍົກປະຊາຊົນ, ສັດລ້ຽງ ແລະ ວັດຖຸ-ອຸ ປະກອນຂອງປະຊາຊົນໄປໄວ້ບ່ອນທີ່ປອດໄພກໍ່ຄືສູນພັກເຊົາຂອງບັນດາບ້ານ. ນອກຈາກນັ້ນຍັງໄດ້ແນະນໍາໃຫ້ປະຊາຊົນ ຕິດຕາມເຝົ້າລະວັງພະຍາດຕາມລະດູການເປັນຕົ້ນ: ພະຍາດໄຂ້ເລືອດອອກ ແລະ ພະຍາດທີ່ມາກັບທໍາມະຊາດ ແລະ ອື່ນໆ.
ນອກຈາກນີ້, ນ້ຳຍັງໄຫຼເຂົ້າຖ້ວມເນື້ອທີ່ການຜະລິດກະສິກຳ, ໂຮງຮຽນ, ສຸກສາລາແລະອື່ນໆ ໂດຍສະເພາະແມ່ນເນື້ອທີ່ ເຂົ້ານາປີຖືກນ້ຳຖ້ວມທັງໝົດ 4,868.53 ເຮັກຕາ ເທົ່າກັບ 46.69% ຂອງເນື້ອທີ່ນາປີ, ຖ້ວມເນື້ອທີ່ປູກອ້ອຍ 687 ເຮັກຕາ, ເນື້ອທີ່ປູກມັນຕົ້ນ 131 ເຮັກຕາ ແລະ ເນື້ອທີ່ປູກຢາງພາລາ 168 ເຮັກຕາ, ເນື້ອທີ່ປູກພືດອື່ນໆ 62 ເຮັກຕາ ເທົ່າກັບ 30.70% ຂອງເນື້ອທີ່ປູກພືດຕົວຈິງ 2,866 ເຮັກຕາ, ຈໍານວນສັດລ້ຽງທີ່ໄດ້ຮັບຜົນກະທົບທັງໝົດ 18,547 ໂຕ, ສະເພາະສັດລ້ຽງເຊັ່ນ: ງົວ,ຄວາຍ,ໝູ,ແບ້ ແລະ ສັດປີກໄດ້ນໍາໄປໄວ້ຢູ່ບ່ອນທີ່ສູງ, ນອກຈາກນີ້ ຍັງຖ້ວມໜອງປາແລະລະບົບຊົນລະປະທານເສຍຫາຍເປັນຈຳນວນຫຼວງຫຼາຍ.
ໃນໂອກາດເຄື່ອນໄຫວຢ້ຽມຢາມປະຊາຊົນທີ່ຖືກຜົນກະທົບນໍ້າຖ້ວມຢູ່ເມືອງເຊບັ້ງໄຟຄັ້ງນີ້, ທ່ານລັດຖະມົນຕີກະຊວງ ຮສສພ້ອມດ້ວຍຄະນະໄດ້ມອບເຄື່ອງບໍລິໂພກຈໍານວນໜຶ່ງໃຫ້ແກ່ປະຊາຊົນບ້ານນາພອກ ແລະ ໄດ້ມອບເຄື່ອງຊ່ວຍເຫຼືອປະເພດເຂົ້າສານຈ້າວ 5 ໂຕນ ມູນຄ່າ 75 ລ້ານກີບພ້ອມດ້ວຍໝີ່ໄວໆ ແລະ ນໍ້າດື່ມຈໍານວນໜຶ່ງໃຫ້ແກ່ເມືອງເຊບັ້ງໄຟເພື່ອນໍາໄປຊ່ວຍເຫຼືອປະຊາຊົນທີ່ໄດ້ຮັບກະທົບຈາກນໍ້າຖ້ວມ.
ຂ່າວ: ຄຳມ່ວນ
ຄໍາເຫັນ