ລັດຖະມົນຕີ ກະຊວງ ຍທຂ ຊຸກຍູ້ການກໍ່ສ້າງຂົວຂ້າມນ້ຳເຊໂດນ

ໂຄງການກໍ່ສ້າງຂົວຂ້າມນ້ຳເຊໂດນ ໄດ້ເລີ່ມລົງມືກໍ່ສ້າງໃນຕົ້ນປີ 2015 ຫາ ວັນທີ 19 ມັງກອນ 2017. ຂົວດັ່ງກ່າວ, ມີລວງຍາວ 210 ແມັດ, ກວ້າງ ລວມທັງທາງຍ່າງສອງຟາກຂ້າງ 12.12 ແມັດ, ຈັດຕັ້ງປະຕິບັດສໍາເລັດໄດ້ 56.65%. ສໍາລັບວຽກທີ່ຍັງຄົງຄ້າງ 43.35% ເຮັດໃຫ້ການຈັດຕັ້ງປະຕິບັດໂຄງການ ມີຄວາມລ້າຊ້າແກ່ຍາວມາຈົນເຖີງປັດຈຸບັນ. ສໍາລັບວຽກທີ່ຈະສືບຕໍ່ດໍາເນີນການກໍ່ສ້າງໃຫ້ສຳເລັດ ມີຄື: ກໍ່ສ້າງເສັ້ນທາງປູຍາງ 2 ຊັ້ນ ເຂົ້າ-ອອກຂົວ ລວງຍາວ 2,500 ແມັດ, ລວງກວ້າງ 7 ແມັດ, ເທເບຕົງໜ້າຂົວ, ຕິດຕັ້ງຮາວພະນັກຂົວ, ວຽກງານລະບາຍນ້ຳ, ວຽກປ້ອງກັນໆເຈື່ອນ, ວຽກອົງປະກອບຂອງທາງ ແລະ ວຽກເພີ່ມອື່ນໆ ມູນຄ່າການກໍ່ສ້າງໃນໜ້າວຽກສືບຕໍ່ 34 ຕື້ກວ່າກີບ.

ໃນໂອກາດນີ້, ທ່ານລັດຖະມົນຕີ ກະຊວງ ຍທຂ ໄດ້ຊີ້ນໍາໃຫ້ອົງການປົກຄອງແຂວງສາລະວັນ ເອົາໃຈໃສ່ທຸມເທທຸກກຳລັງແຮງທີ່ມີ, ເງື່ອນໄຂ ເພື່ອສືບຕໍ່ດຳເນີນການກໍ່ສ້າງຂົວດັ່ງກ່າວ ໃຫ້ສຳເລັດ ຕາມແບບໂຄງສ້າງ, ທັງມີຄວາມເຊື່ອໝັ້ນໃນດ້ານວິຊາສະເພາະ ທີ່ຈະຄັດເລືອກເອົາບໍລິສັດ ທີ່ມາດຖານ, ເງື່ອນໄຂ ຄົບຖ້ວນ ເພື່ອຫຼີກລ້ຽງຂໍ້ຫຍຸ້ງຍາກຕ່າງໆໃນການຈັດຕັ້ງປະຕິບັດ. ພ້ອມນັ້ນ, ອົງການປົກຄອງແຂວງ ຕ້ອງໄດ້ສຸມໃສ່ຊຸກຍູ້ຢ່າງແຂງແຮງ ເພື່ອເຮັດໃຫ້ການດຳເນີນການກໍ່ສ້າງຂົວແຫ່ງນີ້ ລຸລ່ວງໄປດ້ວຍດີ ແລະ ຄາດວ່າຈະໃຫ້ສຳເລັດປີ 2026 ນີ້, ສ່ວນວຽກງານດ້ານໃດ ທີ່ປະສົບຄວາມຫຍຸ້ງຍາກ ໃຫ້ລາຍງານ, ປຶກສາຫາລືພາກສ່ວນທີ່ກ່ຽຂ້ອງ ກໍຄືກະຊວງ ຍທຂ ເພື່ອຫາວິທີທາງແກ້ໄຂຮ່ວມກັນ ເຮັດໃຫ້ວຽກງານສຳເລັດໄປດ້ວຍດີ.

(ຂ່າວ-ພາບ: ວິໄລວອນ ສິດທິໄຊ)