 |
ໃນໂອກາດນີ້, ທ່ານລັດຖະມົນຕີ, ຫົວໜ້າ ຫສນຍ ແລະ ຄະນະ ໄດ້ຮັບຟັງການລາຍງານ ກ່ຽວກັບສະພາບການບໍລິຫານຈັດການນໍ້າ ຢູ່ເຂື່ອນໄຟຟ້ານໍ້າລີກ 1 ແລະ 2, ລວມທັງ ສະພາບຜົນກະທົບ ທີ່ເກີດຂຶ້ນ ຈາກຜູ້ຕາງໜ້າບໍລິສັດ ເຂື່ອນໄຟຟ້ານໍ້າລີກ ເຫັນວ່າ: ເນື່ອງຈາກໄດ້ມີພາຍຸພັດຜ່ານເຂົ້າມາລາວ ແລະ ພາໃຫ້ເກີດມີຝົນຕົກໜັກ ໃນອາທິດທີ່ຜ່ານມາເຮັດໃຫ້ນ້ຳໃນເຂື່ອນໄຟຟ້ານໍ້າລີກເພີ່ມຂຶ້ນຢ່າງໄວວາກາຍເຂດເຕືອນໄພທີ່ກຳນົດໄວ້, ເພື່ອຫຼີກລ່ຽງຄວາມສ່ຽງທີ່ອາດຈະເກີດຂຶ້ນ ຫຼື ບໍ່ສ້າງຄວາມເສຍຫາຍຢ່າງຮ້າຍແຮງຕໍ່ຊີວິດ ແລະ ຊັບສິນຂອງປະຊາຊົນຈຶ່ງຈຳເປັນຕ້ອງໄດ້ປ່ອຍນ້ຳອອກຈາກເຂື່ອນ ຊຶ່ງໄດ້ແຈ້ງເຕືອນແຜນການປ່ອຍນໍ້າອອກຈາກເຂື່ອນ ໃຫ້ສັງຄົມຮັບຊາບລ່ວງໜ້າໃນການກະກຽມຮັບມືຊຶ່ງການປ່ອຍນໍ້າລະບາຍອອກຈາກເຂື່ອນຕົວຈິງເນື່ອງຈາກວ່າມີຝົນຕົກຫຼາຍໃນຊ່ວງວັນທີ 27-30 ກັນຍາ ຈຶ່ງມີຄວາມຈໍາເປັນໃນການປ່ອຍນໍ້າອອກເພີ່ມຫຼາຍຂຶ້ນ, ສ່ວນໃນໄລຍະວັນທີ1-2 ຕຸລານີ້ ແມ່ນໄດ້ຫຼຸດຜ່ອນການປ່ອຍນໍ້າຢ່າງຕໍ່ເນື່ອງ. ຈາກສະພາບດັ່ງກ່າວໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ຢູ່ພາຍໃນ 7 ບ້ານ ຂອງເມືອງເຟືອງ ທີ່ລຽບຕາມແຄມນໍ້າລີກ ໂດຍສະເພາະ ໄດ້ເກີດສະພາບນໍ້າຖ້ວມ-ນໍ້າໄຫຼຊຸ ສ້າງຄວາມເສຍຫາຍ ເປັນຕົ້ນ:ເຮືອນ, ໄຮ່ນາ, ບາງກິດຈະການແຫຼ່ງທ່ອງທ່ຽວ, ໂຄງລ່າງພື້ນຖານ ແລະ ອື່ນໆ. ນອກຈາກນີ້, ການນຳແຂວງວຽງຈັນ ຍັງໄດ້ແຈ້ງໃຫ້ຊາບວ່າ: ປັດຈຸບັນ ທົ່ວແຂວງວຽງຈັນ ຖືກຜົນກະທົບຈາກໄພພິບັດນໍ້າຖ້ວມຄັ້ງນີ້ ຢູ່ 3ເມືອງ ຄື: ເມືອງໂພນໂຮງ ມີ3 ບ້ານ; ເມືອງເຟືອງ ມີ 7ບ້ານ ແລະ ເມືອງກາສີ ມີ 15ບ້ານ.
 |
ໃນໂອກາດດຽວກັນ, ທ່ານລັດຖະມົນຕີ, ຫົວໜ້າ ຫສນຍ ກໍໄດ້ມີຄຳເຫັນຕໍ່ພາກສ່ວນກ່ຽວຂ້ອງ ໃຫ້ຮີບຮ້ອນເອົາໃຈໃສ່ແກ້ໄຂບັນຫາ ເປັນຕົ້ນໄດ້ສະເໜີໃຫ້ການນຳຂອງແຂວງ ສືບຕໍ່ສົມທົບກັບພາກສ່ວນກ່ຽວຂ້ອງ ຮີບຮ້ອນໃຫ້ການຊ່ວຍເຫຼືອ ກໍລະນີສຸກເສີນຕ່າງໆ ຢ່າງວ່ອງໄວ ແລະ ທັນການ; ສືບຕໍ່ໃຫ້ການຊ່ວຍເຫືອປະຊາຊົນທີ່ຖືກຜົນກະທົບໃນຄັ້ງນີ້ ໃຫ້ທົ່ວເຖິງ; ຮີບຮ້ອນຟື້ນຟູຜົນກະທົບ ໂດຍສະເພາະໂຄງລ່າງພື້ນຖານ, ໄຮ່ນາ, ກິດຈະການຕ່າງໆ ໃຫ້ກັບຄືນສູ່ສະພາບປົກກະຕິໂດຍໄວ, ເສັ້ນທາງ ຕ້ອງຮັບປະກັນ ບໍ່ໃຫ້ຖືກຕັດຂາດ;ໃຫ້ບໍລິສັດເຂື່ອນໄຟຟ້ານໍ້າລີກ ເອົາໃຈໃສ່ໃນການບໍລິຫານຈັດການນ້ຳໃນເຂື່ອນໃຫ້ດີຂຶ້ນຕື່ມ ເພື່ອຮັບປະກັນທັງສອງດ້ານ (ບໍ່ໃຫ້ເຂື່ອນແຕກ ແລະ ບໍ່ໃຫ້ເກີດສະພາບນໍ້າຖ້ວມ ຕອນລຸ່ມຂອງເຂື່ອນ ເພີ່ມຕື່ມອີກ).
 |
ຫຼັງຈາກນັ້ນ, ທ່ານ ລັດຖະມົນຕີ, ຫົວໜ້າ ຫສນຍ ກໍໄດ້ລົງຕິດຕາມກວດກາເບິ່ງສະພາບນໍ້າຖ້ວມ ກໍຄືສະພາບຜົນເສຍຫາຍທີ່ເກີດຂຶ້ນ ຢູ່ພື້ນທີ່ຕົວຈິງ, ພ້ອມທັງມອບເງິນ ແລະ ເຄື່ອງຊ່ວຍເຫຼືອ ເປັນຕົ້ນ ເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ ໃຫ້ແກ່ປະຊາຊົນ ທີ່ຖືກຜົນກະທົບຈາກໄພພິບັດນໍ້າຖ້ວມໃນຄັ້ງນີ້,ຊຶ່ງຕາງໜ້າກ່າວຮັບ ແມ່ນທ່ານເລຂາພັກເມືອງໆເຟືອງ.
ໃນເວລາຕໍ່ມາ, ທ່ານລັດຖະມົນຕີຫົວໜ້າ ຫສນຍ ພ້ອມດ້ວຍຄະນະ ກໍໄດ້ສືບຕໍ່ເດີນທາງໄປເຮັດວຽກຮ່ວມກັບການນຳແຂວງວຽງຈັນ ທີ່ພະແນກແຮງງານ ແລະ ສະຫວັດດີການສັງຄົມແຂວງ, ຖືໂອກາດນີ້ທ່ານລັດຖະມົນຕີ, ຫົວໜ້າຫສນຍໄດ້ຕາງໜ້າໃຫ້ລັດຖະບານ ກໍຄືຄະນະກຳມະການຄຸ້ມຄອງໄພພິບັດຂັ້ນສູນກາງ ມອບເງິນ ແລະ ເຄື່ອງຊ່ວຍເຫຼືອການແກ້ໄຂໄພພິບັດນໍ້າຖ້ວມໃຫ້ແກ່ຄະນະກຳມະການຄຸ້ມຄອງໄພພິບັດແຂວງວຽງຈັນ ລວມມູນຄ່າທັງໝົດຈຳນວນ 354 ລ້ານກີບ ຕື່ມອີກ.
 |
(ຂ່າວ-ພາບ: ກົມປະຊາສຳພັນຫສນຍ)
ຄໍາເຫັນ