ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ໂຮງຮຽນມັດທະຍົມສົມບູນ ເມືອງດາກຈຶງ ແຂວງເຊກອງໃນວັນທີ 8 ກັນຍາຜ່ານມາໂດຍມີທ່ານຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານຮອງເຈົ້າແຂວງເຊກອງ ແລະພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານຂັນຕີສີລະວົງສາຮອງເຈົ້າແຂວງເຊກອງຜູ້ຊີ້ນຳວຽກງານເສດຖະກິດ ໄດ້ລາຍງານວ່າ: ແຂວງເຊກອງຕັ້ງຢູ່ພາກຕາເວັນອອກສ່ຽງໃຕ້ຂອງສປປລາວມີເນື້ອທີ່ທັງໝົດ 7.750 ຕາກິໂລແມັດ, ມີພົນລະເມືອງ 137.474 ຄົນ ຊຶ່ງມີຊາຍແດນຕິດກັບສສຫວຽດນາມຍາວ 280 ກມ; ປະກອບມີດ່ານທີ່ຕິດຈອດກັບບັນດາແຂວງຂອງສສຫວຽດນາມ: ດ່ານສາກົນ 1 ແຫ່ງ, ດ່ານທ້ອງຖິ່ນ 1 ແຫ່ງແລະດ່ານປະເພນີ 2 ແຫ່ງ.
ແຂວງເຊກອງມີການຮ່ວມມືກັບບັນດາແຂວງຂອງສສຫວຽດນາມ 9 ແຂວງຄື: ແຂວງກວາງນາມ, ນະຄອນດານັງ, ກອນຕູມ, ເທື່ອທຽນເຫວ້, ບິ່ງດິ້ງ, ຢາລາຍ, ດັກລັກ, ກວາງຈິແລະກວາງຫງາຍ ຊຶ່ງໃນແຕ່ລະປີໄດ້ຊ່ວຍເຫຼືອໃນການກໍ່ສ້າງຊັບພະຍາກອນມະນຸດລະດັບຊັ້ນສູງ, ປະລິນຍາຕີ, ປະລິນຍາໂທແລະປະລິນຍາເອກໃຫ້ແກ່ແຂວງເຊກອງມີທັງໝົດຈຳນວນ 560 ທຶນແລະທຶນຊ່ວຍເຫຼືອໃນການພັດທະນາພື້ນຖານໂຄງລ່າງທັງໝົດຈຳນວນ 83.973 ລ້ານດົງ. ພິເສດ: ໃນໄລຍະການແຜ່ລະບາດຂອງພະຍາດໂຄວິດ-19 ກໍໍໄດ້ຮັບການຊ່ວຍເຫຼືອເຄື່ອງອຸປະກອນການແພດເພື່ອສະກັດກັ້ນແລະປ້ອງກັນພະຍາດໂຄວິດ-19 ຈາກບັນດາແຂວງພາກກາງແລະພາກໃຕ້ ຂອງສສຫວຽດນາມລວມມີມູນຄ່າທັງໝົດ 2.905 ລ້ານດົງ.
ປັດຈຸບັນທົ່ວແຂວງເຊກອງມີໂຄງການລົງທຶນ FDI ທັງໝົດ 124 ໂຄງການ, ມີມູນຄ່າການລົງທຶນຕາມສັນຍາ 9.547 ລ້ານໂດລາ, ຄາດຄະເນການຈັດຕັ້ງປະຕິບັດຕົວຈິງປະມານ 3.239 ລ້ານໂດລາຫຼືປະມານ 35% ຂອງມູນຄ່າການລົງທຶນ FDI ທັງໝົດ, ສ່ວນໃຫຍ່ເປັນການລົງທຶນເອກະຊົນພາຍໃນ 79 ໂຄງການ, ມູນຄ່າການລົງທຶນ 2.059 ລ້ານໂດລາ, ກວມເອົາ 61,62%, ການລົງທຶນເອກະຊົນຕ່າງປະເທດ 45 ໂຄງການ, ມູນຄ່າການລົງທຶນ 1.311 ລ້ານໂດລາ, ກວມເອົາ 38,37%, ໃນນັ້ນໄດ້ມີການລົງທຶນຂອງຫວຽດນາມ 27 ໂຄງການ, ມູນຄ່າ 1.071 ລ້ານໂດລາກວມອັດຕາສ່ວນ 54%, ໄທ 7 ໂຄງການ, ມູນຄ່າ 329,7 ລ້ານໂດລາ, ກວມອັດຕາສ່ວນ 25%, ຈີນ 5 ໂຄງການ, ມູນຄ່າການລົງທຶນ 263 ລ້ານໂດລາ, ກວມອັດຕາສ່ວນ 20% ແລະປະເທດອື່ນໆອີກ 6 ໂຄງການມູນຄ່າ 11,4 ລ້ານ, ກວມອັດຕາສ່ວນ 1%, ໂຄງການທັງໝົດ.
ສຳລັບການລົງທຶນຂອງຂອງສສຫວຽດນາມໄລຍະຜ່ານມາ ມີ 27 ໂຄງການກວມອັດຕາສ່ວນ 54% ຂອງການລົງທຶນຕ່າງປະເທດ; ມີມູນຄ່າການລົງທຶນທັງໝົດ 1.071 ລ້ານໂດລາ, ໃນນັ້ນ, ຂັ້ນສູນກາງອະນຸຍາດ 11 ໂຄງການ, ມູນຄ່າການລົງທຶນ 1.043 ລ້ານໂດລາແລະຂັ້ນແຂວງອະນຸຍາດທັງໝົດ 14 ໂຄງການມູນຄ່າການລົງທຶນ 18 ລ້ານໂດລາ; ໃນນັ້ນຂົງເຂດພະລັງງານໄຟຟ້ານໍ້າຕົກມີ 3 ໂຄງການ; ຂົງເຂດບໍ່ແຮ່ 6 ໂຄງການ; ຂົງເຂດກະສິກໍາ 14 ໂຄງການແລະຂົງເຂດການບໍລິການ 2 ໂຄງການ.
ຜ່ານການຊຸກຍູ້, ຕິດຕາມແລະຕີລາຄາເຫັນວ່າການລົງທຶນຂອງພາກສ່ວນເອກະຊົນຈາກສສຫວຽດນາມໂດຍລວມແມ່ນໄດ້ປະກອບສ່ວນສ້າງໃຫ້ເສດຖະກິດ-ສັງຄົມຂອງແຂວງເຊກອງມີການຂະຫຍາຍຕົວ,ສ້າງວຽກເຮັດງານທໍາໃຫ້ປະຊາຊົນຖືເປັນກໍາລັງແຮງດ້ານການຜະລິດເພື່ອການສົ່ງອອກທີ່ສໍາຄັນເປັນຕົ້ນແມ່ນດ້ານແຮ່ທາດ, ພະລັງງານ, ຢາງພາລາ, ກາເຟແລະອື່ນໆ. ໃນນັ້ນຫົວໜ່ວຍທຸລະກິດຈາກສສຫວຽດນາມຍັງໄດ້ປະກອບສ່ວນໃນການສ້າງສີມືແຮງງານ, ນໍາເອົາແຫຼ່ງທຶນຕ່າງໆສຸມໃສ່ໃນການດໍາເນີນໂຄງການຂະໜາດໃຫຍ່ຈໍານວນໜຶ່ງເປັນຕົ້ນ: ໂຄງການກໍ່ສ້າງໄຟຟ້າຄວາມຮ້ອນຖ່ານຫີນເຊກອງກະລຶມ 1.800 ເມກາວັດແລະໂຄງການຊື້-ຂາຍຖ່ານຫີນ, ໂຄງການຂຸດຄົ້ນແລະປຸງແຕ່ງບົກຊິດ, ໂຄງການເຂື່ອນໄຟຟ້ານໍ້າຕົກເຊຂະໝານ 3, ໂຄງການປູກຢາງພາລາ, ໂຄງການປູກແລະປຸງແຕ່ງກາເຟ, ໂຄງການປູກໝາກຖົ່ວລຽນ.
ໃນໂອກາດທີ່ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ທີ່ໂຮງຮຽນມັດທະຍົມສົມບູນ ເມືອງດາກຈຶງ ທ່ານ ຫງວຽນຈີ້ຢຸ້ງໄດ້ມອບເງິນສົດ ຈຳນວນ 10.000 ໂດລາ ໃຫ້ແຂວງເຊກອງ ແລະ ມອບໃຫ້ໂຮງຮຽນມັດທະຍົມສົມບູນ ເມືອງດາກຈຶງ ຈຳນວນ 5.000 ໂດລາ ເພື່ອປະກອບສ່ວນເຂົ້າໃນພັດທະນາຂອງແຂວງ, ການບຳລຸງປັບປຸງໂຮງຮຽນ. ພ້ອມນັ້ນ ກໍໍຍັງໄດ້ມອບເຄື່ອງກອງນໍ້າສະອາດ ໃຫ້ໂຮງຮຽນ ຈຳນວນ 8 ເຄື່ອງ ແລະ ມອບໃຫ້ເມືອງດາກຈຶງ ຈຳນວນ 2 ເຄື່ອງ.
ຄໍາເຫັນ