 |
ໃນໂອກາດນີ້, ທ່ານ ວັນຄໍາເກັ່ງ ຢ່າຊົງກົວ ໄດ້ລາຍງານການຈັດຕັ້ງປະຕິບັດວຽກງານແຮງງານ ແລະ ສະຫວັດດີການສັງຄົມ ໃນໄລຍະ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍປີ 2025. ໃນໄລຍະຜ່ານມາ ໄດ້ສົ່ງເສີມການພັດທະນາສີມືແຮງງານໄດ້ຈໍານວນ 169 ຄົນ ຍິງ 67 ຄົນ, ຂຶ້ນທະບຽນອອກບັດ ແລະ ຕໍ່ບັດອະນຸຍາດໃຫ້ແຮງງານຕ່າງປະເທດໄດ້ທັງໝົດ 877 ຄົນ ຍິງ 7 ຄົນ, ໄດ້ມີການສະເໜີຜ່ານໂກ່ຕ່ານຳໃຊ້ແຮງງານຕ່າງປະເທດ, ການຂຶ້ນທະບຽນຜູ້ວ່າງງານສຳລັບສະມາຊິກປະກັນສັງຄົມ, ຊຸກຍູ້ສົ່ງເສີມການຈັດຫາວຽກເຮັດງານທຳ, ລົງກວດກາແຮງງານປົກກະຕິ ແລະ ຕິດຕາມຜົນການຈັດຕັ້ງປະຕິບັດກົດໝາຍວ່າດ້ວຍແຮງງານ, ໂຄສະນາປະຊາສຳພັນໃຫ້ກັບບັນດາອົງການຈັດຕັ້ງຂອງລັດ, ຫົວໜ່ວຍແຮງງານ, ເປົ້າໝາຍສະໝັກໃຈ, ຈັດລຽງບຸລິມະສິດສະເໜີຂໍຮັບນະໂຍບາຍອຸດໜູນເທື່ອດຽວຍັງມີຊີວິດ, ໄດ້ເກີດມີອຸທົກກະໄພຕ່າງໆທັງໝົດ 7 ຄັ້ງ, ອັກຄີໄພ 2 ຄັ້ງ, ລົມພາຍຸ-ໝາກເຫັບຕົກ 5 ຄັ້ງ, ໄດ້ຮັບຜົນກະທົບ 55 ບ້ານ, 1,787 ຄອບຄົວ, ເສຍຊີວິດ 5 ຄົນ ຍິງ 4 ຄົນ, ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນ, ສຸມໃສ່ການເຊື່ອມຊຶມແນວທາງນະໂຍບາຍຂອງພັກ, ກົດໝາຍ, ລະບຽບການຂອງລັດ, ປັບປຸງກົນໄກການບໍລິຫານແຮງງານ ແລະ ສະຫວັດດີການສັງຄົມ ຕາມທິດຄຸ້ມຄອງດ້ວຍກົດໝາຍ, ສ້າງຄວາມເຂັ້ມແຂງໃຫ້ເຈົ້າໜ້າທີ່ກວດກາແຮງງານ ແລະ ອົງການສາມຝ່າຍ ເພື່ອປົກປ້ອງສິດຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານ ໃຫ້ມີປະສິດທິຜົນດີຂຶ້ນກວ່າເກົ່າ. ພ້ອມດຽວກັນນັ້ນ ຜູ້ເຂົ້າຮ່ວມໄດ້ປະກອບຄຳຄິດ-ຄຳເຫັນ ເພື່ອເປັນການແລກປ່ຽນບົດຮຽນ ແລະ ນຳໄປຈັດຕັ້ງປະຕິບັດເຂົ້າໃນວຽກງານຕົວຈິງ.
ທ່ານ ໂພໄຊ ໄຊຍະສອນ ໄດ້ເນັ້ນໜັກບາງຈຸດທີ່ຈະຕ້ອງໄດ້ເພີ່ມທະວີການຈັດຕັ້ງປະຕິບັດໃນຕໍ່ໜ້າ ໂດຍສຸມໃສ່ແກ້ໄຂບັນຫາຕົວຈິງໃນການພັດທະນາ ໃຫ້ແທດເໝາະ ແລະ ຖືກຕ້ອງກັບສະພາບຄວາມເປັນຈິງ ໄປຄຽງຄູ່ກັບການຊຸກຍູ້ ສົ່ງເສີມການພັດທະນາສີມືແຮງງານ ໃຫ້ສອດຄ່ອງກັບຄວາມຕ້ອງການຂອງຕະຫລາດແຮງງານ, ພ້ອມທັງໂຄສະນາເຜີຍແຜ່ຂໍ້ມູນຂ່າວສານຕະຫລາດແຮງງານ ເພື່ອສາມາດດັດສົມຄວາມຕ້ອງການ ແລະ ສະໜອງກຳລັງແຮງງານ ໃຫ້ມີບາດກ້າວຂະຫຍາຍຕົວດີຂຶ້ນເທື່ອລະກ້າວ.
(ຂ່າວ: ສີລິພອນ ສົງຄຳ)
ຄໍາເຫັນ