ພາກສ່ວນຕ່າງໆ ທີ່ຢູ່ເຂດພື້ນທີ່ຕ່ຳ ໄດ້ກຽມຄວາມພ້ອມຮັບມື ເປັນຕົ້ນ ທະນາຄານການຄ້າຕ່າງປະເທດ ແລະ ໂຮງໝໍມະໂຫສົດ ໄດ້ນຳເອົາເປົາຊາຍ ມາເຮັດເປັນຄູກັ້ນໄວ້ ເພື່ອບໍ່ໃຫ້ໄຫຼເຂົ້າສຳນັກງານ. ສ່ວນຢູ່ເຂດອື່ນໆ ທີ່ຢູ່ລຽບແຄມນໍ້າຂອງ, ກໍໄດ້ມີການກຽມຄວາມພ້ອມຂັ້ນສູງສຸດ ເພື່ອຮັບມືກັບສະພາບນໍ້າຖ້ວມ ເຊັ່ນດຽວກັນ ແລະ ບາງເຂດນໍ້າກໍໄດ້ໄຫຼເຂົ້າຖ້ວມບ້ານເຮືອນຂອງປະຊາຊົນແລ້ວ.
ກົມອຸຕຸນິຍົມອຸທົກກະສາດ ລາຍງານວ່າ: ໃນວັນທີ 13 ກັນຍາ ນີ້ ລະດັບນ້ຳຂອງ ເຂດຫຼັກ 4 ນະຄອນ ຫຼວງວຽງຈັນ ເພີ່ມຂຶ້ນເກີນລະດັບອັນຕະລາຍແລ້ວ ໂດຍລະດັບນ້ຳເພີ່ມຂຶ້ນ 12,57 ແມັດ (ລະດັບເຕືອນໄພ 11,50 ແມັດ, ລະດັບອັນຕະລາຍ 12,50 ແມັດ).
ດັ່ງນັ້ນ ຈິ່ງແຈ້ງເຕືອນໃຫ້ປະຊາຊົນບັນດາເຜົ່າ ແລະ ອົງການປົກຄອງທຸກພາກສ່ວນ ໂດຍສະເພາະເຂດທີ່ຢູ່ພື້ນທີ່ລຽບຕາມແຄມແມ່ນໍ້າຂອງ ກຽມຄວາມພ້ອມຍົກຍ້າຍວັດຖຸສິ່ງຂອງ ທີ່ມີຄ່າ ແລະ ສັດລ້ຽງ ໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມຂ່າວພະຍາກອນອາກາດ ຈາກ ກົມອຸຕຸນິຍົມອຸທົກກະສາດ ຢ່າງຕໍ່ເນື່ອງ.
ຄໍາເຫັນ