ໃນວັນທີ 19 ມັງກອນນີ້ທີ່ສະໂມສອນກອງບັນຊາການທະຫານເມືອງຫຼວງນໍ້າທາການນຳເມືອງແລະບັນດາຫ້ອງການອ້ອມຂ້າງເມືອງໄດ້ເຂົ້າອວຍພອນນາຍແລະພົນທະຫານເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 75 (20 ມັງກອນ 1949-20 ມັງກອນ 2024) ນໍາໂດຍທ່ານບຸນຄົງພິມມະສອນປະທານກວດກາພັກຫົວໜ້າອົງການກວດກາລັດເມືອງພ້ອມດ້ວຍຄະນະ, ໂດຍການໃຫ້ກຽດຕ້ອນຮັບຂອງທ່ານພັທທອງແກ້ວສາຍມຸງຄຸນຫົວໜ້າການທະຫານກອງບັນຊາການທະຫານເມືອງ, ທ່ານພັທວອນມະນີເຈື້ອຫຼວງຄໍາມີຫົວໜ້າການເມືອງກອງບັນຊາທະຫານເມືອງພ້ອມດ້ວຍຄະນະ.
ໂອກາດນີ້,ທ່ານບຸນຄົງພິມມະສອນກ່າວວ່າ:ຕະຫຼອດໄລຍະ 75 ປີຜ່ານມາ,ກອງທັບປະຊາຊົນລາວໄດ້ເຮັດສໍາເລັດພາລະກິດອັນຍິ່ງໃຫຍ່ແລະໜັກໜ່ວງທີ່ປະເທດຊາດແລະປະຊາຊົນມອບໝາຍໃຫ້ຢ່າງສະຫງ່າງາມສົມແລ້ວເປັນກອງທັບວິລະຊົນ, ຊາດລາວວິລະຊົນຊຶ່ງໄດ້ຮັບການຍ້ອງຍໍສັນລະເສີນຈາກພັກແລະລັດ, ເດັດດ່ຽວຜ່ານຜ່າອຸປະສັກຕີເອົາຊະນະສັດຕູເຮັດສໍາເລັດໜ້າທີ່ສົມເປັນກໍາລັງແກ່ນສານທີ່ເຂັ້ມແຂງຂອງການປະຕິວັດເປັນເຄື່ອງມືອັນແຫຼມຄົມຂອງພັກ, ກອງທັບປະຊາຊົນລາວຄືປາກັບນໍ້າຊຶ່ງເປັນປັດໄຈສໍາຄັນກວ່າໝູ່ໃນພາລະກິດຕໍ່ສູ້ຂອງກອງທັບເຮົາໂດຍແມ່ນປະຊາຊົນເປັນກໍາລັງໜູນຊ່ວຍຢ່າງໜັກແໜ້ນເພື່ອຕໍ່ສູ້ປ້ອງກັນ ປະເທດຊາດໄວ້ຢ່າງໝັ້ນຄົງ, ເສີມຂະຫຍາຍມູນເຊື້ອຄວາມສາມັກຄີເປັນປຶກແຜ່ນລະຫວ່າງກອງທັບກັບປະຊາຊົນ.
ການເຂົ້າອວຍພອນຄັ້ງນີ້,ເພື່ອເປັນການໃຫ້ກຳລັງໃຈນາຍແລະພົນທະຫານທີ່ປະຕິບັດໜ້າທີ່ຢູ່ແນວໜ້າ, ໃນເຂດທຸລະກັນດານ, ເຮັດໜ້າທີ່ປົກປັກຮັກສາເຂດນ້ຳແດນດິນ ຜືນແຜ່ນດິນອັນອົບຖ້ວນຂອງປວງຊົນລາວທັງຊາດເຮັດໃຫ້ປະຊາຊົນບັນດາເຜົ່າມີຄວາມສະດວກສະບາຍໃນການທໍາມາຫາກິນ, ຄ້າຂາຍແລະການພັດທະນາທາງດ້ານເສດທະກິດ-ສັງຄົມ.ເວົ້າລວມ, ເວົ້າສະເພາະເມືອງຫຼວງນໍ້າທາໃຫ້ເຕີບໃຫຍ່ເຂັ້ມແຂງເປັນກ້າວໆ.
ຂ່າວ-ພາບ: ຫຼວງນໍ້າທາ
ຄໍາເຫັນ