ຫຼາຍວຽກງານຈຸດສຸມ ສ້າງການຫັນປ່ຽນວຽກງານສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ

ທ່ານ ຄໍາມອນ ຈັນທະຈິດ ກໍາມະການສໍາຮອງສູນກາງພັກ ຮອງຫົວໜ້າ ຄອສພ ຮອງປະທານສະພາທິດສະດີສູນກາງພັກ ຂຶ້ນຜ່ານຮ່າງມະຕິກົມການເມືອງສູນກາງພັກ ກ່ຽວກັບການເພີ່ມທະວີການນໍາພາຂອງພັກ ແລະ ການຄຸ້ມຂອງລັດ ຕໍ່ວຽກງານສື່ມວນຊົນໃນໄລຍະໃໝ່ ຕໍ່ກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I ໃນວັນທີ 14 ກໍລະກົດນີ້, ທີ່ຫໍປະຊຸມແຫ່ງຊາດ ວ່າ: 1). ຕ້ອງສ້າງການບຸກທະລຸໃໝ່ທາງດ້ານຈິນຕະນາການໃຫ້ສື່ມວນຊົນລາວໄດ້ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ, ສື່ມວນຊົນລາວແມ່ນສື່ມວນຊົນປະຕິວັດ, ສື່ມວນຊົນຂອງພັກ, ສື່ມວນຊົນທີ່ຮັບໃຊ້ປະຊາຊົນ ຕ້ອງໄດ້ປັບປຸງຕົນເອງ, ຫັນປ່ຽນຕົນເອງ, ຫັນປ່ຽນທາງດ້ານຄວາມຄິດ, ວິໄສທັດ, ຫັນປ່ຽນທັງແບບແຜນວິທີເຮັດວຽກ, ສ້າງແຜນ, ສ້າງມາດຕະຖານໃຫ້ຕົນເອງໃໝ່, ພັດທະນາຕົນເອງໃຫ້ມີຄວາມຮູ້, ຄວາມສາມາດສະຕິປັນຍາ, ມີຫົວຄິດປະດິດສ້າງ, ມີຄວາມວ່ອງໄວ, ມີທັດສະນະຫຼັກໝັ້ນການເມືອງໜັກແໜ້ນ, ມີຈັນຍາບັນ, ຈັນຍາທຳ, ມີຈິດໃຈເອກະລາດເປັນເຈົ້າຕົນເອງ, ຕັ້ງໜ້າປະຕິບັດໜ້າທີ່ການເມືອງທີ່ຮັບມອບໝາຍໃຫ້ບັນລຸປະສິດທິ ພາບ ແລະ ປະສິດທິຜົນສູງ; 2). ສືບຕໍ່ປັບປຸງອົງການຈັດຕັ້ງ, ສັບຊ້ອນ ແລະ ຈັດວາງພະນັກງານໃຫ້ເປັນລະບົບ ແຕ່ສູນກາງລົງຮອດທ້ອງຖິ່ນ ຕິດພັນກັບການປັບປຸງພາລະບົດບາດ, ລະບອບລະບຽບການ ແລະ ກົນໄກ ການເຄື່ອນໄຫວວຽກງານສື່ມວນຊົນໃຫ້ທັນສະໄໝ, ວ່ອງໄວ, ທັນການ, ສ້າງການຫັນປ່ຽນໃນວຽກງານສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ. ສຸມໃສ່ພັດທະນາບຸກຄະລາກອນສື່ມວນຊົນ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ໂດຍສະເພາະແມ່ນພະ ນັກງານເຕັກນິກ, ນັກຂ່າວ, ນັກຂຽນ, ນັກໜັງສືພິມ, ນັກບັນນາທິການ, ໂຄສົກລາຍການວິທະຍຸ ແລະ ໂທລະພາບ ລວມທັງພະນັກງານນໍາພາ-ຄຸ້ມຄອງໃຫ້ພຽງພໍທາງດ້ານປະລິມານ ແລະ ຄຸນນະພາບ ແລະ ມີຄວາມເປັນມືອາຊີບ, ສົ່ງໄປກໍ່ສ້າງບຳລຸງໃນແຕ່ລະໄລຍະທັງພາຍໃນ ແລະ ຕ່າງປະເທດ. ພ້ອມກັນນັ້ນ, ຕ້ອງມີແຜນຈັດຝຶກອົບຮົມຫົວຂໍ້ສະເພາະລັບນັກຂ່າວ ໄປຄວບຄູ່ກັບຝຶກອົບຮົມດ້ານທິດສະດີການເມືອງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ການພົວພັນສາກົນອື່ນໆ ໃຫ້ຖັນແຖວພະນັກງານສື່ມວນຊົນໄດ້ຮັບຮູ້, ເຂົ້າໃຈ ແລະ ເຊື່ອມຊຶມ, ກຳໄດ້ບັນຫາຂອງຍຸກສະໄໝ ເພື່ອມີໄຫວພິບໃນການເຄື່ອນໄຫວປະຕິບັດໜ້າທີ່ການເມືອງຂອງຕົນ. ສ້າງກົນໄກການສະໜອງຂໍ້ມູນຂ່າວສານທາງການທີ່ໂປ່ງໃສ, ຖືກຕ້ອງ ແລະ ວ່ອງໄວ ເພື່ອເປັນເຈົ້າການບຸກກ່ອນ ໃນການນໍາພາຫາງສຽງສັງຄົມ, ບໍ່ປ່ອຍໃຫ້ເກີດຊ່ອງວ່າງທາງຂໍ້ມູນຂ່າວສານ ໃຫ້ກຸ່ມຄົນບໍ່ດີສວຍໃຊ້ບິດເບືອນ, ຕັ້ງໜ້າຕ້ານສົງຄາມຈິດຕະສາດການຫັນປ່ຽນໂດຍສັນຕິຂອງຄົນບໍ່ດີໄດ້ຢ່າງມີປະສິດທິຜົນ ແລະ ທັນການ; 3). ຍົກສູງຄວາມເປັນເຈົ້າການສື່ມວນຊົນຂອງລັດດ້ວຍການປັບປຸງແບບແຜນ, ວິທີການເກັບກຳຂ່າວ, ການຂຽນຂ່າວ, ການອອກຂ່າວໃຫ້ມີເນື້ອຫາສາລະທີ່ອຸດົມສົມບູນ, ຫຼາກຫຼາຍ, ຫຼາຍຮູບ, ຫຼາຍສີ ທີ່ສາມາດດຶງດູດເອົາຄວາມສົນໃຈຂອງຜູ້ອ່ານ, ຜູ້ເບິ່ງ, ຜູ້ຟັງໃຫ້ສັງຄົມມີຄວາມນິຍົມຊົມຊອບຫຼາຍກວ່າເກົ່າ. ປັບປຸງໂຄງປະກອບເນື້ອໃນບັນ ດາຂ່າວ, ບົດໃນໜ້າໜັງສືພິມ, ວາລະສານ, ວິທະຍຸ ແລະ ໂທລະພາບໃຫ້ມີຄວາມອຸດົມສົມບູນ, ສ້າງສັນ ແລະ ມີລັກສະນະຮອບດ້ານ, ສາມາດສ່ອງແສງສະພາບຄວາມເປັນຈິງຂອງຊີວິດ-ສັງຄົມຢ່າງກວ້າງຂວາງ ແລະ ມີຊີວິດຊີວາ. ເອົາໃຈໃສ່ປັບປຸງກົນໄກຄຸ້ມຄອງການເຄື່ອນໄຫວຂອງສື່ມວນຊົນທຸກພາກສ່ວນທັງສູນກາງ ແລະ ທ້ອງຖິ່ນ, ເອກະຊົນ, ບຸກຄົນ ແລະ ສື່ມວນຊົນຕ່າງປະເທດທີ່ມາເຄື່ອນໄຫວຢູ່ ສປປ ລາວ ໃຫ້ມີຄວາມເຂັ້ມງວດ ແລະ ເດັດຂາດ. ໃນຕໍ່ໜ້ານີ້, ແມ່ນເລັ່ງລັດປັບປຸງກົດໝາຍວ່າດ້ວຍສື່ມວນຊົນ ຕິດພັນກັບການສ້າງ, ປັບປຸງ ແລະ ຫັນນິຕິກຳໃນຂົງເຂດສື່ມວນຊົນໃຫ້ກາຍເປັນຂໍ້ກຳນົດ, ລະບຽບການ ແລະ ມາດຕະການລະອຽດໃນການຄຸ້ມຄອງຂໍ້ມູນ-ຂ່າວສານ, ຄຸ້ມຄອງການເຄື່ອນໄຫວຂອງສື່ມວນຊົນໃຫ້ຖືກຕ້ອງຕາມກົດໝາຍ. ຕັ້ງໜ້າຈຳກັດ, ແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນວົງການສື່ມວນຊົນໃຫ້ໄດ້ຢ່າງເຂັ້ມງວດ, ຮັບປະກັນໃຫ້ປະເທດຊາດພວກເຮົາມີສະຖຽນລະພາບ, ມີຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມໄດ້ຢ່າງໜັກແໜ້ນ; 4). ເອົາໃຈໃສ່ປັບປຸງ ແລະ ກໍ່ສ້າງພື້ນຖານໂຄງລ່າງວັດຖຸ-ເຕັກນິກ, ອຸປະກອນ, ຫັນເປັນດີຈີຕອນ ແລະ ການນໍາໃຊ້ເຕັກໂນໂລຊີບັນຍາປະດິດ (AI) ເຄືອຂ່າຍສື່ສານ 5G ແລະ ຖານຂໍ້ມູນຂະໜາດໃຫຍ່ໃຫ້ມີຄວາມຮັບປະກັນ. ປັບປຸງ ແລະ ກໍ່ສ້າງພື້ນຖານໂຄງລ່າງ, ວັດຖຸ-ເຕັກນິກສື່ມວນຊົນໃຫ້ມີຄວາມເຂັ້ມແຂງ, ມີຄຸນນະພາບ ແລະ ທັນສະໄໝ ດ້ວຍການຈັດສັນງົບປະມານເຂົ້າໃນການພັດທະນາວຽກງານສື່ມວນຊົນໃຫ້ຫຼາຍກວ່າເກົ່າ. ປະກອບອຸປະກອນ, ພາຫະ ນະທີ່ຈຳເປັນ, ຄຸ້ມຄອງນໍາໃຊ້ໃຫ້ກຸ້ມຄ່າ ແລະ ເກີດປະໂຫຍດສູງສຸດຕໍ່ສ່ວນລວມ; ພັດທະນາສື່ໃຫ້ຕອບສະໜອງກັບເງື່ອນໄຂແຫ່ງການພັດທະນາເສດຖະກິດດີຈີຕອນ, ສັງຄົມດີຈີຕອນ ແລະ ລັດຖະບານດີຈີຕອນ. 5). ຍົກສູງຈິດໃຈເອກະລາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ ດ້ວຍການຕັ້ງໜ້າປັບປຸງ, ສ້າງເງື່ອນໄຂອຳນວຍໃຫ້ສື່ມວນຊົນລາວ ສາມາດເຄື່ອນໄຫວໄປຕາມກົນໄກເສດຖະກິດຕະຫຼາດຢ່າງສົມເຫດສົມຜົນ ແນໃສ່ສ້າງລາຍຮັບທາງດ້ານວິຊາການ ເພື່ອມີທຶນຮອນ ໃນການພັດທະນາວຽກງານສື່ມວນຊົນ ແລະ ແບ່ງເບົາການໃຊ້ຈ່າຍງົບປະມານຂອງລັດ. ຫັນວຽກງານສື່ມວນຊົນ ໄປສູ່ການໄລ່ລຽງຊ່ວຍໜູນດ້ານງົບປະມານເທົ່າທີ່ສາມາດເຮັດໄດ້ ເພື່ອຫຼຸດຜ່ອນພາລະຂອງລັດ ແຕ່ກໍບໍ່ໃຫ້ອົງການສື່ມວນຊົນເຮັດໜ້າທີ່ໜັກໄປທາງທຸລະກິດ ແລະ ການຫາລາຍຮັບອັນຈະເຮັດໃຫ້ບົດບາດຫຼັກທາງດ້ານການເມືອງ-ແນວຄິດ, ລັກສະນະສຶກສາອົບຮົມ ແລະ ລັກສະນະຕໍ່ສູ້ຖືກຈືດຈາງລົງ ຫຼື ເຄື່ອນໄຫວບໍ່ຖືກຕ້ອງຕາມຈຸດປະສົງ ແລະ ເປົ້າໝາຍຮັບໃຊ້ທາງການເມືອງຂອງພັກ-ລັດ; 6). ເພີ່ມທະວີການພົວພັນຮ່ວມມືກັບບັນດາປະເທດເພື່ອນມິດຍຸດທະສາດ, ພາກພື້ນ ແລະ ສາກົນ ເພື່ອຍາດແຍ່ງເອົາບົດຮຽນ, ປະສົບການ ແລະ ການຊ່ວຍເຫຼືອທາງດ້ານວັດຖຸ, ອຸປະກອນ, ເຕັກນິກ, ວິຊາການ-ວິຊາສະເພາະ ຕິດພັນກັບການປຸກລະດົມທົ່ວສັງຄົມ ເຂົ້າຮ່ວມໃນການພັດທະນາວຽກງານສື່ມວນຊົນໃຫ້ມີຄວາມກ້າວໜ້າ, ທັນສະໄໝຂຶ້ນ ທຽບທັນກັບບັນດາປະເທດໃກ້ຄຽງ, ພາກພື້ນ ແລະ ໃນໂລກ; 7). ຄົ້ນຄວ້າວາງກົນໄກ ແລະ ມາດຕະການທີ່ເໝາະສົມໃນການຕິດຕາມ, ກວດກາ ແລະ ຈັດລະບຽບການເຄື່ອນໄຫວຂອງຜູ້ສ້າງອິດທິພົນທາງສັງຄົມ ແລະ ບຸກຄົນທີ່ສະໜອງຂໍ້ມູນຂ່າວສານຜ່ານແພັລດຟອມ, ທຳລາຍວັດທະນະທຳອັນດີງາມ ແລະ ຄວາມໝັ້ນຄົງຂອງຊາດໃຫ້ມີຄວາມຮັບຜິດຊອບສູງຕໍ່ກົດໝາຍ.