ເລຂາພັກແຂວງຄຳມ່ວນ ລົງກວດກາສະຖານທີ່ ສ້າງ “ແລນມາກໃໝ່” ຂອງເມືອງທ່າແຂກ

ໃນໂອກາດດັ່ງກ່າວ ທ່ານ ໄຊຊະນະ ໂຄດພູທອນ ໄດ້ເນັ້ນໃຫ້ການພັດທະນາໂຄງການຕ້ອງຄຳນຶງເຖິງຄວາມງາມດ້ານພູມີທັດ, ການອະນຸລັກສິ່ງແວດລ້ອມ, ຄວາມປອດໄພ ແລະ ເກີດປະໂຫຍດສູງສຸດຕໍ່ປະຊາຊົນ. ພ້ອມທັງໄດ້ມອບໝາຍໃຫ້ພາກສ່ວນກ່ຽວຂ້ອງ ສຳຫຼວດ, ອອກແບບ, ຄິດໄລ່ງົບປະມານ ແລະ ປະເມີນຜົນກະທົບດ້ານສັງຄົມ-ສິ່ງແວດລ້ອມ ຢ່າງລະອຽດກ່ອນສະເໜີດຳເນີນການຕາມແຜນ.

ຈາກນັ້ນ ຄະນະໄດ້ລົງກວດກາຈຸດກໍ່ສ້າງພັກຜ່ອນແຫ່ງທີ 2, ໃນໂຄງການປັບປຸງ ແລະ ບູລະນະສວນອານຸສາວະລີ ປະທານ ໄກສອນ ພົມວິຫານ ບໍລິເວນສີ່ແຍກໄຟແດງ ບ້ານໂພນສະອາດ ເຊິ່ງເປັນສະຖານທີ່ສຳຄັນຂອງແຂວງ. ທ່ານ ເລຂາພັກແຂວງ ໄດ້ຊີ້ນຳໃຫ້ການບູລະນະສວນອານຸສາວະລີ ປະທານ ໄກສອນ ພົມວິຫານ ດຳເນີນໄປຢ່າງມີຄຸນນະພາບ ໂດຍເນັ້ນການຈັດພູມີທັດໃຫ້ສວຍງາມ, ສ້າງພື້ນທີ່ພັກຜ່ອນສາທາລະນະ ແລະ ສິ່ງອຳນວຍຄວາມສະດວກໃຫ້ປະຊາຊົນ ແລະ ນັກທ່ອງທ່ຽວ. ພ້ອມກັນນັ້ນໄດ້ກໍານົດເປົ້າໝາຍໃຫ້ສວນອານຸສາວະລີແຫ່ງນີ້ ກາຍເປັນສວນສາທາລະນະທີ່ທັນສະໄໝ ແລະ ເປັນຈຸດເດັ່ນດ້ານພູມີທັດຂອງເມືອງທ່າແຂກ ອັນຈະຊ່ວຍດຶງດູດນັກທ່ອງທ່ຽວ, ກະຕຸ້ນເສດຖະກິດທ້ອງຖິ່ນ ແລະ ຍົກລະດັບພາບລັກຂອງເມືອງທ່າແຂກໃຫ້ພົ້ນເດັ່ນຍິ່ງຂຶ້ນໃນອະນາຄົດ.

ຂ່າວ : ມະນີວັນ