ແລກປ່ຽນຄຳເຫັນໃສ່ຮ່າງ ແຜນພັດທະນາອຸດສາຫະກໍາ-ການຄ້າ

ໃນວັນທີ 17 ມີນານີ້ໂດຍການເປັນປະທານຂອງ ທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ມີຫົວໜ້າຫ້ອງການ, ຫົວໜ້າກົມ, ສໍານັກງານ, ສະຖາບັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ການສໍາມະນາໃນຄັ້ງນີ້, ຈັດຂຶ້ນເພື່ອເນັ້ນໃສ່ປຶກສາຫາລື ແລະ ແລກປ່ຽນຄຳຄິດເຫັນທາງດ້ານວິຊາການ ເພື່ອເປັນທິດທາງໃນການສືບຕໍ່ປັບປຸງແຜນພັດທະນາທັງ 2 ຮ່າງແຜນພັດທະນາດັ່ງກ່າວ ແລະ ຄຳແນະນຳຈາກຊ່ຽວຊານຈາກສເກົາຫຼີ ເພື່ອນຳເອົາຄວາມຮູ້ມານຳໃຊ້ເຂົ້າໃນການສືບຕໍ່ປັບປຸງແຜນພັດທະນາຂະແໜງອຸດສາຫະກຳ ແລະ ການຄ້າ ກໍຄື ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 10 ເພື່ອເຮັດໃຫ້ ຮ່າງແຜນພັດທະນາອຸດສາຫະກຳ ແລະ ການຄ້າ 5 ປີ (2026-2030) ແລະ ຮ່າງແຜນພັດທະນາຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ 5 ປີ (2026-2030) ທີ່ໄດ້ກໍານົດວິໄສທັດ, ທິດທາງລວມ, ໂຕເລກຄາດໝາຍສູ້ຊົນ, ເປົ້າໝາຍ, ຄາດໝາຍ, ຕົວຊີ້ບອກ, ແຜນວຽກຈຸດສຸມ ແລະ ໂຄງການທີ່ຈະມີແຜນຈັດຕັ້ງປະຕິບັດໃນໄລຍະ ປີ 2026-2030 ທີ່ຕົນຮັບຜິດຊອບ.

ການກະກຽມຄົ້ນຄວ້າສ້າງແຜນພັດທະນາ 2 ຮ່າງແຜນພັດທະນາຄັ້ງນີ້, ຖືເປັນວຽກບຸລິມະສິດໜຶ່ງທີ່ສຳຄັນຫຼາຍ ຂອງກະຊວງອຸດສາຫະກຳ ແລະ ການຄ້າ ເພື່ອໃຫ້ສາມາດກໍານົດໄດ້ກ່ຽວກັບວິໄສທັດ, ເສັ້ນທາງເດີນ, ຄວາມມຸ່ງຫວັງ, ທິດທາງ, ເປົ້າໝາຍ ແລະ ຈຸດສຸມສໍາຄັນ ທີ່ຈະຕ້ອງການໃຫ້ບັນລຸຜົນສໍາເລັດໃນອີກ 5 ປີຕໍ່ໜ້າ ຕາມການມອບໝາຍຂອງພັກ ແລະ ລັດຖະບານ ໃນຄວາມຮັບຜິດຊອບຂອງຂະແໜງອຸດສາຫະກໍາ ແລະ ການຄ້າ, ພ້ອມທັງຮັບປະກັນໃຫ້ເຊື່ອມສານ-ເຊື່ອມຈອດກັບແຜນພັດທະນາເສດຖະກິດ-ສັງຄົມຫ່ງຊາດ 5 ປີ ຄັ້ງທີ X (2026-2030).

(ຂໍ້ມູນ: ກະຊວງອຸດສາຫະກຳ ແລະ ການຄ້າ)