 |
ທ່ານ ສົມຈິດ ສຸລິຍະເຕັນ ເລຂາໜ່ວຍພັກ ນາຍບ້ານນາໄຊນ້ອຍໄດ້ລາຍງານວ່າ: ເສັ້ນທາງດັ່ງກ່າວ ເປັນເສັ້ນທາງດິນແດງ, ໄລຍະຜ່ານມາ ໄດ້ພະຍາຍາມບູລະນະສ້ອມແປງເສັ້ນທາງ ໃນຈຸດຕ່າງໆທີ່ເປ່ເພ ເປັນຕົ້ນ: ເອົາດິນຖົມຫຼາຍຄັ້ງ ເພື່ອແກ້ໄຂໃຫ້ສາມາດໄປມາໄດ້ຢ່າງສະດວກ ມູນຄ່າສ້ອມແປງຫຼາຍກວ່າ 90 ລ້ານກີບ, ພຽງໄລຍະເວລາສັ້ນໆ ກໍເປ່ເພຄືນ ໂດຍສະເພາະໄລຍະລະດູຝົນ ມີນ້ຳຂັງ, ເປັນຂຸມ ແລະ ລະດູແລ້ງ ມີຂີ້ຝຸ່ນໄງ່. ຍ້ອນແນວນັ້ນ, ອົງການປົກຄອງບ້ານ 2 ບ້ານ, ຄະນະສົງ ແລະ ປະຊາຊົນ ຈຶ່ງມີຄວາມເຫັນດີເປັນເອກະພາບ ກໍ່ສ້າງທາງເບຕົງເສີມເຫຼັກ, ມີລວງຍາວທັງໝົດ 581 ແມັດ, ລວງກວ້າງ 6 ແມັດ, ຄວາມໜາ 15-20 ຊັງຕີແມັດ.
 |
ພະອາຈານ ຊາສຸນັນ ຜຸຍແກ້ວປະເສີດ ເຈົ້າອະທິການວັດບ້ານນາໄຊ-ສະໂປນ ໄດ້ກ່າວວ່າ: ຍ້ອນຄວາມສາມັກຄີປອງດອງ, ຄວາມເປັນເອກະພາບຂອງການຈັດຕັ້ງບ້ານ ແລະ ຄະນະສົງ ມີຄວາມພະຍາຍາມຊຸກຍູ້ໃນການພັດທະນາພື້ນຖານໂຄງລ່າງ ຕາມທ່າແຮງ, ເງື່ອນໄຂ ເມື່ອບ້ານພັດທະນາ, ວັດວາອາຮາມ ກໍໄດ້ຮັບການພັດທະນາ ຄຽງຄູ່ກັບຈິດໃຈຂອງອອກຕົນຍາດໂຍມ ໄດ້ສ້າງບຸນສ້າງກຸສົນ, ທັງໄດ້ປະກອບສ່ວນຊ່ວຍເຫຼືອສັງຄົມອີກດ້ວຍ. ໂອກາດນີ້, ພະອາຈານ ໄດ້ສະແດງຄວາມຂອບໃຈຕໍ່ກັບອົງການຈັດຕັ້ງທຸກພາກສ່ວນ, ເຈົ້າພາບເຈົ້າສັດທາທາງໃກ້ ແລະ ໄກ ທີ່ໄດ້ປະກອບສ່ວນວັດຖຸ, ປັດໄຈ ຕາມກໍາລັງສັດທາທຸກໆທ່ານ, ທັງອວຍພອນໄຊອັນປະເສີດຈົ່ງເປັນຜູ້ທີ່ມີຄວາມປິຕິຊົມຊື່ນໃນສິນໃນທຳ, ໃນວໍວອນພຸດທະສາດສະໜາໃຫ້ມີຄວາມໝັ້ນຍຶນ ແລະ ເຕັມໄປດ້ວຍພອນໄຊ 4 ປະການຄື: ອາຍຸ, ວັນນະ, ສຸຂະ, ພະລະດ້ວຍ.
 |
ພິທີດັ່ງກ່າວໄດ້ຈັດຂຶ້ນ ໃນວັນທີ 24 ກຸມພານີ້ ທີ່ຈຸດກໍ່ສ້າງເສັ້ນທາງເບຕົງເສີມເຫຼັກ ບ້ານສະໂປນ-ນາໄຊ, ໂດຍການເຂົ້າຮ່ວມຂອງ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ, ທ່ານ ສະໄໝ ໂພທິສານ ຄະນະປະຈໍາພັກແຂວງ ເລຂາພັກເມືອງສາລະວັນ, ພະອາຈານຊາ ສຸນັນ ຜຸຍແກ້ວປະເສີດ, ພ້ອມດ້ວຍພະເຖລາ ນຸເຖລະ, ມີພາກສ່ວນກ່ຽວຂ້ອງ ພ້ອມດ້ວຍປະຊາຊົນພາຍໃນບ້ານ ແລະ ພາກສ່ວນໃຫ້ການອຸປະຖໍາເຂົ້າຮ່ວມ. ໃນໂອກາດດັ່ງກ່າວ, ຫຼາຍພາກສ່ວນກໍໄດ້ໃຫ້ການປະກອບສ່ວນສົມທົບທຶນຮອນເຂົ້າໃນການກໍ່ສ້າງ ຈຳນວນ 50 ລ້ານກວ່າກີບ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ