 |
ທ່ານ ສຸກສາຄອນ ສີປະເສີດ ຜູ້ອຳນວຍການສູນໂຄສະນາຂ່າວສານການສຶກສາ ແລະ ກິລາ ໄດ້ກ່າວວ່າ: ເປົ້າໝາຍຂອງ ແຜນໂຄສະນາສົ່ງເສີມການສຶກສາແຫ່ງຊາດຄັ້ງໃໝ່ນີ້ ກໍເພື່ອສະແດງໃຫ້ເຫັນເຖິງຄຸນຄ່າອັນໃຫຍ່ຫຼວງຂອງການສຶກສາ ແລະ ບົດບາດສຳຄັນຂອງຄູ ໃນການສ້າງອະນາຄົດຂອງປະເທດ. ປັດຈຸບັນ, ລະບົບການສຶກສາຂອງລາວ ປະເຊີນກັບສິ່ງທ້າທາຍຫຼາຍຢ່າງເຊັ່ນ: ນັກຮຽນອອກຈາກໂຮງຮຽນໄວ ເນື່ອງຈາກພວກເຂົາບໍ່ເຫັນຜົນປະໂຫຍດຂອງການຮຽນ. ດ້ວຍເຫດນີ້ ພວກເຮົາຈຶ່ງໄດ້ເປີດຕົວວິດີໂອໃນແຜນໂຄສະນານີ້ ເພື່ອສົ່ງເສີມການສຶກສາ. ວິດີໂອດັ່ງກ່າວແມ່ນເພື່ອຊຸກຍູ້ໃຫ້ນັກຮຽນ ສືບຕໍ່ການສຶກສາຂອງເຂົາເຈົ້າ ຫຼັງຈາກຈົບຊັ້ນປະຖົມ ແລະ ເນັ້ນໃສ່ສາຍຮຽນວິທະຍາສາດ.
ທ່ານ ນາງ ວາແນັດຊາ ເຮກາທີ, ເລຂາເອກ ສະຖານທູດອົດສະຕຣາລີ ປະຈຳ ສປປ ລາວ ໄດ້ກ່າວວ່າ: ພວກເຮົາ ກຳລັງແກ້ໄຂບັນຫາສຳຄັນຂອງອັດຕາການເຂົ້າຮຽນຫຼຸດລົງ ແລະ ຄວາມສົງໄສຂອງພໍ່ແມ່ກ່ຽວກັບຄຸນຄ່າຂອງການສຶກສາ. ຜ່ານການເລົ່າເລື່ອງສົມຈິງ ແລະ ການມີສ່ວນຮ່ວມຂອງຊຸມຊົນຢ່າງຕັ້ງໜ້າ, ພວກເຮົາຕ້ອງການກະຕຸ້ນໃຫ້ໄວໜຸ່ມສືບຕໍ່ຮຽນ ແລະ ຊ່ວຍໃຫ້ພໍ່ແມ່ຮັບຮູ້ເຖິງຜົນປະໂຫຍດຂອງການສຶກສາ. ລັດຖະບານອົດສະຕຣາລີ ໄດ້ໃຫ້ການສະໜັບສະໜູນດ້ານງົບປະມານ ແລະ ດ້ານວິຊາການແກ່ ສສກ ເພື່ອຜະລິດບົດເລື່ອງທີ່ໜ້າສົນໃຈ 4 ເລື່ອງ, ຊຶ່ງຈະສ້າງຂຶ້ນເພື່ອປ່ຽນແນວຄິດກ່ຽວກັບການສຶກສາ.
ສອງບົດເລື່ອງທຳອິດຂອງແຜນໂຄສະນາການສຶກສາ ຄື ເລື່ອງ “ສອງເສັ້ນທາງ” ແລະ ເລື່ອງ “ຄຸນຄ່າຂອງຄູ” ໄດ້ຮັບການຕອບຮັບເປັນຢ່າງດີ ຫຼັງຈາກອອກອາກາດໃນເດືອນທີ່ຜ່ານມາ. ວິດີໂອໃໝ່ຫຼ້າສຸດທີ່ກຳລັງຖ່າຍທຳໃນອາທິດນີ້ ແມ່ນບົດເລື່ອງ “ຄວາມຝັນ” ໂດຍບອກເລົ່າເຖິງເສັ້ນທາງການຮຽນທີ່ປະທັບໃຈຂອງເດັກຍິງຄົນໜຶ່ງ ລາວໄດ້ຂຽນຈົດໝາຍຫາພໍ່ແມ່ທີ່ທຸກຍາກ, ລາວອ້ອນວອນຂໍໃຫ້ພໍ່ແມ່ສະໜັບສະໜູນໃຫ້ລາວສືບຕໍ່ການຮຽນ. ດ້ວຍຄວາມຝັນທີ່ຍິ່ງໃຫຍ່ຂອງລາວ, ລາວມີວິໄສທັດທີ່ຢາກກາຍເປັນນັກວິທະຍາສາດ, ນັກວິສະວະກອນ ຫຼື ນັກປະດິດ, ຜູ້ທີ່ຈະພັດທະນານະວັດຕະກຳໃໝ່ໆ ເພື່ອຜົນປະໂຫຍດຂອງຊຸມຊົນທີ່ລາວຢູ່ ແລະ ປະກອບສ່ວນເຂົ້າໃນຄວາມກ້າວໜ້າຂອງປະເທດຊາດ.
ວິດີໂອທັງໝົດຈະອອກອາກາດທົ່ວປະເທດ ຜ່ານທາງໂທລະພາບ, ສື່ສັງຄົມອອນລາຍ ແລະ ຈະນຳໃຊ້ໂດຍສະມາຊິກສະພາແຫ່ງຊາດ ເພື່ອເຜີຍແຜ່ຂໍ້ມູນໃນຊຸມຊົນ. ນອກຈາກນັ້ນ, ວິດີໂອຍັງຈະເຜີຍແຜ່ໃຫ້ແກ່ຄູອາຈານ, ຜູ້ເຮັດວຽກສຶກສານິເທດ ແລະ ຜູ້ເຮັດວຽກສຶກສານິເທດພາຍໃນ ເພື່ອຊ່ວຍໂຄສະນາໃນຂັ້ນທ້ອງຖິ່ນພາຍໃນໂຮງຮຽນ ແລະ ບ້ານຕ່າງໆ.
ຂ່າວ: ສສກ
ຄໍາເຫັນ