ໂຄງການດັ່ງກ່າວໄດ້ເຂົ້າມາຊ່ວຍເຫຼືອຊຸກຍູ້ສົ່ງເສີມປະຊາຊົນພາຍໃນບ້ານໃໝ່ ປະກອບມີຫຼາຍກິດຈະກໍາເຊັ່ນ: ກໍ່ສ້າງລະບົບນໍ້າລິນ,ສວນຄົວ, ລ້ຽງປາ, ລ້ຽງເຜິ້ງ, ລ້ຽງໝູ, ລ້ຽງໄກ່, ຟອຍກວາດ ແລະ ອື່ນໆ. ໜຶ່ງໃນນັ້ນ, ແມ່ນກິດຈະກໍາລ້ຽງງົວຂຸ້ນ ສາມາດສ້າງລາຍຮັບໃຫ້ປະຊາຊົນ ບ້ານໃໝ່ ເປັນຢ່າງດີ.
ທ່ານ ຄໍາສີ ໄຊອຸ່ນແກ້ວ ຫົວໜ້າກຸ່ມລ້ຽງງົວ ບ້ານໃໝ່ ເມືອງຂວາ ແຂວງຜົ້ງສາລີ ໄດ້ໃຫ້ສໍາພາຕໍ່ສື່ມວນຊົນ ພາຍໃຕ້ໂຄງການສ້າງຄວາມເຂັ້ມແຂງ ໃຫ້ແກ່ສື່ມວນຊົນລາວ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL) ເມື່ອບໍ່ດົນມາວ່າ: ໃນໄລຍະຜ່ານມາການລ້ຽງງົວ ແມ່ນປ່ອຍປະໄປຕາມທໍາມະຊາດ, ປ່ອຍຊະຊາຍ, ບໍ່ເປັນລະບຽບຮຽບຮ້ອຍ, ເຮັດໃຫ້ງົວຈ່ອຍ ຫຼື ຕາຍ ຍ້ອນບໍ່ມີເຕັກນິກໃນການລ້ຽງ, ບໍ່ມີບົດຮຽນ, ບໍ່ມີສູນໃຫ້ລ້ຽງຢ່າງເປັນລະບົບຄົບຊຸດ ແລະ ອື່ນໆ. ສະນັ້ນ, ມາຮອດປີ 2022 ມີອົງການແຄຣນາໆຊາດ ປະຈໍາ ສປປ ລາວ ກໍຄືໂຄງການ KFCRເຂົ້າມາຊຸກຍູ້ຊ່ວຍເຫຼືອ, ຊຸກຍູ້ດ້ານຕ່າງໆລວມເຖິງ ໃຫ້ປະຊາຊົນຜູ້ທີ່ສົນໃຈລ້ຽງງົວ ໄດ້ໄປຝຶກອົບຮົມ, ຖອດຖອນບົດຮຽນຢູ່ຫຼາຍບ່ອນ ເປັນຕົ້ນແຂວງຊຽງຂວາງ, ເມືອງຍອດອູ ແຂວງຜົ້ງສາລີ ເຮັດໃຫ້ໄດ້ບົດຮຽນຫຼາຍຢ່າງແລ້ວນໍາມາປະຕິບັດຕົວຈິງ ໂດຍການຈັດຕັ້ງປະຕິບັດ ເຮັດເປັນສູນລ້ຽງງົວຂຸ້ນ (ງົວໃຫຍ່)ໂດຍມີ 5 ບ້ານເປົ້າໝາຍຂອງອົງການແຄຣນາໆຊາດປະຈໍາ ສປປ ລາວ ແລະ ບ້ານໃໝ່ກໍເປັນບ້ານໜຶ່ງພົ້ນເດັ່ນໃນການລ້ຽງງົວ ເປັນກ້າວໆມາ ໂດຍສະເພາະບ້ານໃໝ່ ມີ 12 ຄອບຄົວ ລ້ຽງງົວຂຸ້ນຢູ່ສູນດຽວກັນ ມີ 69 ຄົນ ຍິງ 33 ຄົນ ແລະ ກາຍເປັນຄອບຄົວຕົວແບບການລ້ຽງງົວຂຸ້ນ. ຍ້ອນໄດ້ຮຽນຮູ້ເຕັກນິກ ວິທີການຕ່າງໆຈຶ່ງເຮັດໃຫ້ການລ້ຽງງົວຂຸ້ນ ມີນໍ້າໜັກ ເຮັດໃຫ້ຕະຫຼາດມີຄວາມຕ້ອງການຢ່າງກວ້າງຂວາງ. ສະເພາະປີ 2024 ໄດ້ຈໍາໜ່າຍສັດໃຫຍ່ອອກຂາຍແລ້ວ 5 ໂຕ. ໃນນັ້ນ, ມີ ງົວ 4 ໂຕ ແລະ ຄວາຍ 1 ໂຕ, ການລ້ຽງງົວຂຸ້ນປະມານ 3-4 ເດືອນກໍສາມາດໄດ້ຂາຍເທື່ອ 1.ຈາກແຕ່ກ່ອນຂາຍງົວ1 ໂຕລາຄາ 6-7 ລ້ານກີບ (ງົວໂຕຜູ້ໃຫຍ່) ປັດຈຸບັນຂາຍງົວ 1 ໂຕ ໃນລາຄາ 16-17 ລ້ານກີບ.ພ້ອມນັ້ນ, ໂຄງການຍັງໄດ້ແນະນໍາເຄັດລັບການລ້ຽງງົວໃຫ້ໃຫຍ່ໄວ, ຕຸ້ຍພີດີ, ມີນໍ້າໜັກ ດ້ວຍການເອົາມັນຕົ້ນ, ສາລີ, ຫຍ້າອິນຊີ ມາປົນກັນໃຫ້ງົວໄດ້ກິນ ໂດຍສະເລ່ຍ 1 ປີ ສາມາດສ້າງລາຍຮັບໄດ້ 75 ລ້ານກີບ. ປັດຈຸບັນ ເຮັດໃຫ້ບ້ານໃໝ່ມີກອງທຶນງົວໝູນວຽນ 5 ຄອບຄົວ, ມີ 27 ຄົນ ຍິງ 15 ຄົນ.
ທ່ານ ຄໍາສີ ໄຊອຸ່ນແກ້ວ ຍັງກ່າວສະແດງຄວາມຂອບໃຈ ນໍາອົງການແຄຣນາໆຊາດ ປະຈໍາ ສປປ ລາວ ທີ່ໄດ້ຊຸກຍູ້ສົ່ງເສີມປະຊາຊົນພາຍໃນບ້ານໃຫ້ມີອາຊີບທີ່ໝັ້ນຄົງ ແລະ ຍືນຍົງ, ຮູ້ເຕັກນິກ, ວີທີການລ້ຽງງົວ, ສາມາດມີລາຍຮັບເຂົ້າພາຍໃນຄອບຄົວ ແລະ ເຮັດໃຫ້ການດໍາລົງຊີວິດດີຂຶ້ນເປັນກ້າວໆ.
ຄໍາເຫັນ