ລມຕ ກະຊວງການເງິນ ພົບປະ ພະນັກງານຫຼັກແຫຼ່ງການເງິນແຂວງຄໍາມ່ວນ.

ວັນທີ 13 ມີນາຜ່ານມາ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ພ້ອມຄະນະໄດ້ພົບປະໂອ້ລົມ ພະນັກງານຫຼັກແຫຼ່ງ ຂົງເຂດການເງິນພາຍໃນ ແຂວງ ຄໍາມ່ວນ ທີ່ຫ້ອງປະຊຸມພະແນກການເງິນແຂວງ, ໂດຍມີ ທ່ານ ຄໍາສິງ ໄຊສິດທິເດດ ຫົວໜ້າພະແນກການເງິນແຂວງ ແລະ ພາກສ່ວນກ່ຽວຂ້ອງຂົງເຂດການເງິນເຂົ້າຮ່ວມ.
ທ່ານ ຄໍາສິງ ໄຊສິດທິເດດ ໄດ້ລາຍງານສະພາບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2023 ແລະ ທິດທາງແຜນການປະຈໍາປີ 2024 ໂດຍສະເພາະບັນຫາຂໍ້ສະດວກ, ຂໍ້ຫຍຸ້ງຍາກ ແລະ ມາດຕະການໃນການແກ້ໄຂ ຊຶ່ງການຈັດຕັ້ງປະຕິບັດດ້ານລາຍຮັບ ແຂວງ ໄດ້ຮັບມອບໝາຍທັງລາຍຮັບສູນກາງ ແລະ ທ້ອງຖິ່ນທັງໝົດ 1.742 ຕື້ກີບ, ປະຕິບັດໝົດປີໄດ້ 2.724 ຕື້ກີບ ເທົ່າກັບ 156,38% ຂອງແຜນປີ, ທຽບໃສ່ປີຜ່ານມາເພີ່ມຂຶ້ນ 1.640 ຕື້ກີບ ເທົ່າກັບ 170,53%. 
ໂອກາດດັ່ງກ່າວ, ທ່ານ ລັດຖະມົນຕີກະຊວງການເງິນ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານທີ່ຄະນະພັກ, ຄະນະນໍາພະແນກການເງິນແຂວງຄໍາມວ່ນຍາດມາໄດ້ໄລຍະຜ່ານມາ, ພ້ອມດຽວກັນທ່ານຍັງໄດ້ໃຫ້ທິດຊີ້ນຳບາງບັນຫາ ໃຫ້ສະມາຊິກພັກ-ພະນັກງານຫຼັກແຫຼ່ງຂົງເຂດການເງິນເອົາໃຈໃສ່ສຶກສາອົບຮົມແນວຄິດ-ການເມືອງແກ່ບັນດາສະມາຊິກພັກ-ພະນັກງານ ພາຍໃນກົມກອງຂອງຕົນ ຮັບຮູ້ເຂົ້າໃຈຕໍ່ກັບແນວທາງນະໂຍບາຍຂອງພັກຢ່າງເລິກຊຶ່ງ, ມີຄວາມເປັນເອກະພາບ, ມີຄວາມສາມັກຄີພາຍໃນໃຫ້ໜັກແໜ້ນ, ມີແນວຄິດອຸ່ນອຽນທຸ່ນທ່ຽງ, ບໍ່ຫວັ່ນໄຫວຄອນແຄນຕໍ່ທຸກສະພາບ, ຕ້ານທຸກປະກົດການຫຍໍ້ທໍ້, ຕີຖອຍແນວຄິດເອກະເທດ, ແບ່ງພັກແຍກພວກ ແລະ ອື່ນໆ. 
ໃນວັນດຽວກັນ, ທ່ານ ລັດຖະມົນຕີກະຊວງການເງິນ ພ້ອມຄະນະ ຍັງໄດ້ລົງຢ້ຽມຢາມຈຸດບໍລິການຄ່ຽນຖ່າຍຂົນສົ່ງສິນຄ້າຜ່ານແດນ ຢູ່ທີ່ສາງເກັບມ້ຽນສິນຄ້າ ຂອງດ່ານພາສີສາກົນຂົວມິດຕະພາບ 3 ແຂວງຄໍາມ່ວນ ແລະ ຢ້ຽມຊົມໂຄງການຂຸດຄົ້ນແຮ່ທາດ ຂອງບໍລິສັດຊີໂນ-ອາກຣີ ໂປຕາສ ຈໍາກັດ.
(ຂ່າວ: ມະນີວັນ)