ໃນເມື່ອບໍ່ດົນຜ່ານມາ ທີ່ຫ້ອງປະຊຸມຂອງບ້ານ ໂດຍມີ ທ່ານ ບຸນທະວີ ຊົງເຮີ ຮອງເຈົ້າເມືອງໆພຽງ ພ້ອມດ້ວຍ ອົງການປົກຄອງບ້ານ ຕະຫລອດຮອດປະຊາຊົນບັນດາເຜົ່າບ້ານປາກຊອງເຂົ້າຮ່ວມ.
ການມາຄັ້ງນີ້, ທ່ານ ຮອງເຈົ້າເມືອງໆພຽງ ກໍໄດ້ລາຍງານການຈັດຕັ້ງ ປະຕິບັດການສໍາຫຼວດເກັບກໍາຂໍ້ມູນການນໍາໃຊ້ທີ່ດິນຕາມປະເພນີຂອງປະຊາຊົນທີ່ນອນຢູ່ໃນ 3 ປະເພດປ່າຢູ່ບ້ານ ປາກຊອງ ເມືອງພຽງ ໂດຍຍົກໃຫ້ເຫັນສະພາບລວມຂອງບ້ານ, ຂໍ້ສະດວກ, ຂໍ້ຫຍຸ້ງຍາກ ລວມທັງຂໍ້ສະເໜີ ໃນການຈັດຕັ້ງປະຕິບັດການສໍາຫຼວດເກັບກໍາຂໍ້ມູນການນໍາໃຊ້ທີ່ດິນຕາມປະເພນີຂອງປະຊາຊົນທີ່ນອນຢູ່ໃນ 3 ປະເພດປ່າຢູ່ບ້ານ ປາກຊອງ. ຈາກນັ້ນ, ຕາງຫນ້າ ປະຊາຊົນ ມີຄໍາເຫັນ ແລະ ຄໍາສະເຫນີຂອງຜູ້ເຂົ້າຮ່ວມ ພ້ອມທັງລາຍງານການຮັບຮູ້ສິດນໍາໃຊ້ທີ່ດິນຕາມປະເພນີຂອງປະຊາຊົນທີ່ຢູ່ໃນ 3 ປະເພດປ່າ.
ໂອກາດນີ້, ທ່ານລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ເນັ້ນໃຫ້ຄະນະນໍາແຕ່ລະຂັ້ນຈົ່ງໄດ້ເອົາໃຈໃສ່ ໃນການຈັດຕັ້ງປະຕິບັດ, ການສະໜັບສະໜູນແຜນງານຄຸ້ມຄອງທີ່ດິນດ້ວຍຄວາມສາມັກຄີ, ເປັນເອກພາບ ແລະ ເອົາໃຈໃສ່ຈັດຕັ້ງປະຕິບັດດ້ວຍຄວາມຮັບຜິດຊອບສູງ ແລະ ເນັ້ນໃຫ້ອໍານາດການປົກຄອງບ້ານ, ຕະຫຼອດຮອດພໍ່ແມ່ປະຊາຊົນພາຍໃນບ້ານຈົ່ງໄດ້ໃຫ້ຄວາມຮ່ວມມືໃນການລົງສໍາຫຼວດ-ວັດແທກຂອບເຂດດິນຂອງບ້ານ ໃນການຈັດສັນ, ການນໍາໃຊ້ທີ່ດິນຂັ້ນບ້ານລວມເຖິງ ການໂຄສະນາປະຊາສໍາພັນທາງດ້ານລະບຽບກົດໝາຍ, ນິຕິກໍາຕ່າງໆຢ່າງເລີກເຊິ່ງໃຫ້ປະຊາຊົນໄດ້ມີຄວາມຮັບຮູ້ເຂົ້າໃຈ ເພື່ອພ້ອມກັນສືບຕໍ່ຈັດຕັ້ງປະຕິບັດວຽກງານດັ່ງກ່າວໃຫ້ສໍາເລັດຕາມລະດັບຄາດໝາຍ.
(ຂ່າວ: ແສງສຸດາ ກິ່ງສະຫວັດ)
ຄໍາເຫັນ