ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ອົງການພະລັງງານສາກົນ (IEA) ໄດ້ເປີດເຜີຍບົດລາຍງານໂດຍລະບຸວ່າ: ໂລກເພີ່ມກຳລັງການຜະລິດພະລັງງານໝູນວຽນ 50% ໃນປີ 2023 ແຕ່ການຕໍ່ສູ້ກັບການປ່ຽນແປງສະພາບອາກາດຈຳເປັນຕ້ອງໃຊ້ພະລັງງານຫຼາຍກວ່ານີ້.
ບົດລາຍງານລະບຸວ່າ: ການເພີ່ມຂຶ້ນດັ່ງກ່າວເປັນອັດຕາການຂະຫຍາຍຕົວໄວທີ່ສຸດໃນຮອບ 20 ປີທີ່ຜ່ານມາ ແລະ ຖືວ່າເປັນການເພີ່ມກຳລັງການຜະລິດພະລັງງານໝູນວຽນທີ່ສ້າງສະຖິຕິໃໝ່ເປັນປີທີ 22 ຕິດຕໍ່ກັນ ອີກທັງການເຄື່ອນໄຫວດັ່ງກ່າວຍັງໄດ້ຮັບແຮງໜູນຈາກຈີນ. ເຖິງແມ່ນວ່າການໃຊ້ພະລັງງານແສງຕາເວັນກັບພະລັງງານລົມຄວບຄູ່ກັບການຫຼຸດການໃຊ້ເຊື້ອໄຟຟອສຊິນມີຄວາມສຳຄັນຢ່າງຍິ່ງໃນການບັນລຸເປົ້າໝາຍຈຳກັດການເພີ່ມຂຶ້ນຂອງອຸນຫະພູມໂລກ ໄວ້ທີ່ 1,5 ອົງສາ ຈາກລະດັບກ່ອນຍຸກອຸດສາຫະກຳ ແຕ່ IEA ລະບຸວ່າ: ໂລກຍັງບໍ່ສາມາດບັນລຸເປົ້າໝາຍໃນການເພີ່ມກຳລັງການຜະລິດພະລັງງານໝູນວຽນ 3 ເທົ່າ ພາຍໃນປີ 2030 ຕາມມະຕິຕົກລົງຈາກ 200 ປະເທດໃນກອງປະຊຸມລັດຖະພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບພູມອາກາດຕາມຂອບຂອງອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບພູມອາກາດ (UNFCCC) ຄັ້ງທີ 28 ຫຼື COP28 ທີ່ເມືອງດູໄບ ເມື່ອເດືອນຜ່ານມາ. ທ່ານ ຟາຕິ ບິຣອນ ກຳມະການບໍລິຫານຂອງ IEA ກ່າວວ່າ: ມັນຍັງບໍ່ພຽງພໍທີ່ຈະບັນລຸເປົ້າໝາຍຂອງ COP28 ໃນການເພີ່ມພະລັງງານໝູນວຽນອີກ 3 ເທົ່າ ແຕ່ພວກເຮົາກຳລັງເຂົ້າໃກ້ເປົ້າໝາຍດັ່ງກ່າວ ແລະ ລັດຖະບານຂອງປະເທດຕ່າງໆກໍມີເຄື່ອງມືທີ່ຈຳເປັນຕໍ່ການປິດຊ່ອງວ່າງນັ້ນ. ທ່ານ ບິຣອນ ກ່າວຕື່ມວ່າ: ຄວາມທ້າທາຍທີ່ສຳຄັນທີ່ສຸດສຳລັບປະຊາຄົມສາກົນຄືການເພີ່ມເງິນທຶນ ແລະ ການໃຊ້ພະລັງງານໝູນວຽນໃນປະເທດເສດຖະກິດເກີດໃໝ່ ແລະ ປະເທດກຳລັງພັດທະນາສ່ວນໃຫຍ່ຂອງໂລກ ຊຶ່ງຄວາມສຳເລັດໃນການບັນລຸເປົ້າໝາຍຂອງການເພີ່ມກຳລັງການຜະລິດພະລັງງານໝູນວຽນ 3 ເທົ່າ ຈະຂຶ້ນຢູ່ກັບສິ່ງນີ້.
ທ່ານ ດີນ ຄູເປີ ຜູ້ນຳດ້ານພະລັງງານລະດັບໂລກ ຈາກອົງການກອງທຶນສັດປ່າໂລກສາກົນ (WWF) ກ່າວວ່າ: ການຜະລິດພະລັງງານໝູນວຽນກຳລັງເພີ່ມຂຶ້ນຢ່າງວ່ອງໄວ. ພວກເຮົາຈະບໍ່ສາມາດຫຼີກລ່ຽງໄພພິບັດທາງສະພາບອາກາດ ຂະນະທີ່ຍັງຄົງມີການເຜົາໄໝ້ເຊື້ອໄຟຟອສຊິນຢ່າງຕໍ່ເນື່ອງ ຊຶ່ງຜູ້ທີ່ຕ້ອງການເຫັນໂລກໜ້າຢູ່ຄວນເພີ່ມແຮງກົດດັນໃຫ້ລັດຖະບານປ່ຽນຄຳເວົ້າເປັນການກະທຳ ໂດຍຮຽກຮ້ອງໃຫ້ພວກເຂົາປ່ຽນແປງລະບົບພະລັງງານຢ່າງຮີບດ່ວນ.
ຄໍາເຫັນ