ຫຼວງນໍ້າທາ ປາຖະກະຖາມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບ

ທ້າຍອາທິດຜ່ານມານີ້, ແຂວງຫຼວງນໍ້າທາ ໄດ້ພິທີປາຖະກະຖາມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 63 ປີ (ວັນທີ 5 ເມສາ 1961-5 ເມສາ 2024) ຂຶ້ນຢູ່ທີ່ຫໍວັດທະນະທໍາແຂວງ, ໂດຍໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງນໍ້າທາ, ມີການນໍາພັກ-ລັດຂັ້ນແຂວງ, ເມືອງເຂົ້າຮ່ວມ.
    ທ່ານ ພົນຈັດຕະວາ ອີນສົມ ທໍາລະສີນ ກໍາມະການພັກແຂວງ ຫົວໜ້າກອງບັນຊາການ ປກສ ແຂວງຫຼວງນໍ້າທາ ໄດ້ເລົ່າຄືນການກໍາເນີດເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບ      ຕະຫຼອດໄລຍະ 63 ປີທີ່ຜ່ານມາ ຊຶ່ງເປັນວັນປະຫວັດສາດທີ່ສໍາຄັນຂອງຊາດ-ຂອງພັກ ເວົ້າລວມ-ເວົ້າສະເພາະ ກໍ່ແມ່ນວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ນັບແຕ່ໄດ້ຮັບການສ້າງຕັ້ງຂຶ້ນ, ກຳລັງປ້ອງກັນຄວາມສະຫງົບ ໄດ້ປະກອບສ່ວນຜົນງານຢ່າງໃຫຍ່ຫຼວງໃນພາລະກິດປົດປ່ອຍຊາດ, ເປັນກຳລັງປະຈັນບານປະເຊີນໜ້າໂດຍກົງ, ເປັນກຳລັງທີ່ມີມູນເຊື້ອກໍ່ສ້າງຮາກຖານການເມືອງ ຕິດພັນ ແລະ ສະໜິດແໜ້ນກັບປະຊາຊົນ, ປ້ອງກັນຜູ້ນຳພັກ-ລັດ ຢ່າງເດັດດ່ຽວ, ນາຍ ແລະ ພົນຕໍາຫຼວດທຸກຮຸ້ນໃນແຕ່ລະໄລຍະໄດ້ກາຍເປັນກໍາລັງທີ່ຈົ່ງຮັກພັກດີຕໍ່ປະເທດຊາດ ແລະ ປະຊາຊົນບັນດາເຜົ່າ, ເປັນກຳລັງທີ່ຢູ່ໃຕ້ການຊີ້ນຳ ນໍາພາຢ່າງເດັດຂາດ, ໂດຍກົງ, ຮອບດ້ານຂອງພັກປະຊາຊົນ ປະຕິວັດລາວ ທີ່ມີກຽດສະຫງ່າ. ພາຍຫຼັງທີ່ປະເທດຊາດໄດ້ຮັບການປົດປ່ອຍຢ່າງເປັນທາງການ ໃນວັນທີ 2 ທັນວາ 1975 ເປັນຕົ້ນມາ, ຊຶ່ງແມ່ນຢູ່ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃໝ່, ກຳລັງປ້ອງກັນຄວາມສະຫງົບ ກໍໄດ້ປັບປຸງຢ່າງຮອບດ້ານຢູ່ຂັ້ນຮາກຖານໄດ້ຈັດຕັ້ງແນວຮົບປ້ອງກັນຊາດ-ປ້ອງກັນຄວາມສະຫງົບຢູ່ຂັ້ນທ້ອງຖິ່ນຢ່າງແໜ້ນໜາ, ປັບປຸງຍົກສູງຄຸນນະພາບຂອງບັນດາກຳລັງປະກອບອາວຸດປະຊາຊົນ, ເດັດດ່ຽວທັບມ້າງທຸກກົນອຸບາຍການເຄື່ອນໄຫວມ້າງເພທຳລາຍຂອງສັດຕູ ແລະ ປົກປັກຮັກສາປະເທດຊາດໄດ້ຢ່າງໝັ້ນຄົງພ້ອມທັງມີຜົນງານຫຼາຍດ້ານຈົນມາຮອດປັດຈຸບັນ.
      ໃນວັນດຽວກັນນີ້, ທ່ານ ນາງ ປານີ ຈິດດາລາ ຄະນະບໍລິຫານງານສູນກາງຊາວໜຸມ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງຫຼວງນໍ້າທາ ໄດ້ປາຖະກະຖາວັນສ້າງຕັ້ງຊາວໜຸ່ມປະຊາຊົນປະຕິວັດລາວຄົບຮອບ 69 ປີ (ວັນທີ 14 ເມສາ 1955–14 ເມສາ 2024) ແລະ ມອບຫຼຽນໄຊ,ຫຼຽນກາ, ໃບຍ້ອງຍໍ ໃຫ້ກົມກອງ,ບຸກຄົນ ທີ່ມີຜົນງານດີເດັ່ນ ປະກອບສ່ວນເຂົ້າໃນວຽກງານພັດທະນາປະເທດຊາດ ແລະ ທ້ອງຖີ່ນ. 
(ຂ່າວ: ມຸນຕີ)