ຫຼວງນ້ຳທາ ເປີດໜ່ວຍບໍລິການຜ່ານປະຕູດຽວ

ເມືອງຫຼວງນ້ຳທາ ແຂວງຫຼວງນ້ຳທາ ໄດ້ຈັດພິທີປະກາດ ເປີດໜ່ວຍບໍລິການຜ່ານປະຕູດຽວເມືອງຫຼວງນໍ້າທາຂຶ້ນເມື່ອວັນທີ 29 ມັງກອນຜ່ານມາ ຊຶ່ງສະຖານທີ່ໜ່ວຍບໍລິການຕັ້ງຢູ່ຕະຫຼາດເກົ່າ ບ້ານວຽງເໜືອ ເມືອງຫຼວງນໍ້າທາ ໂດຍການເຂົ້າຮ່ວມຂອງທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ, ທ່ານ ຫຼ້າປະເສີດ ສີປະເສີດ ເຈົ້າເມືອງຫຼວງນໍ້າທາ, ມີພາກສ່ວນກ່ຽວຂ້ອງເຂົ້າຮ່ວມ.
    ໃນພິີທີ ໄດ້ຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການອະນຸມັດໃຫ້ເມືອງຫຼວງນໍ້າທາ ຈັດຕັ້ງປະຕິບັດວຽກງານບໍລິການຜ່ານປະຕູດຽວ, ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດເປີດພິທີປະກາດໜ່ວຍບໍລິການຜ່ານປະຕູດຽວຢູ່ເມືອງຫຼວງນໍ້າທາ, ຜ່ານຂໍ້ຕົກລົງຂອງທ່ານເຈົ້າເມືອງຫຼວງນໍ້າທາ ວ່າດ້ວຍການສັບຊ້ອນພະນັກງານ-ລັດຖະກອນ ໄປປະຈໍາການຢູ່ໜ່ວຍບໍລິການຜ່ານປະຕູດຽວຂອງເມືອງຫຼວງນໍ້າທາ.
ການເປີດໜ່ວຍບໍລິການ ປະກອບມີບັນດາໜ້າວຽກທີ່ສໍາຄັນ ເປັນຕົ້ນແມ່ນ ວຽກງານພາຍໃນ, ວຽກງານແຮງງານ ແລະ ສະຫວັດດີການສັງຄົມ, ວຽກງານພະລັງງານ ແລະ ບໍ່ແຮ່, ວຽກງານແຜນການ ແລະ ການລົງທຶນ, ວຽກງານຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ, ວຽກງານການເງິນ, ວຽກງານຊັບພະຍາກອນທໍາມະຊາດ ແລະ ສິ່ງແວດລ້ອມ, ວຽກງານກະສິກໍາ ແລະ ປ່າໄມ້, ວຽກງານສຶກສາທິການ ແລະ ກິລາ, ວຽກງານຍຸຕິທໍາ, ວຽກງານອຸດສາຫະກໍາ ແລະ ການຄ້າ ແລະ ວຽກງານປ້ອງກັນຄວາມສະຫງົບ, ທັງນີ້ກໍເພື່ອເປັນການປັບປຸງກົນໄກແບບແຜນວິທີເຮັດວຽກຂອງອົງການບໍລິຫານລັດ ໃຫ້ມີຄວາມສະດວກ, ວ່ອງໄວ ແລະ ຮັບປະກັນຄວາມຖືກຕ້ອງ ແນໃສ່ເຮັດໃຫ້ການແກ້ໄຂເອກະສານການອອກໃບອະນຸຍາດຕ່າງໆ ໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງໃຫ້ມີຄວາມວ່ອງໄວໃນການຮັບໃຊ້ປະຊາຊົນ ສາມາດບໍລິການຢ່າງງ່າຍດາຍ ທີ່ອໍານວຍຄວາມສະດວກໃຫ້ແກ່ຜູ້ປະກອບການ, ການດໍາລົງຊີວິດຂອງປະຊາຊົນ ແລະ ອົງການຈັດຕັ້ງຂອງລັດໃຫ້ຖືກຕ້ອງຕາມລະບຽບກົດໝາຍ ແລະ ເປັນການສ້າງລາຍຮັບແບບລວມສູນ ຮັບປະກັນບໍ່ໃຫ້ງົບປະມານຮົ່ວໄຫຼ ເຮັດໃຫ້ການເກັບລາຍຮັບເຂົ້າງົບປະມານລັດມີປະສິດທິຜົນຍິ່ງໆຂຶ້ນ.
ຂ່າວ-ພາບ:ພົນ