ຫຼວງນໍ້າທາ ສ້ອມແປງຄອງເໝືອງທີ່ຖືກຜົນກະທົບຈາກໄພນໍ້າຖ້ວມໃນໄລຍະຜ່ານມາ.

ການອອກແຮງງານໃນຄັ້ງນີ້, ເພື່ອເປັນການສ້ອມແປງນໍ້າຄອງເໝືອງ ທີ່ເປ່ເພຈາກໄພພິບັດນໍ້າຖ້ວມໃນໄລຍະຜ່ານມາ, ເປັນການແກ້ໄຂສຸກເສີນຊ່ວງໄລຍະທີ່ຊາວນາຂຸ້ນຂ້ຽວໃນການຕົກກ້າ ແລະ ປັກດໍາເຂົ້ານາປີໃນຊ່ວງນີ້ ຝົນຕົກບໍ່ປົກກະຕິເຮັດໃຫ້ນໍ້າທີ່ຊົມໃຊ້ບໍ່ພຽງພໍ ຈຶ່ງໄດ້ອອກແຮງງານລວມໂດຍການຕັກຊາຍໃສ່ເປົາໄປຕັນເຮັດຝາຍຊົນລະປະທານເພື່ອແກ້ໄຂເອົານໍ້າເຂົ້າຄອງເໝືອງ ເຮັດໃຫ້ປະຊາຊົນມີນໍ້າຊົມໃຊ້ຢ່າງພຽງພໍໃນການຜະລິດເຂົ້ານາປີ.

ຂ່າວໃຫ້ຮູ້ຕື່ມວ່າ: ທ້າຍເດຶອນ ພຶດສະພາຜ່ານມາ, ປະຊາຊົນທັງ 3 ບ້ານຄື: ບ້ານ ປຸ່ງ, ປ່າສັກ ແລະ ປະຊາຊົນບ້ານໃໝ່ ເມືອງຫຼວງນໍ້າທາໄດ້ສາມັກຄີກັນ ພ້ອມພາກັນອະນາໄມໜ້າຝາຍນໍ້າລື ແລະ ຄອງນໍ້າຊົນລະປະທານເພື່ອໃຫ້ນໍ້າໄຫຼເຂົ້າສູ່ນາທໍາການຜະລິດນາປີນີ້ໃຫ້ສະດວກສະບາຍ ແລະ ພຽງພໍໃນການຄາດໄຖ ແລະ ຫວ່ານກ້າ. ການອອກແຮງງານຄັ້ງນີ້, ໄດ້ພ້ອມກັນຕັດຫຍ້າ, ຄຸດຊາຍອອກຈາກຄອງຊົນລະປະທານ ມີຄວາມຍາວເກືອບ 2 ກິໂລແມັດ ເພື່ອໃຫ້ນໍ້າໄຫຼສະດວກສະບາຍ.

(ຂ່າວ: ມຸນຕີ)