ບໍລິສັດສີມອນ ພັດທະນາກະສິກໍາ ແລະ ບໍລິການຂາເຂົ້າ - ຂາອອກຈໍາກັດ ກໍເປັນບໍລິສັດໜຶ່ງທີ່ໄດ້ລົງທືນໃນການປູກພືດປອດສານພິດເພື່ອຕອບສະໜອງໃຫ້ແກ່ສັງຄົມ. ມາໃນວັນທີ 15 ມັງກອນ 2025 ນີ້ທາງພະແນກກະສິກໍາ ແລະ ປ່າໄມ້ແຂວງຫຼວງນໍ້າທາ, ນໍາພາໂດຍທ່ານ ວິລະຊົນ ແດນຫັນສາ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງ ພ້ອມດ້ວຍທີມງານໄດ້ລົງກວດກາເບີ່ງພື້ນຖານການຜະລິດປູກພືດ ອໍແກນີກ ຫຼື ຜັກປອດສານຜີດ ຢູ່ທີ່ສູນບ້ານຫຼວງ ແລະ ສູນຄົ້ນຄວ້າກະສິກຳບ້ານໃໝ່.
ໂອກາດນີ້, ທ່ານ ນາງ ສີມອນ ແກ້ວວົງເພັດ ຫົວໜ້າບໍລິສັດ ສີມອນ ພັດທະນາກະສິກໍາ ແລະ ບໍລິການ ຂາເຂົ້າ - ຂາອອກ ຈໍາກັດ ໄດ້ໃຫ້ຮູ້ໃນການລົງທືນທົດລອງປູກຜັກປອດສານຜິດໃນຂັ້ນທົດລອງຢູ່ທີ່ສູນບ້ານຫຼວງ ແລະ ສູນຄົ້ນຄ້ວາກະສິກຳບ້ານໃໝ່ ເມືອງຫຼວງນໍ້າທາ ວ່າ: ການປູກຜັກປອດສານຜິດແມ່ນອາຊີບທີ່ທຸກຄົນ ມີຄວາມສົນໃຈຢາກທົດລອງ ແລະ ຢຶດຖືເປັນອາຊີບ ພ້ອມທັງເປັນການສ້າງວຽກເຮັດງານທຳໃຫ້ປະຊາຊົນໄດ້ມີລາຍຮັບ ບໍລິສັດ ສີມອນ ພັດທະນາກະສິກຳ ແລະ ບໍລິການ ຂາເຂົ້າ-ຂາອອກ ຈຳກັດໄດ້ລົງທືນເຂົ້າໃນການປູກຜັກໃນເບື້ອງຕົ້ນ ວັນທີ 3 ຕຸລາ 2024 ເປັນຕົ້ນມາໂດຍມີເນື້ອທີ່ທັງໝົດມີ 14 ເຮັກຕາ (ໃນສອງສອງສູນ),ໄດ້ໃຊ້ທືນທັງໝົດ 2 ຕື້ກີບ, ຊະນິດຜັກທີ່ນໍາມາປູກມີ 7 ຊະນິດຄື: ຜັກຫອມປ້ອມ, ຜັກກາດຂາວ, ຜັກກາດກວາງຕຸງ, ຜັກກາດຕີນໝີ, ແຄລອດ, ໝາກເລັ່ນ ແລະ ຜັກອື່ນໆ.
(ຂ່າວ: ສົມພອນ ຂຸນດາວົງ)
ຄໍາເຫັນ