ໃນກອງປະຊຸມ, ທ່ານຮອງເຈົ້າແຂວງ ໄດ້ເນັ້ນໜັກໃຫ້ຄະນະນຳພະແນກການເງິນແຂວງ ເອົາໃຈໃສ່ຢ່າງແຂງແຮງໃນການກະກຽມຮ່າງແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ປະຈຳປີ 2026 ຂອງແຂວງຫຼວງພະບາງ, ຊຶ່ງເປັນແຜນທີ່ມີຄວາມໝາຍຄວາມສຳຄັນ ເນື່ອງຈາກຈະເປັນປີທຳອິດຂອງ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X ຂອງແຂວງ ເພື່ອສູ້ຊົນເຮັດໃຫ້ ແຂວງຫຼວງພະບາງ ກາຍເປັນແຂວງກຸ້ມຕົນເອງ, ເປັນເຈົ້າຕົນເອງທາງດ້ານເສດຖະກິດ ແລະງົບປະມານ, ການຮ່າງແຜນຕ້ອງໃຫ້ສອດຄ່ອງໄປຕາມທິດທາງ ແລະ ຈຸດສຸມ ທີ່ກຳນົດໃນແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ X (2026-2030) ຂອງແຂວງ, ລວມທັງແຜນການ ປີ 2026 ຕ້ອງມີຄວາມຊັດເຈນ, ເປັນວິທະຍາສາດ, ຂຸດຄົ້ນຕີແຕກ ແລະ ນຳໃຊ້ທຸກທ່າແຮງບົ່ມຊ້ອນຂອງແຂວງໃຫ້ໄດ້ຫຼາຍທີ່ສຸດ ເພື່ອເຮັດໃຫ້ແຂວງ ກາຍເປັນ ແຂວງທີ່ມີຄວາມເຂັ້ມແຂງ ທາງດ້ານເສດຖະກິດ ແລະ ການເງິນ, ພ້ອມນັ້ນ ໄດ້ເນັ້ນໃຫ້ເອົາໃຈໃສ່ ວຽກງານເດີນສຳຫຼວດ ຖານຂໍ້ມູນລາຍຮັບຂອງແຂວງ ທີ່ກຳລັງເລີ່ມທົດລອງເຮັດຢູ່ນະຄອນ ຫຼວງພະບາງ ແລະ ເມືອງນ້ຳບາກ ໃຫ້ມີຜົນສຳເລັດເປັນຢ່າງດີຕາມຄາດໝາຍທີ່ວາງໄວ້ ເພື່ອກ້າວໄປສູ່ການສຳຫຼວດ-ເກັບກຳຂໍ້ມູນຖານລາຍຮັບທົ່ວແຂວງໃຫ້ສຳເລັດ.
(ແຫຼ່ງຂ່າວ: ແຂວງຫຼວງພະບາງ)
ຄໍາເຫັນ