ເຊື່ອມຈອດໃນພາກພື້ນ ແລະ ສາກົນ.ລາວ-ຫວຽດນາມ ໄດ້ຮ່ວມກັນປະຕິບັດບົດບັນທຶກຄວາມເຂົ້າໃຈ ກ່ຽວກັບການຮ່ວມມືໃນຂົງເຂດເຕັກໂນໂລຊີ ແລະ ນະວັດຕະກໍາ ລະຫວ່າງ ກະຊວງເຕັກໂນໂລຊີ ແລະ ການສື່ສານລາວ ກັບກະຊວງວິທະຍາສາດ ແລະ ເຕັກໂນໂລຊີ ຫວຽດນາມ, ເອົາການຮ່ວມມືດ້ານເຕັກໂນໂລຊີ ແລະ ນະວັດຕະກໍາ ເຂົ້າສູ່ລວງເລິກ.ສອງຝ່າຍ ໄດ້ປະສົບຜົນສໍາເລັດໃນການຈັດກອງປະຊຸມຄັ້ງທໍາອິດ ຂັ້ນລັດຖະມົນຕີ ຂອງຄະນະກໍາມະການຮ່ວມມືດ້ານເຕັກໂນໂລຊີ ແລະ ນະວັດຕະກໍາ ລາວ-ຫວຽດນາມ ໃນເດືອນ 5/2024 ຢູ່ລາວ ໂດຍໄດ້ເຫັນດີເປັນເອກະພາບ ຕໍ່ ກັບບັນດາເນື້ອໃນຮ່ວມມື ກ່ຽວກັບການແບ່ງປັນປະສົບການໃນການຄຸ້ມຄອງ-ບໍລິຫານລັດ ແລະ ຊ່ວຍດ້ານວິທີການວາງແຜນນະໂຍບາຍ, ການສ້າງລະບຽບການ ແລະ ກອບນິຕິກໍາໃນບາງຂົງເຂດ ຄື: ເຕັກໂນໂລຊີລະດັບສູງ, ການສ້າງເຂດເຕັກໂນໂລຊີລະດັບສູງ, ການບໍລິການເຕັກໂນໂລຊີ, ການບໍລິຫານນະວັດຕະກໍາ, ວຽກສະຕາດອັບ ແລະ ການຖ່າຍທອດເຕັກໂນໂລຊີ; ແລກປ່ຽນຄະນະຜູ້ແທນຂັ້ນຕ່າງໆ; ການຮ່ວມມືດ້ານການຄົ້ນຄວ້າ,ການພັດທະນາ,ການນໍາໃຊ້,ຖ່າຍທອດເຕັກໂນໂລຊີ ແລະ ນະວັດຕະກໍາ,ໂດຍຜ່ານການຈັດຕັ້ງປະຕິບັດວຽກງານວິທະຍາສາດ ແລະ ເຕັກໂນໂລຊີ ຕາມອະນຸສັນຍາ; ໄດ້ປະສານສົມທົບຈັດຊຸດຝຶກອົບຮົມ ໃຫ້ແກ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານລາວ ໃນການຄຸ້ມຄອງເຕັກໂນໂລຊີ ແລະ ນະວັດຕະກໍາ, ເຂົ້າຮ່ວມກິດຈະກໍາເຄື່ອນໄຫວ ກ່ຽວກັບການເຊື່ອມໂຍງ ລະຫວ່າງ ການສະໜອງ-ຄວາມຕ້ອງການ, ການຖ່າຍທອດເຕັກໂນໂລຊີ, ວຽກສະຕາດອັບ ແລະ ນະວັດຕະກໍາ ທີ່ສອງຝ່າຍຈັດຂຶ້ນໃນແຕ່ລະປີ; ລວມທັງຊຸກຍູ້ການຮ່ວມມືດ້ານເຕັກໂນໂລຊີ ແລະ ນະວັດຕະກໍາ ຢູ່ທ້ອງຖິ່ນ.
ສອງຝ່າຍ ເອົາໃຈໃສ່ຊຸກຍູ້ການປະຕິບັດບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາລາວ ກັບກະຊວງວິທະຍາສາດ ແລະ ເຕັກໂນໂລຊີຫວຽດນາມ ກ່ຽວກັບການຮ່ວມມືໃນຂົງເຂດ ວິທະຍາສາດ. ໃນນັ້ນ, ໄດ້ຈັດເວທີພົບປະຂັ້ນລັດຖະມົນຕີ ກ່ຽວກັບວິທະຍາສາດ ແລະ ນະວັດຕະກໍາ ພຶດສະພາ 5/2024 ຢູ່ ສປປ ລາວ ໂດຍເຫັນດີເປັນເອກະພາບສຸມໃສ່ຊຸກຍູ້ ຄົ້ນຄວ້າວິທະຍາສາດ ແລະ ນະວັດຕະກໍາ; ບໍາລຸງ ແລະ ຍົກສູງຄວາມອາດສາມາດ ໃຫ້ແກ່ພະນັກງານຄົ້ນຄວ້າ ແລະ ຄຸ້ມຄອງວິທະຍາສາດ;ຈັດຕັ້ງປະຕິບັດໂຄງການຊ່ວຍເຫຼືອ, ຊ່ວຍກອງທຶນພັດທະນາວິທະຍາສາດ ແລະ ເຕັກໂນໂລຊີຂອງລາວ.
ໃນຂອບການຮ່ວມມືສາມຝ່າຍລະຫວ່າງ ລາວ-ຫວຽດນາມ IAEA ກ່ຽວກັບການຮ່ວມມືໃນຂົງເຂດພະລັງງານປະລະມານູ, ຫວຽດນາມ ໄດ້ຈັດຊຸດຝຶກອົບຮົມ ໃຫ້ແກ່ພະນັກງານລາວ ກ່ຽວກັບການກວດສອບ, ການປະເມີນທີ່ບໍ່ທໍາລາຍການນໍາໃຊ້ໃນການກວດສອບໂຮງງານໄຟຟ້າຄວາມຮ້ອນ, ເນື້ອໃນການກວດກາຄວາມປອດໄພຂອງລັງສີ ຢູ່ສະຖານບັນການແພດ ແລະ ອຸດສາຫະກໍາ; ແນະນໍາການຝຶກຊ້ອມ ກ່ຽວກັບເຕັກນິກການຖ່າຍພາບລັງສີຂັ້ນ 2; ສອງຝ່າຍ ໄດ້ລົງນາມແຜນການບໍາລຸງສ້າງໃນຂົງເຂດລິຂະສິດຊັບສິນທາງປັນຍາປີ 2024-2025 ເພື່ອເພີ່ມທະວີການສ້າງຊັບພະຍາກອນມະນຸດ ໃຫ້ແກ່ລາວ.
ສອງຝ່າຍ ໄດ້ປະສານສົມທົບກັນປະຕິບັດສໍາເລັດໂຄງການຮ່ວມມືຄົ້ນຄວ້າຮ່ວມ ລະຫວ່າງ ສອງ ປະເທດ ເພື່ອຖ່າຍທອດບົດຮຽນໃຫ້ລາວ ກ່ຽວກັບບາງເຕັກນິກການຜະລິດເຫັດ, ການລ້ຽງກວາງ, ການຜະລິດຝຸ່ນຊີວະພາບ ເພື່ອສົ່ງເສີມໃຫ້ລາວ ສາມາດນໍາໃຊ້ຜົນການຄົ້ນຄວ້າວິທະຍາສາດ ເຂົ້າໃນການຜະລິດຕົວຈິງ ຢູ່ບັນດາທ້ອງຖິ່ນ ຄື: ແຂວງບໍລິຄໍາໄຊ, ແຂວງຫຼວງນໍ້າທາ, ແຂວງບໍ່ແກ້ວ, ແຂວງໄຊຍະບູລີ ແລະ ແຂວງຊຽງຂວາງ.
ນອກຈາກຜົນສໍາເລັດໃນຂົງເຂດວິທະຍາສາດ, ເຕັກໂນໂລຊີ ແລະ ນະວັດຕະກໍາແລ້ວ ສອງຝ່າຍຍັງໄດ້ຮ່ວມມື ໃນຂົງເຂດການຄົ້ນຄວ້າວິທະຍາສາດສັງຄົມ,ຂົງເຂດຊັບພະຍາກອນທໍາມະຊາດ ແລະ ສິ່ງແວດລ້ອມ.ໄດ້ດໍາເນີນກອງປະຊຸມພົບປະສອງຝ່າຍ ລະຫວ່າງ ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມລາວ ແລະ ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ. ໄດ້ເຫັນດີເປັນເອກະພາບກ່ຽວກັບການກໍານົດທິດທາງການຮ່ວມມືໃນຕໍ່ໜ້າໂດຍສຸມໃສ່ຂົງເຂດຊັບພະຍາກອນນໍ້າ,ການຄຸ້ມຄອງສິ່ງແວດລ້ອມ,ການອະນຸລັກຊີວະນາໆພັນ, ການປ່ຽນແປງສະພາບດິນຟ້າອາກາດ, ອຸຕຸນິຍົມ-ອຸທົກກະສາດ, ການຄຸ້ມຄອງທີ່ດິນ ແລະ ການສ້າງພະນັກງານ; ພ້ອມກັນນັ້ນ, ຍັງໄດ້ລົງນາມບົດບັນທຶກຊ່ວຍຈໍາກ່ຽວກັບການເພີ່ມທະວີຮ່ວມມື ລະຫວ່າງ ສອງກະຊວງ ໃນຂົງເຂດການຄຸ້ມຄອງສິ່ງແວດລ້ອມ ແລະ ການປ່ຽນແປງສະພາບດິນຟ້າອາກາດ.
ສອງຝ່າຍ ໄດ້ປະສານສົມທົບກັນຢ່າງແໜ້ນແຟ້ນ ກັບບັນດາປະເທດສະມາຊິກຂອງຄະນະອະນຸກໍາມະການແມ່ນໍ້າຂອງສາກົນ, ບັນດາປະເທດ ແລະ ອົງການຈັດຕັ້ງສາກົນທີ່ກ່ຽວຂ້ອງ ເພື່ອຄຸ້ມຄອງ ແລະ ນໍາໃຊ້ແຫຼ່ງແມ່ນ້ໍາ ແລະ ຊັບພະຍາກອນຕ່າງໆທີ່ຕິດພັນຢ່າງເໝາະສົມ, ສະເໝີພາບ, ຍືນຍົງ ແລະ ມີປະສິດທິຜົນ;ປະສານສົມທົບກັບບັນດາປະເທດສະມາຊິກ ຈັດຕັ້ງຜັນຂະຫຍາຍຖະແຫຼງການຮ່ວມ ກ່ຽວກັບ ໂຄງການເຂື່ອນໄຟຟ້າ ຕາມແມ່ນ້ໍາຂອງ ແລະ ວຽກງານອື່ນໆ.
ສອງຝ່າຍໄດ້ຮ່ວມກັນປຶກສາຫາລື ແລະ ມີປະສິດທິຜົນຢູ່ບັນດາເວທີປາໄສຫຼາຍຝ່າຍ, ພິເສດແມ່ນໃນເວທີ ອາຊຽນ ແລະ ບັນດາກົນໄກນໍາພາໂດຍອາຊຽນ, ສະຫະປະຊາຊາດ, ASEM ແລະ ກົນໄກຮ່ວມມືອະນຸພາກພື້ນແມ່ນໍ້າຂອງ, ປະກອບສ່ວນຍາດແຍ່ງເອົາການຊຸກຍູ້ຊ່ວຍເຫຼືອຈາກພາຍນອກ ເພື່ອຮັບໃຊ້ໃຫ້ແກ່ການພັດທະນາຂອງແຕ່ລະປະເທດ ແລະ ຍົກສູງທີ່ຕັ້ງຂອງສອງປະເທດໃນເວທີສາກົນ.
ສັງລວມແລ້ວ, ການຮ່ວມມື ລະຫວ່າງ ລາວ ແລະ ຫວຽດນາມ ໃນປີ 2024 ຜ່ານມາ, ນັບແຕ່ຂັ້ນສູນກາງ,ບັນດາກະຊວງ,ອົງການ,ຂະແໜງການ, ບັນດາກໍາມາທິການສະພາແຫ່ງຊາດ, ອົງການຈັດຕັ້ງມະຫາຊົນ ແລະ ທ້ອງຖິ່ນຕ່າງໆ ໄດ້ສືບຕໍ່ຊຸກຍູ້ ແລະ ຈັດຕັ້ງປະຕິບັດຢ່າງຄ່ອງແຄ້ວ,ມີປະສິດທິຜົນ ແລະ ແທດຕົວຈິງ.ໂດຍຜ່ານການເຄື່ອນໄຫວແລກປ່ຽນຄະນະຜູ້ແທນໃນທຸກລະດັບ, ສ້າງຄວາມເຂົ້າອົກເຂົ້າໃຈແບບປະເທດອ້າຍນ້ອງ,ຄວາມສາມັກຄີແບບພິເສດການຮ່ວມມືຢ່າງຮອບດ້ານ, ແລກປ່ຽນບົດຮຽນ ແລະ ຊ່ວຍເຫຼືອຊຶ່ງກັນ ແລະ ກັນ. ບັນດາທ້ອງຖິ່ນທີ່ມີຊາຍແດນຕິດຈອດກັນລະຫວ່າງລາວ-ຫວຽດນາມ, ສືບຕໍ່ຮັດແໜ້ນຄວາມສາມັກຄີ, ພິເສດແມ່ນການກໍ່ສ້າງພື້ນຖານໂຄງລ່າງ,ວຽກງານການແພດ,ການພັດທະນາຊັບພະຍາກອນມະນຸດ,ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຢູ່ເຂດຊາຍແດນຂອງສອງປະເທດ.
ຄໍາເຫັນ