ແມ່ຍິງແຂວງວຽງຈັນ ເອົາໃຈໃສ່ຈັດຕັ້ງປະຕິບັດວຽກງານສຸຂະພາບຈະເລີນພັນ ໄດ້ຮັບຜົນສຳເລັດເປັນຢ່າງດີ

 ຈາກນີ້, ຍັງໄດ້ສົ່ງພະນັງງານວິຊາການ ຮ່ວມກັບພະແນກສາທາລະນະສຸກ ລົງໂຄສະນາເຜີຍແຜ່ກ່ຽວກັບການຮັກສາສຸຂະພາບຈະເລີນພັນຢູ່ບັນດາເມືອງ ເປັນຕົ້ນເມືອງທຸລະຄົມ, ເມືອງເຟືອງ ແລະ ເມືອງໝື່ນ ຊຶ່ງໄດ້ລົງໂຄສະນາເຜີຍແຜ່ ໃນໄລຍະຂອງການປ້ອງກັນການລະບາດຂອງພະຍາດໂຄວິດ-19, ໄດ້ໃຫ້ຄວາມຮູ້ກ່ຽວກັບການຮັກສາສຸຂະພາບຈະເລີນພັນ ເພື່ອໃຫ້ແມ່ຍິງມີສຸຂະພາບແຂງແຮງດີ, ໃຫ້ລູກມີການຈະເລີນເຕີບໂຕບໍ່ໄດ້ຮັບພະຍາດຕ່າງໆ.

ພ້ອມນັ້ນ, ສະຫະພັນແມ່ຍິງແຂວງວຽງຈັນ ຍັງໄດ້ປຸກລະດົມໃຫ້ປະຊາຊົນເຂົ້າຮ່ວມຮັບຟັງການແຜ່ລະບາດຂອງພະຍາດໄຂ້ໝາກແດງ, ພະຍາດຕາມລະດູການຕ່າງໆ. ສິ່ງສໍາຄັນແຕ່ລະຂັ້ນນັບແຕ່ສູນກາງລົງຮອດທ້ອງຖິ່ນ ແມ່ນເຫັນໄດ້ເຖິງຄວາມສໍາຄັນຂອງວຽກງານສຸຂະພາບຈະເລີນພັນ ແລະ ໄດ້ເອົາໃຈໃສ່ນໍາພາ-ຊີ້ນຳຈັດຕັ້ງປະຕິບັດວຽກງານດັ່ງກ່າວເປັນປະຈໍາ ສະຫະພັນແມ່ຍິງ ແລະ ພະແນກສາທາລະນະສຸກ ໄດ້ມີການປະສານສົມທົບໃນການລົງຈັດຕັ້ງປະຕິບັດວຽກງານສຸຂະພາບຈະເລີນພັນ ເຮັດໃຫ້ໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້; ປະຊາຊົນບັນດາເຜົ່າໄດ້ເອົາໃຈໃສ່ເຂົ້າຮ່ວມຮັບຟັງໃນການລົງໂຄສະນາວຽກງານດັ່ງກ່າວ ແລະ ມີການສົນທະນາຖາມ-ຕອບຂໍ້ຂ້ອງໃຈຕ່າງໆໃນການເບິ່ງແຍງສຸຂະພາບຕາມການແນະນໍາຂອງແພດໝໍ. ຕໍ່ບັນຫາດັ່ງກ່າວ ກໍຍັງມີຂໍ້ຫຍຸ້ງຍາກປະຊາຊົນບາງບ້ານ, ບາງເມືອງຈໍານວນໜຶ່ງ ບໍ່ໃຫ້ຄວາມຮ່ວມມືໃນການລົງຈັດຕັ້ງປະຕິບັດວຽກງານດັ່ງກ່າວໂດຍການບໍ່ມາເຂົ້າຮ່ວມກອງປະຊຸມເຜີຍແຜ່ວຽກງານດັ່ງກ່າວ, ພະນັກງານຂອງສະຫະພັນແມ່ຍິງທີ່ເຮັດວຽກງານນີ້ ມີປະສົບການໜ້ອຍ ແລະ ບໍ່ໄດ້ຮັບການຝຶກອົບຮົມກ່ອນການຈັດຕັ້ງປະຕິບັດ, ການຈັດຕັ້ງປະຕິບັດຍັງຂາດເຂີນທາງດ້ານງົບປະມານ (ງົບປະມານຍັງມີການຈຳກັດ) ເຮັດໃຫ້ບໍ່ມີງົບປະມານສະເພາະຈັດຕັ້ງປະຕິບັດໂດຍກົງ.

ທ່ານ ນາງ ສົມພອນ ສຸທໍາມະວົງ ກ່າວຕື່ມວ່າ: ເພື່ອເຮັດໃຫ້ວຽກງານສຸຂະພາບຈະເລີນພັນ ໄປໄດ້ດີຄວນເພີ່ມການລົງເຄື່ອນໄຫວ ໃຫ້ປະຊາຊົນໃນທົ່ວແຂວງວຽງວຽຈັນຕື່ມອີກຢ່າງໜ້ອຍໄຕມາດລະ 2 ຄັ້ງ ເພື່ອເປັນການເຕື່ອນສະຕິໃຫ້ປະຊາຊົນໃນການເບິ່ງແຍງສຸຂະພາບຕົນເອງ ແລະ ລູກ-ຫຼານ ໃຫ້ມີສຸຂະພາບທີ່ແຂງແຮງ ຫ່າງໄກຈາກພະຍາດຕ່າງໆ ແລະ ຝາກເຖິງປະຊາຊົນບັນດາເຜົ່າ ໃຫ້ພ້ອມກັນເອົາໃຈໃສ່ເບິ່ງແຍງສຸຂະພາບຂອງຕົນ ແລະ ລູກ-ຫຼານ ໂດຍກິນອາຫານທີ່ມີຄຸນໂຫຍດ ແລະ ໝັ່ນກວດເຊັກສຸຂະພາບ ພ້ອມທັງສັກຢາກັນພະຍາດຕ່າງໆຕາມແພດໝໍສັ່ງໃຫ້ຄົບຕາມຈໍານວນ ເພື່ອຫຼີກລ່ຽງຈາກພະຍາດລະບາດຕ່າງໆ.