ວິທະຍຸກະຈາຍສຽງຫວຽດນາມ ລາຍງານວ່າ: ໃນລະຫວ່າງວັນທີ 26 – 27 ມິຖຸນາຜ່ານມານີ້, ກອງປະຊຸມສຸດຍອດບັນດາການນຳສະຫະພາບ ເອີຣົບ (EU) ໄດ້ດຳເນີນຢູ່ບຣຸກແຊນ ປະເທດແບນຊິກ.

ຂ່າວສານຊີອາໄອລາຍງານວ່າ: ເວ​ທີ​ປຶກ​ສາ​ຫາ​ລື​ດາ​ໂວ​ສລະດູຮ້ອນຄັ້ງທີ 16ທີ່ຂຶ້ນຢູ່ນະ​ຄອນທຽນສິນ​ ປະເທດຈີນ ຫວ່າງບໍ່ດົນມານີ້, ການຫັນປ່ຽນ​​ດ້ານພະລັງງານ ແລະ ອຸດສາຫະກຳພະລັງງານສະອາດ ໄດ້ກາຍເປັນຫົວຂໍ້​ພົ້ນ​ເດັ່ນ​ທີ່ຜູ້​ເຂົ້າຮ່ວມໃ​ຫ້​ຄວາມ​ສົນ​ໃຈ.

ວິທະຍຸກະຈາຍສຽງຫວຽດນາມລາຍງານວ່າ: ພິທີສະຫຼຸບ ແລະ ມອບລາງວັນໂຄງການນະວັດຕະກຳ ກ່ຽວກັບພລາສຕິກ ປີ 2025 ໄດ້ຈັດຂຶ້ນຫວ່າງມໍ່ໆມາມານີ້ ທີ່ນະຄອນຫຼວງຢູ່ຮ່າໂນ້ຍ, ໂດຍກະຊວງກະສິກຳ ແລະ ສິ່ງແວດລ້ອມ, ໂຄງການພັດທະນາ ສປຊ ປະຈຳ ຫວຽດນາມ ຈັດຂຶ້ນ. ຕາມໂຕເລກຄາດຄະເນຂອງທະນາຄານໂລກ (WB) ທີ່ໄດ້ຍົກຂຶ້ນມາໃນພິທີ, ແຕ່ລະປີຫວຽດນາມ ມີຂີ້ເຫຍື້ອພລາສຕິກປະມານ 3.9 ລ້ານໂຕນ, ໃນນັ້ນມີ 0.28 – 0.73 ລ້ານໂຕນອອກສູ່ສິ່ງແວດລ້ອມທາງນ້ຳ ແລະ ມະຫາສະໝຸດ. ໃນໄລຍະຜ່ານມາ, ຫວຽດນາມ ໄດ້ສະແດງຄຳໝັ້ນສັນຍາຢ່າງແຮງຕໍ່ບັນດາການກະທຳລະອຽດລະດັບຊາດ ແລະ ສາກົນ. ໃນນັ້ນ, ນະວັດຕະກຳຖືວ່າແມ່ນໄມ້ງັດສຳຄັນເພື່ອຫັນບັນດາຄຳໝັ້ນສັນຍາໃຫ້ປະກົດຜົນເປັນຈິງ, ຜ່ານການຊອກບັນດາມາດຕະການໃໝ່, ເຕັກໂນໂລຊີໃໝ່ ແລະ ຮູບແບບດຳເນີນທຸລະກິດແບບຍືນຍົງ.

ຂ່າວຕ່າງປະເທດລາຍງານ ໃນວັນທີ 25 ມິຖຸນາ ຜ່ານມາວ່າ: ທ່ານ ມາເຊໂລ ເອບຣາດ ລັດຖະມົນຕີກະຊວງເສດຖະກິດຂອງເມັກຊິກ ກ່າວວ່າ: ເມັກຊິກ ແລະ ສະຫະລັດ ອາເມຣິກາ ໃກ້ຈະບັນລຸຂໍ້ຕົກລົງກ່ຽວກັບອັດຕາພາສີທີ່ສະຫະລັດ ອາເມຣິກາ ໄດ້ກໍານົດການນໍາເຂົ້າເຫຼັກ ແລະ ອາລູມິນຽມ.

ຂ່າວຕ່າງປະເທດລາຍງານຫວ່າງມໍ່ໆມານີ້ວ່າ: ນູແວນເຊລັງ ເປີດເຜີຍຍອດການຍື່ນຂໍວີຊາ Active Investor Plus visa ສໍາລັບນັກລົງທຶນຕ່າງປະເທດທີ່ຕ້ອງການຍ້າຍເຂົ້າປະເທດ ເພີ່ມຂຶ້ນຢ່າງວ່ອງໄວ. ໃນຂະນະທີ່ລັດຖະບານຕ້ອງການດຶງດູດກຸ່ມຄົນທີ່ມີຄວາມຮັ່ງມີໃຫ້ເຂົ້າມາຫຼາຍຂຶ້ນ ເພື່ອຊຸກຍູ້ການເຕີບໂຕດ້ານເສດຖະກິດຂອງປະເທດ.

ຂ່າວຕ່າງປະເທດລາຍງານໃນວັນທີ 25 ມິຖຸນາ ຜ່ານມາວ່າ: ອົງການສະຫະປະຊາຊາດ (UN) ກຽມຫຼຸດຈຳນວນພະນັກງານລົງ 20% ແລະ ພິຈາລະນາການປັບໂຄງສ້າງອົງການທີ່ກ່ຽວຂ້ອງຄືນ ໃໝ່ 140 ກວ່າອົງການ, ພາຍຫຼັງສະຫະລັດ ອາເມຣິກາ ຕັດງົບປະມານສະໜັບສະໜູນ.

ຂ່າວຕ່າງປະເທດລາຍງານ ໃນວັນທີ 24 ມິຖຸນາ ຜ່ານມາວ່າ: ກະຊວງກະສິກຳ, ປ່າໄມ້ ແລະ ການປະມົງຂອງຍີ່ປຸ່ນ ເປີດເຜີຍວ່າ, ລາຄາເຂົ້າສານຂາຍຍ່ອຍສະເລ່ຍໃນຍີ່ປຸ່ນ ໄດ້ຫຼຸດລົງເປັນ 3,000 ເຢນຕໍ່ 5 ກິໂລກຣາມ ຊຶ່ງຖືເປັນຄັ້ງທຳອິດໃນຮອບປະມານ 3 ເດືອນ.

ຂ່າວສານຊີອາໄອລາຍງານວ່າ: ກອງປະຊຸມປະຈຳປີຄັ້ງທີ 10 ຂອງຄະນະບໍລິຫານງານທະນາຄານການລົງທຶນພື້ນຖານໂຄງລ່າງອາຊີ ໄດ້ຈັດຂຶ້ນຢູ່ນະຄອນຫຼວງປັກກິ່ງ ປະເທດຈີນ ໃນລະຫວ່າງວັນທີ 24-26 ມິຖຸນານີ້, ໂດຍມີແຂກ ເຂົ້າຮ່ວມ 3.500 ກວ່າທ່ານ ທີ່ມາຈາກເກືອບ 100 ປະເທດ ແລະ ເຂດແຄວ້ນ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 25 ມິຖຸນາ ຜ່ານມາ, ໃນການເຂົ້າຮ່ວມວາລະສົນທະນານະໂຍບາຍ ຫົວຂໍ້ “ສັງກາດໃໝ່ຂອງ ຫວຽດນາມ: ຈາກວິໄສທັດໄປສູ່ການກະທຳ”, ໃນຂອບເຂດເວທີປາໄສເສດຖະກິດໂລກ (WEF) ຢູ່ ນະຄອນທຽນຊີນ ປະເທດຈີນ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ຕອບຄຳຖາມຫຼາຍຂໍ້ທີ່ກ່ຽວຂ້ອງເຖິງເສັ້ນທາງພັດທະນາຂອງ ຫວຽດນາມ ໃນສັງກາດໃໝ່. ວາລະສົນທະນາມີການເຂົ້າຮ່ວມຂອງທ່ານ ບອດ ເບຣດ (Borge Brende) ປະທານ ທັງເປັນຜູ້ອຳນວຍການໃຫຍ່ຝ່າຍບໍລິຫານ WEF ພ້ອມດ້ວຍຜູ້ແທນ 100 ກວ່າທ່ານ ຊຶ່ງເປັນຜູ້ຕາງໜ້າຂອງບັນດາລັດຖະບານ, ອົງການຈັດຕັ້ງ ແລະ ວິສາຫະກິດ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 24 ມິຖຸນາ ຜ່ານມາ, ເນື່ອງໃນໂອກາດທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ເຂົ້າຮ່ວມກອງປະຊຸມ WEF ທຽນຊີນ ແລະ ເຮັດວຽກຢູ່ ຈີນ, ທ່ານ ຟ້າມມິງຈິງ ໄດ້ມີການພົບປະກັບທ່ານ ຫຼີສຽງ ນາຍົກລັດຖະມົນຕີຈີນ. ໃນການພົບປະ, ນາຍົກລັດຖະມົນຕີສອງທ່ານເຫັນດີຕີລາຄາການພົວພັນລະຫວ່າງສອງພັກ, ສອງລັດ ທີ່ໄດ້ມີບັນດາບາດກ້າວຫັນປ່ຽນຢ່າງແຮງ, ແທດຈິງ ດ້ວຍຈຸດເດັ່ນທີ່ຕັ້ງໜ້າຫຼາຍຢ່າງ ເຊັ່ນ: ຄວາມໄວ້ເນື້ອເຊື່ອໃຈດ້ານການເມືອງໄດ້ຮັບການປັບປຸງ, ມີຫຼາຍກົນໄກຮ່ວມມືໃໝ່ໄດ້ຮັບການສ້າງຕັ້ງຂຶ້ນ, ການຮ່ວມມືດ້ານເສດຖະກິດ - ການຄ້າ, ການລົງທຶນ, ການທ່ອງທ່ຽວຮັກສາທ່ວງທ່າເຕີບໂຕ; ການຮ່ວມມືໃນການສ້າງເສັ້ນທາງລົດໄຟ, ການບິນກໍໄດ້ຮັບການຍູ້ແຮງເຊັ່ນດຽວກັນ.