ທ່ານ ພັນທະບູນ ວົງໄຊ ປັດຈຸບັນຢູ່ບ້ານໂພນຫໍ ເມືອງໂພນໂຮງ ແຂວງວຽງຈັນ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງໂພນໂຮງ ຄັ້ງທີ VIII ທີ່ຈັດຂຶ້ນເມື່ອບໍ່ດົນມານີ້: ຟາມຂອງຕົນຕັ້ງຢູ່ບ້ານໂພນຫໍ, ເມືອງໂພນໂຮງ ຊຶ່ງໄດ້ເລີ່ມຕົ້ນລ້ຽງມາແຕ່ປີ 2018 ຊຶ່ງໄດ້ຊື້ພໍ່ ແລະ ແມ່ພັນນຳເຂົ້າມາຈາກປະເທດໄທ ເປັນງົວລູກປະສົມບາມັນ ຈໍານວນ 40 ໂຕ. ໃນນີ້, ເປັນງົວແມ່ພັນຈໍານວນ 20 ໂຕ, ລູກງົວ 19 ໂຕ, ພໍ່ພັນ ຈໍານວນ 1 ໂຕ. ໃນປີ 2020 ໄດ້ຊື້ຕື່ມອີກ 5 ໂຕ. ເນື້ອທີ່ຂອງຟາມໃນການລ້ຽງງົວ ມີທັງໝົດແມ່ນ 35 ເຮັກຕາ. ໃນນັ້ນ, ໄດ້ແບ່ງອອກເປັນ 3 ສ່ວນ ຄື: ເນື້ອທີ່ຕັ້ງໂຮງເຮືອນ ແລະ ບ່ອນປ່ອຍງົວ 17 ເຮັກຕາ, ເນື້ອທີ່ປູກຫຍ້າເພື່ອຮອງຮັບໃນຟາມ 10 ເຮັກຕາ ແລະ ເນື້ອທີ່ປູກສະບຽງອາຫານ ແລະ ໄມ້ໃຫ້ໝາກ 8 ເຮັກຕາ.
ສຳລັບຫຍ້າ ທີ່ປູກຢູ່ໃນຟາມມີ 3 ຊະນິດ ຄື: ຫຍ້າລູຊີ, ຫຍ້າເນເປຍ, ຫຍ້າແພງໂກລາ, ຢາມລະດູແລ້ງ ແມ່ນໄດ້ໃຊ້ເຟືອງເປັນອາຫານສ່ວນໃຫຍ່. ນອກນີ້, ຍັງໄດ້ນຳໃຊ້ອາຫານເສີມຊ່ວຍເປັນຕົ້ນແມ່ນ ກາກນໍ້າຕານປະສົມກັບວິຕາມີນປະສົມນໍ້າຫົດເຟືອງ, ຂີ້ເບຍ ແລະ ຫົວອາຫານ. ຈາກການເລີ່ມຕົ້ນລ້ຽງໃນປີ 2018 ພາຍໃນຟາມມີພໍ່ ແລະ ແມ່ພັນ 45 ໂຕ ແຕ່ລະປີມີງົວນ້ອຍເກີດໃໝ່ປະມານ 15-20 ໂຕ ຊຶ່ງມາຮອດປັດຈຸບັນນີ້ໃນຟາມມີງົວທັງໝົດ ຈໍານວນ 113 ໂຕ ຊຶ່ງເປັນງົວລູກປະສົມບາມັນທັງໝົດ. ຊຶ່ງການຈໍາໜ່າຍແມ່ນໄດ້ເຂົ້າກຸ່ມສະມາຄົມງົວບາມັນແຫ່ງປະເທດລາວ ເພື່ອຈໍາໜ່າຍແນວພັນໃຫ້ປະຊາຊົນ ແລະ ສະມາຊິກໃນກຸ່ມທີ່ຕ້ອງການລ້ຽງງົວ. ສະເລ່ຍລາຍຮັບຈາກການຂາຍງົວ 150 ລ້ານກວ່າກີບ ແລະ ຂາຍຂີ້ງົວ ປະມານ 50 ລ້ານກວ່າກີບ ລວມລາຍຮັບທີ່ໄດ້ຈາກການຂາຍງົວ 200 ລ້ານກວ່າກີບຕໍ່ປີ.
(ຂ່າວ: ແກ້ວອຸດົມ)
ຄໍາເຫັນ