ມີຫຼາຍກວ່າ 20 ພາບ ວາງສະແດງໃນກິດຈະກໍາຊາສູ່ຄວາມປອງດອງ-ຍົກນໍ້າຊາບອກຮັກແມ່

ສູນວັດທະນະທໍາຈີນປະຈໍາ ສປປ ລາວ ໄດ້ຈັດກິດຈະກໍາຊາສູ່ຄວາມປອງດອງຂຶ້ນໃນວັນທີ 11 ພຶດສະພາຜ່ານມາທີ່ສູນດັ່ງກ່າວ ຊຶ່ງມີນັກຮຽນ “ເຮືອນຮຽນຮູ້ຮ່ວມສໍາລັບເດັກ” ຈໍານວນ 30 ຄົນ, ນັກຮຽນຈາກຫ້ອງຮຽນພາສາຈີນຂອງສູນພ້ອມທັງຄູ-ອາຈານ, ມວນຊົນທົ່ວໄປເຂົ້າຮ່ວມ. ປີ 2022 "ເຕັກນິກການເຮັດຊາແບບດັ່ງເດີມຂອງຈີນ ແລະ ຮີດຄອງປະເພນີທີ່ກ່ຽວຂ້ອງ" ໄດ້ຖືກຈົດເຂົ້າໃນບັນຊີລາຍຊື່ມໍລະດົກວັດທະນະທໍາ-ນາມມະທໍາຂອງມະນຸດຊາດຂອງອົງການອຸຍແນັດສໂກ (UNESCO), ຊາໄດ້ກາຍເປັນຂົວເຊື່ອມຕໍ່ລະຫວ່າງຈີນກັບບັນດາປະເທດທົ່ວໂລກ. 
ພາຍໃນຫ້ອງຮຽນ “ຊາສູ່ຄວາມປອງດອງ-ຍົກນໍ້າຊາບອກຮັກແມ່” ໄດ້ຖືກຕົບແຕ່ງດ້ວຍກິ່ນອາຍບູຮານຈີນ ໂດຍໄດ້ຮັບການຕອບຮັບທີ່ດີຈາກມວນຊົນທີ່ເຂົ້າຮ່ວມກິດຈະກຳຊຶ່ງພະນັກງານຂອງສູນວັດທະນະທໍາຈີນ ໄດ້ສວມໃສ່ຊຸດບູຮານຈີນ ພ້ອມກັບໃຫ້ການແນະນຳປະເພດຂອງຊາຈີນ, ແນະນຳຂັ້ນຕອນການຊົງຊາ, ສອນວິທີການຍົກນ້ຳຊາ ແລະ ຍັງໄດ້ມີການວາງສະແດງໃບຊາຂອງຈີນເຊັ່ນ: ຊາແດງ, ຊາຂຽວ, ຊາດຳ ແລະ ອື່ນໆທັງໝົດ 5 ປະເພດ ແລະ ຍັງໄດ້ສະແດງຊາຜົ້ງສາລີ 400 ປີຂອງລາວອີກດ້ວຍ.
    ເພື່ອເປັນການສະເຫຼີມສະຫຼອງວັນແມ່ສາກົນໃນວັນທີ 12 ພຶດສະພາຜ່ານມາ, ໄດ້ມີແມ່ ແລະ ລູກຮ່ວມກັນໃສ່ຊຸດຮັ່ນຟູ ແລະ ກີ່ເພົ້າເພື່ອມາເຂົ້າຮ່ວມກິດຈະກຳ. ບັນດາລູກໆທີ່ໄດ້ຮຽນຮູ້ວິທີການຍົກນ້ຳຊາ, ຕ່າງກໍໄດ້ຍົກນ້ຳຊາທີ່ສະອາດບໍລິສຸດ ແລະ ມອບຄຳອວຍພອນ “ສຸກສັນວັນແມ່” ໃຫ້ແມ່ ແລະ ຜູ້ອາວຸໂສຂອງຕົນເອງຢ່າງພາກພູມໃຈ. ທຸກຄົນຕ່າງກໍໄດ້ສຳຜັດວັດທະນະທຳຊາຂອງຈີນ ແລະ ສະແດງຄວາມຮັກທີ່ຍິ່ງໃຫຍ່ຕໍ່ກັບແມ່.ພາຍໃນງານມີນັກບັນລະຍາຍນໍາພາທຸກຄົນທີ່ເຂົ້າຮ່ວມຮັບຊົມນິທັດສະການຮູບພາບ “ກິ່ນຫອມຂອງຊາອັນເປັນມົນສະເໜ່”, ນິທັດສະການດັ່ງກ່າວ ໄດ້ຄັດເລືອກເອົາຮູບພາບທີ່ສະແດງໃຫ້ເຫັນເຖິງວັດທະນະທຳທີ່ກ່ຽວຂ້ອງກັບຊາເຊັ່ນ: ການເກັບຊາ, ກຳມະວິທີການເຮັດຊາ, ສິລະປະການຊົງຊາ, ການລິນຊາ, ສວນຊາ, ຫໍຊາ, ຂອງຫວ່າງທີ່ເຮັດດ້ວຍຊາ ແລະ ຮູບພາບທີ່ໜ້າຫຼົງໄຫຼອື່ນໆທັງໝົດ 25 ຮູບມາວາງສະແດງໃນກິດຈະກຳຄັ້ງນີ້ພ້ອມໄດ້ໃຫ້ຄຳເຫັນວ່າ, ກິດຈະກຳດັ່ງກ່າວມີຄວາມໜ້າສົນໃຈຫຼາຍ, ຊານົມໄຂ່ມຸກຈີນແຊບຫຼາຍ ແລະ ຫວັງວ່າສູນວັດທະນະທໍາຈີນຈະສືບຕໍ່ຈັດກິດຈະກຳດີໆແບບນີ້ຕໍ່ໄປໃນອະນາຄົດ.
ຂ່າວ-ພາບ: ຄໍາປະສົງ