ມອບ-ຮັບ ໜ້າທີ່ ແລະ ປະກາດການແຕ່ງຕັ້ງຄະນະກໍາມະການປົກຄອງແຂວງຄໍາມ່ວນ

ສະຫາຍ ວັນໄຊ ພອງສະຫວັນ ໄດ້ລາຍງານຫຍໍ້ກ່ຽວກັບການພັດທະນາເສດຖະກິດ-ສັງຄົມຂອງແຂວງ, ແຜນງົບປະມານແຫ່ງລັດ ແລະ ການຈັດຕັ້ງປະຕິບັດບັນດາຄາດໝາຍວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງແຂວງໄລຍະ 5 ປີ (2021 – 2025), ປະຈໍາປີ 2025 ແລະ ສະເໜີທິດທາງແຜນພັດທະນາເສດຖະກິດ-ສັງຄົມຂອງແຂວງ 5 ປີ ຄັ້ງທີ X (2026 – 2030) ແລະ ແຜນປີ 2026. ຈາກນັ້ນ, ກໍໄດ້ມີການເຊັນບົດບັນທຶກມອບ-ຮັບໜ້າທີ່ລະຫວ່າງ ສະຫາຍ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ສະຫາຍ ສົມສະອາດ ອຸ່ນສີດາ ປະທານຄະນະກໍາມະການປົກຄອງແຂວງຄໍາມ່ວນ ແລະ ປະກາດການແຕ່ງຕັ້ງຮອງປະທານຄະນະກໍາມະການປົກຄອງແຂວງຈໍານວນ 2 ສະຫາຍຄື: ແຕ່ງຕັ້ງສະຫາຍ ໝັ້ນຍືນ ຄິນສະໝອນ ຄະນະປະຈໍາພັກແຂວງ ຮອງປະທານຄະນະກໍາມະການປົກຄອງແຂວງ (ລົງເລິກຊີ້ນໍາຂົງເຂດວຽກງານເສດຖະກິດ); ແຕ່ງຕັ້ງສະຫາຍ ເດດສັກດາ ມະນີຄໍາ ຄະນະປະຈໍາພັກແຂວງ ຮອງປະທານຄະນະກໍາມະການປົກຄອງແຂວງ (ລົງເລິກຊີ້ນໍາຂົງເຂດວຽກງານວັດທະນະທໍາ-ສັງຄົມ). ນອກຈາກນັ້ນ, ຍັງໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກວ່າດ້ວຍການອະນຸມັດໃຫ້ພະນັກງານການນໍາຂອງແຂວງອອກພັກການ-ຮັບອຸດໝູນເຂົ້າບໍານານຈໍານວນ 6 ສະຫາຍ.

ໃນໂອກາດນີ້, ສະຫາຍ ບຸນທອງ ຈິດມະນີ ໄດ້ເນັ້ນໜັກໃຫ້ຄະນະກໍາມະການປົກຄອງແຂວງຊຸດໃໝ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານ-ສະມາຊິກພັກເປັນປົກກະຕິ, ການສັບປ່ຽນໜ້າທີ່ ກໍຄືການສັບຊ້ອນຈັດວາງຕຳແໜ່ງງານຕ່າງໆ ແລະ ການຮັບອຸດໜູນບໍານານ ຂອງພະນັກງານການນຳແຕ່ລະຂັ້ນ ແມ່ນວຽກງານປົກກະຕິ ທີ່ພວກເຮົາເຄີຍປະຕິບັດມາ, ແມ່ນການປະຕິບັດນະໂຍບາຍ ຕໍ່ພະນັກງານທຸກປະເພດ, ການຈັດວາງພະນັກງານ ຕ້ອງໄປຕາມຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ, ທັງເປັນຫຼັກການ ແລະ ລະບຽບການຂອງພັກເຮົາ; ໃຫ້ສືບຕໍ່ເສີມຂະຫຍາຍມູນເຊື້ອຄວາມສາມັກຄີພາຍໃນຄະນະປະຈຳພັກແຂວງ, ຄະນະບໍລິຫານງານພັກ ແລະ ຄະນະພັກແຕ່ລະຂັ້ນ ໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ສືບຕໍ່ເປັນຫຼັກແຫຼ່ງ,ເປັນຄັນທຸງ ແລະ ເປັນແກນນຳໃນການນຳພາເຕົ້າໂຮມຄວາມສາມັກຄີ ເປັນປຶກແຜ່ນ ໃນຖັນແຖວສະມາຊິກພັກ, ພະນັກງານ; ສືບຕໍ່ເອົາໃຈໃສ່ຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ ແລະ ກຽມພ້ອມປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມ 5 ປີແຫ່ງຊາດ ຄັ້ງທີ 10, ກໍຄືແຜນພັດທະນາເສດຖະກິດ-ສັງຄົມ ຂອງແຂວງ ແລະ ສອງວາລະແຫ່ງຊາດ ໃຫ້ເກີດຜົນເປັນຈິງ. ສືບຕໍ່ຫັນລົງກໍ່ສ້າງຮາກຖານການເມືອງ ຕິດພັນກັບວຽກງານພັດທະ ນາຊົນນະບົດຮອບດ້ານ-ແກ້ໄຂຄວາມທຸກຍາກຂອງປະຊາຊົນ ແລະ ວຽກງານ 3 ສ້າງ; ສຸມໃສ່ນໍາພາກະກຽມຄວາມພ້ອມທຸກຢ່າງ ໃນການສ້າງຕັ້ງຕາແສງ ເຊັ່ນ: ສະຖານທີ່ຕັ້ງຂອງຕາແສງ, ບຸກຄະລາກອນ ແລະ ກົງຈັກການຈັດຕັ້ງ ກໍຄືໜ່ວຍງານຕ່າງໆ ຂອງຕາແສງ, ກະກຽມກົນໄກ, ລະບອບ-ລະ ບຽບການເຮັດວຽກ ຂອງຕາແສງ ແລະ ວຽກອື່ນໆ . ຍົກສູງຄຸນນະພາບການປະຕິບັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ໃຫ້ເຂັ້ມແຂງ ແລະ ຖືວຽກງານນີ້ ເປັນໜ້າທີ່ພື້ນຖານ ທີ່ຕ້ອງໄດ້ເຮັດເປັນປະຈໍາຢ່າງບໍ່ລົດລະ ເພື່ອຮັບປະກັນຄວາມໝັ້ນຄົງ ຂອງປະເທດຊາດ ກໍຄືຂອງລະບອບການເມືອງຂອງພວກເຮົາ ດ້ວຍການສ້າງທ່າສະໜາມສາມຂັ້ນ, ສ້າງບ້ານປ້ອມໝັ້ນ, ກຸ່ມບ້ານສູ້ຮົບຕິດລຽນ, ບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ, ບ້ານປອດຢາເສບຕິດ ແລະ ເອົາໃຈໃສ່ສະກັດກັ້ນ ແລະ ແກ້ໄຂແຕ່ຫົວທີບັນດາໜໍ່ແໜງຄວາມບໍ່ສະຫງົບ ແລະ ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢ່າງເດັດຂາດ. ສືບຕໍ່ປັບປຸງລະບົບການເມືອງແຕ່ລະຂັ້ນ ຢ່າງຕໍ່ເນື່ອງ ໃຫ້ໜັກແໜ້ນ, ເຂັ້ມແຂງ ເປັນຕົ້ນ ຢູ່ຂັ້ນຮາກຖານ ເພື່ອຮັບປະກັນໃຫ້ແກ່ການຈັດຕັ້ງເຜີຍແຜ່ ແລະ ນໍາພາປະຕິບັດແນວທາງແຜນນະໂຍບາຍ, ມະຕິ-ຄໍາສັ່ງຂອງພັກ, ກົດໝາຍ ແລະ ລະບຽບການຕ່າງໆ ຂອງລັດ ໂດຍສຸມໃສ່ກໍ່ສ້າງປັບປຸງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ; ປັບປຸງຍົກສູງບົດບາດຄວາມສັກສິດ ຂອງອົງການອໍານາດລັດທຸກຂັ້ນ ໃຫ້ເຂັ້ມແຂງ. ສືບຕໍ່ເອົາໃຈໃສ່ຫຼາຍຂຶ້ນ ຕໍ່ວຽກງານສຶກສາອົບຮົມການເມືອງ-ນໍາພາແນວຄິດ ຂອງສະມາຊິກພັກ, ພະນັກງານ, ທະຫານ-ຕໍາຫຼວດ ແລະ ປະຊາຊົນບັນດາເຜົ່າ ໃຫ້ເຊື່ອມຊຶມ, ຮັບຮູ້-ເຂົ້າໃຈ ແນວທາງນະໂຍບາຍ ແລະ ມະຕິ -ຄໍາສັ່ງ ຂອງພັກ-ລັດ ແລະ ລະບຽບ-ກົດໝາຍຂອງລັດ .

(ຂ່າວ-ພາບ: ແດງສະຫວັດ ແສນພານິດ)