ມອບ-ຮັບ ໜ້າທີ່ຮັກສາການປະທານສານປະຊາຊົນສູງສຸດ

ໃນພິທີທີ່ມີຄວາມສຳຄັນຄັ້ງນີ້, ສະຫາຍ ນາງ ສີໃສ ລືເດດມູນສອນ ໄດ້ມີຄຳເຫັນໂອ້ລົມ ຊຶ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ປະທານສານປະຊາຊົນສູງສຸດຜູ້ເກົ່າ ທີ່ໄດ້ຕັ້ງໜ້າຈັດປະຕິບັດບັນດາໜ້າທີ່ວຽກງານທີ່ຮັບຜິດຊອບມີຜົນສຳເລັດຫຼາຍດ້ານ ແລະ ເພື່ອສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ມະຕິກອງປະຊຸມໃຫຍ່ ອົງຄະນະພັກສານປະຊາຊົນສູງສຸດ ໃຫ້ມີຜົນສໍາເລັດຕາມລະດັບຄາດໝາຍໃຫ້ບັນດາສະຫາຍຈົ່ງພ້ອມກັນເອົາໃຈໃສ່ຕື່ມບາງດ້ານດັ່ງນີ້:

1. ມອບໃຫ້ບັນດາສະຫາຍຄະນະພັກ, ການນໍາທຸກຂັ້ນ ຂອງສານປະຊາຊົນ ສືບຕໍ່ເສີມຂະຫຍາຍມູນເຊື້ອຄວາມສາມັກຄີ ພາຍໃນພັກ, ຄະນະປະຈໍາພັກ ໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ສືບຕໍ່ເປັນຫຼັກແຫຼ່ງ, ເປັນຄັນທຸງ ແລະ ເປັນແກນນໍາ ໃນການເຕົ້າໂຮມຄວາມສາມັກຄີ ໃນຖັນແຖວພະນັກງານ-ສະຊິກພັກ; ເອົາໃຈໃສ່ຈັດຕັ້ງຜັນຂະຫຍາຍແນວທາງ, ນະໂຍບາຍ, ມະຕິກອງປະຊຸມໃຫຍ່ ຄັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກສານປະຊາຊົນສູງສຸດ, ແຜນພັດທະນາວຽກງານສານປະຊາຊົນ ໃນ 5 ປີ ຕໍ່ໜ້າ ກໍຄືທິດທາງແຜນການວາງອອກ ໃຫ້ສະມາຊິກພັກ, ພະນັກງານທົ່ວຂະແໜງສານປະຊາຊົນ ມີຄວາມຮັບຮູ້, ເຂົ້າໃຈ ຢ່າງເປັນເອກະພາບ ແລະ ນໍາໄປຈັດຕັ້ງຜັນຂະຫຍາຍເປັນແຜນການ, ແຜນງານ, ກິດຈະກໍາ, ປະຕິບັດໃຫ້ແທດເໝາະກັບສະພາບຄວາມເປັນຈິງຂອງສານແຕ່ລະຂັ້ນ ເພື່ອປະຕິບັດພາລະບົດບາດ, ສິດ ແລະ ໜ້າທີ່ ຂອງສານປະຊາຊົນ ຕາມທີ່ກໍານົດໃນລັດຖະທໍາມະນູນ, ກົດໝາຍວ່າດ້ວຍສານປະຊາຊົນ, ກົດໝາຍ ແລະ ນິຕິກໍາອື່ນໆທີ່ກ່ຽວຂ້ອງ ໃຫ້ມີຜົນສໍາເລັດ ຕາມຄໍາຂວັນ ຂອງສານປະຊາຊົນ ທີ່ວ່າ: “ບໍລິການດີ-ມີວິໄນ, ຕັດສິນວ່ອງໄວ-ໂປ່ງໃສ-ທ່ຽງທໍາ, ກວດກາເຂັ້ມງວດ ແລະ ທັນການ”, 2. ສືບຕໍ່ເອົາໃຈໃສ່ປະຕິບັດຫຼັກການນຳພາຂອງພັກຢ່າງເຂັ້ມງວດ, ມີການແບ່ງງານ, ແບ່ງຄວາມຮັບຜິດຊອບພາຍໃນຄະນະພັກຢ່າງຈະແຈ້ງ, ມີລະບອບປະຊຸມປຶກສາຫາລືເປັນເອກະພາບພາຍໃນຄະນະພັກ ກໍຄືຄະນະນຳທຸກຂັ້ນ, ເພື່ອເຮັດສໍາເລັດໜ້າທີ່ທີ່ຖືກມອບໝາຍເພື່ອຮັບໃຊ້ປະຊາຊົນ, ຮັບໃຊ້ພາລະກິດປະຕິວັດຂອງພັກ, ພ້ອມກັນພັດທະນາສ້າງສານປະຊາຊົນນັບມື້ໄດ້ຮັບການປັບປຸງດີຂຶ້ນເລື້ອຍໆ, 3. ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ ໃນທົ່ວລະບົບການຈັດຕັ້ງຂອງສານປະຊາຊົນໃຫ້ມີຄຸນທາດການເມືອງ, ຄຸນສົມບັດສິນທໍາປະຕິວັດ, ມີຈັນຍາບັນ, ຈັນຍາທໍາ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບການມອບໝາຍ ແລະ ດໍາລົງຊີວິດປອດໃສຂາວສະອາດ ເພື່ອພ້ອມກັນຮັບໃຊ້ປະຊາຊົນດ້ວຍຄວາມຍຸຕິທໍາ ແລະ ຊື່ສັດບໍລິສຸດ, 4.ເອົາໃຈໃສ່ສ້າງ ແລະ ປັບປຸງກົດໝາຍ ແລະ ນິຕິກຳໃຕ້ກົດໝາຍ ໃນຂອບເຂດສານປະຊາຊົນ ເພື່ອເປັນບ່ອນອີງ ແລະ ຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ ຂອງສານປະຊາຊົນແຕ່ລະຂັ້ນ ໃຫ້ເປັນເອກະພາບ, ຖືກຕ້ອງ ແລະ ມີຜົນສັກສິດ, 5. ເອົາໃຈໃສ່ກໍ່ສ້າງ, ບໍາລຸງ ຜູ້ພິພາກສາແຕ່ລະຊັ້ນໃຫ້ມີຄວາມຮູ້, ຄວາມສາມາດ, ມີມາດຕະຖານ, ເງື່ອນໄຂທີ່ຄົບຖ້ວນ, ມີແນວຄິດການເມືອງທີ່ໜັກແໜ້ນ, ສາມາດພິພາກສາຕັດສິນຄະດີຢ່າງມີຄວາມຍຸຕິທໍາ ພ້ອມທັງວາງມາດຕະການທີ່ເດັດຂາດ ຕໍ່ຜູ້ພິພາກສາທີ່ມີພຶດຕິກຳທີ່ເຂົ້າຂ້າງອອກຂາ, ບໍ່ໂປ່ງໃສໃນການດຳເນີນຄະດີ, ຜູ້ພິພາກສາທີ່ໄດ້ຮັບການຮ້ອງຟ້ອງສ່ອງແສງເຖິງພຶດຕິກໍາຮຽກເກັບເງິນຈາກປະຊາຊົນ ກໍຕ້ອງໄດ້ຮັບການກວດສອບ ແລະ ວາງລະບຽບການ, ມາດຕະການ ເພື່ອຄຸ້ມຄອງ, ອັດຊ່ອງວ່າງ ແລະ ຫາວິທີການແກ້ໄຂ ເພື່ອເຮັດໃຫ້ຜູ້ພິພາກສາລວມທັງພະນັກງານຂອງສານປະຊາຊົນທຸກຂັ້ນເປັນຜູ້ມີຈັນຍາບັນ, ຈັນຍາທຳ, ມີຄວາມຍຸຕິທໍາ, ວ່ອງໄວ, ໂປ່ງໃສ, ກວດກາໄດ້ໃນການປະຕິບັດໜ້າທີ່ຕັດສິນພິພາກສາ ເອົາຄວາມເປັນທຳມາໃຫ້ປະຊາຊົນ, ເຮັດໃຫ້ປະຊາ ຊົນ ມີຄວາມເຊື່ອໝັ້ນສັດທາຕໍ່ລະບົບສານປະຊາຊົນທຸກຂັ້ນ, 6. ຍົກສູງຄວາມເປັນແບບຢ່າງນໍາໜ້າ, ຄວາມສາມາດການນໍາພາ ຂອງຄະນະພັກ, ຄະນະນຳ, ພະນັກງານຫຼັກແຫຼ່ງ ໃຫ້ເຂັ້ມແຂງຮອບດ້ານ; ເດັດດ່ຽວແກ້ໄຂບັນດາປະກົດການຫຍໍ້ທໍ້ ພາຍໃນການຈັດຕັ້ງສານປະຊາຊົນແຕ່ລະຂັ້ນ ຄຽງຄູ່ກັບການເພີ່ມທະວີການເຄື່ອນໄຫວວຽກງານການເມືອງ-ແນວຄິດ ຕິດພັນກັບການດໍາເນີນຊີວິດການເມືອງ ປັບປຸງປົວແປງພາຍໃນຢ່າງຕໍ່ເນື່ອງ, ຕ້ານແນວຄິດຄອງເດີມ, ທັດສະນະການເມືອງທີ່ຜິດເຂວ, ສະພາບການຖືເບົາໃນການພັດທະນາຕົນເອງ, ຖືເບົາຕໍ່ໜ້າທີ່ຄວາມຮັບຜິດຊອບດ້ານການເມືອງ ແລະ ວຽກງານວິຊາສະເພາະຂອງຖັນແຖວສະມາຊິກພັກ, ຜູ້ພິພາກສາ, ພະນັກງານ-ລັດຖະກອນ ກໍຄືບັນຫາອື່ນໆ ໃຫ້ໄດ້ຮັບການແກ້ໄຂ ແລະ ຕີຖອຍເທື່ອລະກ້າວ.

(ຂ່າວ: ຕຸໄລເພັດ)