ມອບ-ຮັບ ວຽກຂຶ້ນທະບຽນອອກໃບຕາດິນ ແລະ ການປ່ຽນແປງສິດນໍາໃຊ້ທີ່ດິນ

ພິທີມອບ-ຮັບວຽກງານຂຶ້ນທະບຽນອອກໃບຕາດິນ, ວຽກຈົດທະບຽນການເຄື່ອນໄຫວ ແລະ ການປ່ຽນແປງສິດນໍາໃຊ້ທີ່ດິນ ໃຫ້ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ ປາກລາຍແຂວງໄຊຍະບູລີເປັນຜູ້ຈັດຕັ້ງປະຕິບັດ ຈັດຂຶ້ນໃນວັນທີ 15 ມັງກອນ ນີ້ພາຍໃຕ້ການເປັນປະທານຂອງ ທ່ານ ບຸນລັບ ແສງອາພອນ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ທ່ານ ຄຳຝັ້ນ ວົງສະຫວັນ ຮອງເຈົ້າເມືອງປາກລາຍ, ມີພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ນາງ ຟອງສະມຸດ ແກ້ວບົວ ຫົວໜ້າຂະແໜງທີ່ດິນ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ໄດ້ໃຫ້ຮູ້ວ່າ: ການມອບ-ຮັບວຽກງານດັ່ງກ່າວ ເປັນການຈັດຕັ້ງຜັນຂະຫຍາຍ ກົດໝາຍວ່າດ້ວຍ ທີ່ດິນສະບັບປັບປຸງ, ທັງຮັບປະກັນຄວາມສະດວກວ່ອງໄວ ໃນການບໍລິການປະຊາຊົນ ແລະ ປະຕິບັດຕາມຂໍ້ຕົກລົງສະບັບເລກທີ 1667/ຈຂ, ລົງວັນທີ 5 ທັນວາ 2023 ຊຶ່ງວຽກງານຂຶ້ນທະບຽນອອກໃບຕາດິນຢ່າງເປັນລະບົບ ແລະ ການຂຶ້ນທະບຽນອອກໃບຕາດິນຕາມຄຳຮ້ອງຂໍຂອງເຈົ້າຂອງສິດນຳໃຊ້ທີ່ດິນ ແມ່ນສົມທົບກັບອົງການປົກຄອງບ້ານ, ການສຳຫຼວດວັດແທກ, ການສອບຖາມສິດ, ການເກັບກຳຂໍ້ມູນການໄດ້ມາຂອງສິດຄອບຄອງ ແລະ ສິດນຳໃຊ້ທີ່ດິນ, ອອກແຈ້ງການຫາຜູ້ຄັດຄ້ານ, ພິຈາລະນາຂຶ້ນທະບຽນອອກໃບຕາດິນຕອນດັ່ງກ່າວ, ຕາມກົດໝາຍວ່າດ້ວຍທີ່ດິນ ມາດຕາ 101; ວຽກງານຈົດທະບຽນທີ່ດິນການເຄື່ອນໄຫວສິດນຳໃຊ້ທີ່ດິນ ເຊັ່ນ: ກວດກາຊຸດເອກະສານ, ການບັນທຶກ, ການອອກເອກະສານຢັ້ງຢືນກ່ຽວກັບໃບຕາດິນ, ການຢັ້ງຢືນສິດນໍາໃຊ້ທີ່ດິນທີ່ເຈົ້າຂອງສິດນໍາໃຊ້ທີ່ດິນໄດ້ເອົາໃຫ້ເຊົ່າ, ເປັນຫລັກຊັບຄໍ້າປະກັນ, ຂາຍຝາກ ແລະ ການເຄື່ອນ ໄຫວສິດນໍາໃຊ້ທີ່ດິນອື່ນໆຕາມມາດຕາ 104 ຂອງກົດໝາຍວ່າດ້ວຍທີ່ດິນ; ວຽກງານຈົດທະບຽນປ່ຽນແປງສິດນຳໃຊ້ທີ່ດິນ, ການປະກອບຊຸດສຳນວນຕອນດິນຄືນໃໝ່, ການແບ່ງແຍກຕອນດິນ, ການໂຮມຕອນດິນ, ການໂອນສິດນຳໃຊ້ທີ່ດິນ, ການບັນທຶກ ແລະ ຢັ້ງຢືນການປ່ຽນແປງສິດນຳໃຊ້ທີ່ດິນຈາກເຈົ້າຂອງສິດນຳໃຊ້ທີ່ດິນເດີມໄປໃຫ້ຜູ້ອື່ນ ດ້ວຍການສືບທອດມູນມໍລະດົກ, ຊື້-ຂາຍ, ເອົາເຂົ້າເປັນຫຸ້ນ, ມອບ ຫຼື ການຍົກສິດນໍາໃຊ້ທີ່ດິນ, ແລກປ່ຽນ, ຖອນ ຫຼື ໂອນສິດນໍາໃຊ້ທີ່ດິນຄືນ, ທາດສະພາບກົດໝາຍ, ຕາມຄຳຕັດສິນຂອງສານ ຕາມມາດຕາ 105 ຂອງກົດໝາຍວ່າດ້ວຍທີ່ດິນ; ການສຳເນົາໃບຕາດິນຄືນໃໝ່ ເພື່ອທົດແທນໃບຕາດິນທີ່ເສຍຫາຍ ຫຼື ຖືກທຳລາຍນັ້ນ ໃຫ້ປະຕິບັດຕາມ ມາດຕາ 103 ຂອງກົດໝາຍວ່າດ້ວຍທີ່ດິນ.
ມອບໃຫ້ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງຄິດໄລ່ຄ່າທຳນຽມ ແລະ ຄ່າບໍລິການກ່ຽວກັບທີ່ດິນ ວຽກງານຂຶ້ນທະບຽນອອກໃບຕາດິນ, ການຈົດທະບຽນເຄື່ອນໄຫວສິດນຳໃຊ້ທີ່ດິນ ແລະ ການຈົດທະບຽນປ່ຽນແປງສິດນຳໃຊ້ທີ່ດິນ ຕາມລັດຖະບັນຍັດ ເລກທີ 002/ປປທ, ລົງວັນທີ 17 ມິຖຸນາ 2021 ພ້ອມທັງປະສານສົມທົບກັບຫ້ອງການ-ການເງິນເມືອງໃນການມອບງົບປະມານດັ່ງກ່າວ ເຂົ້າງົບປະມານຂອງລັດ ໃຫ້ຖືກຕ້ອງຕາມລະບຽບກົດໝາຍ; ບັນດາສໍານວນເອກະສານຕອນດິນແມ່ນມອບໃຫ້ເມືອງຄຸ້ມຄອງເຂົ້າສູ່ລະບົບ ແລະ ຮັບປະກັນໃຫ້ບັນດາສໍານວນຕອນດິນມີການຄຸ້ມຄອງຢ່າງມີປະສິດທິພາບ, ຖືກຕ້ອງ ແລະ ຍາວນານ, ເກັບຮັກສາສຳນວນຕອນດິນ, ຂໍ້ມູນລະບົບຖານຕອນດິນໄວ້ໃຫ້ປອດໄພ ສາມາດຕິດຕາມສະພາບການເຄື່ອນໄຫວ ແລະ ປ່ຽນແປງຂອງສິດນຳໃຊ້ໃນແຕ່ລະໄລຍະ. ສ່ວນບັນດາສໍານວນເອກະສານຕອນດິນ, ແຜນທີ່ໂອເວີເລ່ທີ່ຢູ່ໃນການຄຸ້ມຄອງຂອງແຂວງ ແມ່ນຈະໄດ້ຈັດສົ່ງໃຫ້ເມືອງຕາມຫລັງ ເພື່ອໃຫ້ເມືອງສືບຕໍ່ຄຸ້ມຄອງ ແລະ ນໍາໃຊ້ ແລະ ອື່ນໆ.
ຂ່າວ-ພາບ: ດາວປະດິດ ເສດຖາລາດ