ມອບ-ຮັບໜ້າທີ່ ເລຂາພັກເມືອງເຈົ້າເມືອງປາກລາຍ

ພີທີ ມອບ-ຮັບໜ້າທີ່ລະຫວ່າງເລຂາພັກເມືອງເຈົ້າເມືອງຜູ້ເກົ່າ ແລະ ເລຂາພັກເມືອງວ່າການເຈົ້າເມືອງ ປາກລາຍ ຜູ້ໃໝ່ ໄດ້ຈັດຂຶ້ນໃນວັນທີ 9 ມັງກອນ ນີ້ທີ່ເມືອງປາກລາຍໂດຍການເປັນກຽດ ເຂົ້າຮ່ວມ ຂອງທ່ານ ພົງສະຫວັນ ສິດທະວົງ ກໍາມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງ ໄຊຍະບູລີ, ມີການນໍາຂອງແຂວງ, ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄພທອງ ຈັນດາ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກການຮັບອູດໜູນບໍານານ ໂດຍເຫັນດີໃຫ້ ທ່ານ ກອງສີ ວົງສີ ກໍາມະການພັກແຂວງເລຂາພັກເມືອງເຈົ້າເມືອງປາກລາຍ ອອກພັກການຮັບອູດໜູນບໍານານ, ມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການບົ່ງຕົວແຕ່ງຕັ້ງ ເລຂາພັກເມືອງປາກລາຍ, ໂດຍບົ່ງຕົວແຕ່ງຕັ້ງ ທ່ານ ບຸນຫຼາຍ ວົງດາລາ ຮອງເລຂາຄະນະບໍລິຫານງານພັກເມືອງປາກລາຍ ຂຶ້ນເປັນເລຂາຄະນະບໍລິຫານງານພັກເມືອງ, ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງ ວ່າການເຈົ້າເມືອງປາກລາຍ, ເຈົ້າແຂວງຕົກລົງແຕ່ງຕັ້ງ ທ່ານ ບຸນຫຼາຍ ວົງດາລາ ຂຶ້ນເປັນວ່າການເຈົ້າເມືອງປາກລາຍ.
ທ່ານ ພົງສະຫວັນ ສິດທະວົງ ໄດ້ໃຫ້ກຽດໂອ້ລົມ, ພ້ອມທັງໄດ້ເນັ້ນໜັກໃຫ້ພະນັກງານຫຼັກແຫຼ່ງຂອງເມືອງຕ້ອງເປັນເອກະພາບນຳການຈັດຕັ້ງຂັ້ນເທິງ, ຕໍ່ການສັບປ່ຽນເຈົ້າເມືອງ, ພ້ອມກັນນັ້ນໃຫ້ການນຳເມືອງນຳພາແນວຄິດຂອງພະນັກງານ-ສະມາຊິກພັກ ຢູ່ແຕ່ລະຫ້ອງການ, ແຕ່ລະບ້ານ ຕະຫຼອດຮອດປະຊາຊົນບັນດາເຜົ່າ ໄດ້ເຂົ້າໃຈ ແລະ ຮັບຮູ້ຢ່າງທົ່ວເຖິງ ບໍ່ໃຫ້ມີການເຂົ້າໃຈໄປແງ່ອື່ນ, ທີ່ຈະເປັນການທັບຖົມ-ໂຈມຕີ, ອັນໃດເປັນຜົນສຳເລັດ ກໍໃຫ້ພ້ອມກັນປົກປັກຮັກສາ ແລະ ເສີມຂະຫຍາຍໃຫ້ດີຂຶ້ນ, ອັນໃດຍັງເຫັນວ່າເປັນຈຸດອ່ອນຄົງຄ້າງ, ປະຕິບັດບໍ່ທັນໄດ້ດີ ກໍຕ້ອງໄດ້ພ້ອມກັນສືບຕໍ່ປັບປຸງແກ້ໄຂ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອຄວາມສາມັກຄີພາຍໃນພັກ, ໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ສືບຕໍ່ເປັນຫຼັກແຫຼ່ງ, ເປັນຄັນທຸງ ແລະ ເປັນແກນນຳໃນການເຕົ້າໂຮມຄວາມສາມັກຄີໃນຖັນແຖວພະນັກງານ-ສະມາຊິກພັກ ແລະ ປະຊາຊົນບັນດາເຜົ່າ, ພ້ອມກັນນັ້ນ ກໍຕ້ອງໄດ້ຊ່ວຍເຫຼືອ, ໃຫ້ການຮ່ວມມື ແລະ ໃຫ້ການສະໜັບສະໜູນ ເລຂາພັກເມືອງ, ວ່າການເຈົ້າເມືອງຄົນໃໝ່ ໃນການເຮັດໜ້າທີ່ໃຫ້ມີຜົນສໍາເລັດ, ສໍາລັບຜູ້ທີ່ຖືກແຕ່ງຕັ້ງຄັ້ງນີ້ ຕ້ອງຕັ້ງໜ້າຝຶກຝົນຫຼໍ່ຫຼອມຕົນເອງໃນທຸກດ້ານ, ຕ້ອງເຊີດຊູ, ຍົກສູງຄວາມຮັບຜິດຊອບ ໜ້າທີ່ການເມືອງ ທີ່ໄດ້ຮັບການມອບໝາຍໃຫ້ສູງຂຶ້ນກວ່າເກົ່າ, ເສີມຂະຫຍາຍ, ມີຫົວຄິດປະດິດສ້າງກ້າຄິດ, ກ້າເວົ້າ, ກ້າເຮັດ, ກ້າຮັບຜິດຊອບຕໍ່ຜົນສຳເລັດ ແລະ ຂໍ້ຂາດຕົກບົກຜ່ອງຂອງວຽກງານ, ເສີມກໍາລັງແຮງມະຫາຊົນ, ກໍາຈັດປັດເປົ່າພະຍາດຫ່າງເຫີນມະຫາຊົນ, ພະຍາດອາດຍາສິດ, ຕ້ອງເດັດຂາດຕ້ານ ແລະ ສະກັດກັ້ນການສໍ້ລາດບັງຫຼວງ.
ຂ່າວ-ພາບ: ນັກຂ່າວເມືອງປາກລາຍ