 |
ທ່ານ ແກ້ວອຸໄທ ເບົ້າສະຫວັນ ຮອງເລຂາໜ່ວຍຊາວໜຸ່ມຮາກຖານ ສານປະຊາຊົນ ພາກເໜືອ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2022-2024 ແລະ ທິດທາງແຜນການ ປີ 2025 ວ່າ: ຜ່ານມາຄະນະໜ່ວຍຊາວໜຸ່ມ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກ ໃຫ້ມີຄວາມອຸ່ນອ່ຽນ-ທຸ່ນທ່ຽງ ເຊື້ອໝັ້ນຕໍ່ການນຳພາຂອງພັກ, ເອົາໃຈໃສ່ຕໍ່ໜ້າທີ່ການເມືອງທີ່ໄດ້ມອບໝາຍ, ເຂົ້າຮ່ວມຂະບວນການ ຂອງຄະນະບໍລິຫານງານຊາວໜຸ່ມຈັດຂຶ້ນທຸກຄັ້ງ ດ້ວຍຄວາມຫ້າວຫັນ ແລະ ເປັນເຈົ້າການ. ປຸກລະດົມ, ສົ່ງເສີມສະມາຊິກ ສ້າງວຽກເຮັດງານທຳນອກໂມງການ ຈົນເກີດມີຄອບຄົວຕົວແບບເຊັ່ນ: ຄອບຄົວທ່ານ ທອງວັນ ຢົງທາຊົ່ງ ຕົວແບບໃນການປູກຢາງພາລາ ສາມາດສ້າງລາຍຮັບ 15 ລ້ານກີບຕໍ່ປີ. ຈາກນັ້ນ, ຕາງໜ້າຄະນະໜ່ວຍຊາວຮາກຖານ ໄດ້ຂຶ້ນຈັບມືກັນແຂ່ງຂັນ ການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜູ່ມໃນປີຕໍ່ໜ້າ ຕື່ມອີກ. ໂອກາດນີ້, ຕາງໜ້າ ຄະນະບໍລິຫານງານຊາວໜຸ່ມແຂວງ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການອະນຸມັດ ມອບທຸງໄຊນຳໜ້າຂະບວນການແຂ່ງຂັນ 4 ບຸກ, ຂໍ້ຕົກລົງຮາກຖານຊາວໜຸ່ມ 4 ບຸກ, ຂໍ້ຕົກລົງຂອງຄະນະບໍລິຫານງານສູນກາງຊາວໜຸ່ມ ວ່າດ້ວຍການປະດັບຫຼຽນກາລະນຶກຄົບ 65 ປີ ວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ ແລະ ຂໍ້ຕົກລົງຂອງຄະນະບໍລິຫານງານ ສູນກາງຊາວໜຸ່ມ ວ່າດ້ວຍການຍ້ອງຍໍບຸກຄົນທີ່ມີຜົນງານດີເດັ່ນ 3 ປີຜ່ານມາ. ໃຫ້ກຽດມອບທຸງໄຊ ແລະ ຂໍ້ຕົກລົງໂດຍ ທ່ານ ສົມໃຈ ຢາທໍ່ຕູ້. ຕອນທ້າຍ, ໄດ້ມີການເປີດປ້າຍຊາວໜຸ່ມ 4 ບຸກ ແລະ ລັ່ນຄ້ອງ 9 ບາດເພື່ອເປັນສິລິມຸງຄຸນ ຕື່ມອີກ.
 |
(ພາບ-ຂ່າວໂດຍ: ດາວອນ ມະນີວັນ)
ຄໍາເຫັນ