ມວນຊົນຊາວຫຼວງພະບາງ ອັງເຊີນອົງພະບາງພຸດທະຣາວັນ ກັບຄືນປະດິດສະຖານທີ່ຫໍພະບາງ

 ໃນຕອນເຊົ້າວັນທີ່ 20 ເມສາ ເລີ້ມຕົ້ນດ້ວຍການທຳພິທີທາງສາສະໜາ ໂດຍພະເຖລາ ນຸເຖຣະ ນຳພາອອກຕົນຍາດໂຍມ ຊາວພຸດທະສາຊະນິກະຊົນທີ່ເຂົ້າຮ່ວມ ກ່າວຄຳຄາລະວະ ແລະອາລາດຖະນາອົງພະບາງ ກັບຄືນສູ່ຫໍພະບາງ. ຈາກນັ້ນ, ໄດ້ອັງເຊີນອົງພະບາງຂຶ້ນປະທັບໃນຫວໍ່ເທີງລາດສະລົດ ຫຼື ບຸດສະບົກ ແລ້ວໄດ້ມີຂະບວນແຫ່ ຈາກວັດໃໝ່ສຸວັນນະພູມມາຣາມ ສູ່ຫໍພະບາງໃນຫໍພິພິທະພັນແຫ່ງຊາດຫຼວງພະບາງ ເລີ້ມຕົ້ນດ້ວຍຂະບວນທຸງຊາດ, ທຸງສາສະໜາ, ຂະບວນເສບດົນຕີພື້ນເມືອງ, ຂະບວນພາມມະນາຈານ, ຂະບວນເປົ່າຫອຍສັງ, ຂະບວນພະເຖຣະ 9 ອົງ, ຂະບວນກອງຄຸມ-ທຽນອາດ-ຣາດສະລົດພະບາງ, ຂະບວນພະເຖຣານຸເຖຣະ, ຂະບວນການນຳ ນຳໂດຍ ທ່ານ ບຸນເລື່ອມ ມະນີວົງ ປະທານສະພາປະຊາຊົນແຂວງຫຼວງພະບາງ, ພ້ອມດ້ວຍ ຂະບວນມວນຊົນທົ່ວໄປ. ແຕ່ລະຂະບວນແມ່ນ ມີເອກະລັກແບບດັ່ງເດີມ ຮັກສາໄດ້ມູນເຊື້ອ ທາງດ້ານວັດທະນະທຳອັນດີງາມຂອງຊາວນະຄອນ ຫຼວງງພະບາງ ທີ່ເຄີຍປະຕິບັດກັນມາຫຼາຍເຊັ່ນຄົນ, ອັນໄດ້ສ້າງຄວາມປະທັບໃຈ ໃຫ້ແກ່ຜູ້ທີ່ໄດ້ເຂົ້າຮ່ວມງານເປັນຢ່າງດີ, ທຸກຄົນ ຕ່າງກໍມີຄວາມເບີກບານມ່ວນຊື່ນ ແລະມີໃບໜ້າທີ່ຍີ້ມແຍ້ມແຈ່ມໃສ.

ເມື່ອຂະບວນການໄປເຖີງຫໍພະບາງ ໄດ້ອັງເຊີນອົງພະບາງຂຶ້ນແທ່ນປະທັບໃນຫໍ ແລະກ່າວຄຳຄາລະວະອົງພະບາງ ເປັນອັນຈົບພິທີ. ສຳລັບກິດຈະກຳການຫົດສົງອົງພະບາງພຸດທະຣາວັນ ແມ່ນກິດຈະກຳສຸດທ້າຍ ໃນການສະເຫຼີມສະຫຼອງບຸນປີໃໝ່ລາວ ທີ່ນະຄອນ ຫຼວງຫຼວງພະບາງ, ແຕ່ຈະມີການສືບຕໍ່ອັງເຊີນພະພຸດທະຮູບລົງຫົດສົງຢູ່ແຕ່ລະວັດ, ທັງຈະມີການສືບຕໍ່ການບາສີ ຢູ່ສຳນັກງານ-ອົງການ, ບ້ານ, ຄອບຄົວ ໄປອີກໄລຍະໜື່ງ. ນອກຈາກນີ້, ຈະມີພິທີອັງເຊີນພະເຈົ້າມ່ານ ອົງພະທີ່ສັກສິດອີກ 1 ອົງ ລົງຫົດສົງຢູ່ວັດຊຽງທອງ ເລີ້ມແຕ່ວັນທີ 22-26 ເມສາ ຈຶ່ງຈະມີພິທີອະຣາດທະນາ ພະເຈົ້າມ່ານຂຶ້ນປະດິດສະຖານສູ່ຫໍດັ່ງເດີມ.

(ແຫຼ່ງຂ່າວ: ແຂວງຫຼວງພະບາງ)