ມວນຊົນຊາວຫຼວງພະບາງ ຮ່ວມອັງເຊີນອົງພະບາງພຸດທະຣາວັນ ລົງຫົດສົງໂອກາດບຸນປີໃໝ່

 ຈາກນັ້ນ, ໄດ້ອັງເຊີນອົງພະບາງຂຶ້ນປະທັບໃນຫວໍ່ເທີງຣາດສະລົດ ແລະ ໄດ້ມີຂະບວນແຫ່ ເຄື່ອນຈາກຫໍພະບາງ ໃນຫໍພິພິທະພັນແຫ່ງຊາດຫຼວງພະບາງ ສູ່ວັດໃໝ່ສຸວັນນະພູມມາຣາມ, ເລີ້ມຕົ້ນດ້ວຍ ຂະບວນທຸງຊາດ-ທຸງສາສະໜາ, ຂະບວນເສບດົນຕີພື້ນເມືອງ, ຂະບວນພາມມະນາຈານ, ຂະບວນເປົ່າແຄນ-ຫອຍສັງ-ຕີຄ້ອງ, ຂະບວນພະເຖຣະ 9 ອົງ,

ຂະບວນກອງຄຸມ, ບຸດສະບົກ ຫຼື ຣາດສະລົດພະບາງ, ຂະບວນພະສົງ-ສາມະເນນ, ຂະບວນການນຳຂັ້ນສູນກາງ, ຂັ້ນແຂວງ, ນະຄອນ-ເມືອງ ຊຶ່ງນຳພາໂດຍ ທ່ານ ບຸນເລື່ອມ ມະນີວົງ ປະທານສະພາປະຊາຊົນແຂວງ, ທ່ານ ນາງ ນາລີ ສີສຸລິດ ພັນລະຍາຂອງທ່ານປະທານປະເທດ, ແຕ່ລະຂະບວນໄດ້ສ້າງຄວາມປະທັບໃຈ ໃຫ້ແກ່ແຂກທີ່ໄດ້ເຂົ້າຮ່ວມງານເປັນຢ່າງດີ, ທຸກຄົນຕ່າງ ກໍມີຄວາມເບີກບານມ່ວນຊື່ນ ມີໃບໜ້າທີ່ຍີ້ມແຍ້ມ ແຈ່ມໃສ.

ພໍຮອດວັດໃໝ່ ສຸວັນນະພູມມາຣາມ ໄດ້ອັງເຊີນອົງພະບາງປະທັບໃນຫໍສົງ. ຈາກນັ້ນ, ພະເຖຣະ ໄດ້ນໍາພາຊາວພຸດທະສາຊະນິກະຊົນ ກ່າວຄຳຄາລະວະແດ່ອົງພະບາງ ແລະ ຮັບຟັງທໍາມະເທສະໜາຈາກພະເຖຣະ ຈຳນວນ 1 ກັນ ກ່ອນດຳເນີນການຫົດສົງອົງພະບາງ ຢ່າງເປັນທາງການ. ການຫົດສົງອົງພະບາງ, ຈະໄດ້ດຳເນີນເປັນເວລາ 3 ມື້ 3 ຄືນ (ຈົນເຖີງວັນທີ່ 20 ເມສາ ຈື່ງຈະມີພິທີອາລາດຖະນາອັງເຊີນ ອົງພະບາງຂຶ້ນປະດິດສະຖານໄວ້ຫໍພະບາງຕາມເດີມ).

ສໍາລັບຕອນຄໍ່າ ຈະມີການຄົບງັນຕາມປະເພນີ ພ້ອມທັງຊົມການສະແດງສິລະປະຈາກນັກສະແດງ ຂອງໂຮງລະຄອນພະລັກພະລາມຕື່ມອີກ. ພະພຸດທະລາວັນ ຖືເປັນພະພຸດທະຮູບທີ່ເກົ່າແກ່ ແລະ ສັກສິດ ອີກອົງໜຶ່ງ ຂອງຊາວລາວ ຜູ້ທີ່ມີຄວາມເຫຼືອມໃສສັດທາ ແລະ ຊາວພຸດທົ່ວໂລກ, ຖືເປັນພຸດທະສົມບັດ ທີ່ສູງຄ່າຍິ່ງຂອງພຸດທະສາສະນິກະຊົນທົ່ວໂລກ ໂດຍສະເພາະ ແມ່ນຊາວລາວໃນທົ່ວປະເທດ ກໍຄືຊາວຫຼວງພະບາງ.

ໃນແຕ່ລະປີ ອົງການປົກຄອງນະຄອນ ຫຼວງພະບາງ ໄດ້ມີການກະກຽມພິທີ ອາຣາດທະນາລົງຫົດສົງ ເພື່ອຄວາມເປັນສິລິມຸງຄຸນ ໃຫ້ແກ່ບ້ານເມືອງ ແລະ ອີກອັນໜຶ່ງ ເພື່ອໃຫ້ປະຊາຊົນ ໄດ້ເຂົ້າຂາບໄຫວບູຊາ ແລະ ຫົດສົງ ພ້ອມທັງຂໍພອນ ໃນໄລຍະບຸນປີໃໝ່ລາວ. ການອັງເຊີນ ພະບາງ ພຸດທະຣາວັນ ລົງຫົດສົງໃນໂອກາດບຸນປີໃໝ່ລາວ ແມ່ນມີມາແຕ່ບູຮານນະການ, ເປັນການສົ່ງເສີມປະເພນີ ອັນເກົ່າແກ່ຂອງຊາວຫຼວງພະບາງ ທີ່ປະຕິບັດກັນມາ ເພື່ອດຶງດູດເອົານັກທ່ອງທ່ຽວເຂົ້າມາທ່ຽຫຼວງພະບາງໃຫ້ຫຼາຍຂຶ້ນ ແລະ ເປັນການອະນຸລັກ ປົກປັກຮັກສາ ມໍລະດົກດ້ານວັດທະນະທໍາ ທີ່ເກົ່າແກ່ຂອງຊາດໃຫ້ຄູ່ກັບຊາວຫຼວງພະບາງ ຊົ່ວກາຣະນານ.

(ແຫຼ່ງຂ່າວ: ແຂວງຫຼວງພະບາງ)