 |
ທ່ານ ສອນເພັດ ພົງສຸທິ ກ່າວວ່າ: ການຈັດງານບຸນໃນຄັ້ງນີ້, ມີຈຸດປະສົງເພື່ອສ້າງບັນຍາກາດສະຫຼອງບຸນອອກພັນສາ-ປະວໍລະນາ ໃຫ້ມີຄວາມເບີກບານມ່ວນຊື່ນ ເພື່ອອະນຸລັກຮັກສາຮີດຄອງປະເພນີອັນດີງາມທີ່ສືບທອດກັນມາ ພ້ອມທັງເສີມສ້າງຄວາມສາມັກຄີ ແລະ ມິດຕະພາບລະຫວ່າງປະຊາຊົນ ສົ່ງເສີມທ່າແຮງດ້ານການທ່ອງທ່ຽວຂອງເມືອງຈອມເພັດໃຫ້ເປັນທີ່ຮູ້ຈັກແຜ່ຫຼາຍຍິ່ງຂຶ້ນ.
ການແຂ່ງຂັນປີນີ້, ມີເຮືອຊ່ວງເຂົ້າຮ່ວມທັງໝົດ 18 ລຳ ຈາກບັນດາບ້ານ ສຳນັກງານພາຍໃນເມືອງ ບໍລິສັດ ແລະ ເມືອງອ້ອມຂ້າງເພື່ອຊີງໄຊ ໂດຍມີເຮືອຊ່ວງປະເພດ 12-15 ສີພາຍ, ແຂ່ງຂັນໃນໄລຍະທາງປະມານ 350 ແມັດ.
ສ່ວນຄູ່ເປີດສະໜາມ ແມ່ນເຮືອຊ່ວງຊາວໜຸ່ມນາຄຳ ບໍລິສັດ BT ສຳຫຼວດບໍ່ແຮ່ ແຂ່ງຂັນກັບເຮືອຊ່ວງພິມມະສອນ ຮັບເໝົາກໍ່ສ້າງ ຊາວໜຸ່ມບ້ານຈ່ານເໜືອ-ສົມສິດລົດຊິ້ງ ແລະ ຄູ່ທີສອງ ແມ່ນເຮືອຊ່ວງເທບທິດານາລີ ແຝ້ງນ້ອຍສັ່ງລຸຍ ແຂ່ງຂັນກັບເຮືອຊ່ວງນາວານາກນ້ອຍ ວອນທະບິງເສົາໄຟຟ້າ. ທັງນີ້, ຂໍເຊີນຊວນປະຊາຊົນ ແລະ ນັກທ່ອງທ່ຽວເຂົ້າຮ່ວມຊົມ ຮ່ວມເຊຍການແຂ່ງຂັນຊ່ວງເຮືອ ພ້ອມທັງໃຫ້ກຳລັງໃຈບັນດາສີພາຍທຸກລຳ, ສຳລັບຜົນການແຂ່ງຂັນ ຈະລາຍງານໃຫ້ຊາບພາຍຫຼັງ.
ຂ່າວ-ພາບ: ດາວອນ ມະນີວັນ
ຄໍາເຫັນ