 |
ທ່ານ ສົມພອນ ສາຍສຸວັນ ຮອງເຈົ້າເມືອງດາກຈຶງ ໄດ້ລາຍງານໃຫ້ຮູ້ເມື່ອບໍ່ດົນນີ້ວ່າ: ເພື່ອເຮັດໃຫ້ການພັດທະນາເສດຖະກິດ-ສັງຄົມພາຍໃນເມືອງ ກໍຄືການສົ່ງອອກສິນຄ້າໃນ 5 ປີຕໍ່ໜ້າ ບັນລຸໄດ້ຕາມແຜນການທີ່ວາງໄວ້; ເມືອງດາກຈຶງ ຕ້ອງສືບຕໍ່ປັບປຸງ ແລະ ພັດທະນາພື້ນຖານໂຄງລ່າງ ໂດຍສະເພາະແມ່ນເສັ້ນທາງໃຫ້ສາມາດເຊື່ອມໂຍງພາຍໃນ, ພາກພື້ນ ແລະ ສາກົນ ເພື່ອອໍານວຍຄວາມສະດວກໃຫ້ແກ່ການຜະລິດ, ການບໍລິການ, ການຄ້າ, ການລົງທຶນ ແລະ ການທ່ອງທ່ຽວ; ເອົາໃຈໃສ່ຊຸກຍູ້ສົ່ງເສີມການຜະລິດກະສິກໍາທີ່ເປັນທ່າແຮງ ຕິດພັນກັບການປຸງແຕ່ງຜົນຜະລິດກະສິກໍາ ຕາມທິດເສດຖະກິດພູມປັນຍາ, ຫັນເປັນອຸດສາຫະກໍາ ແລະ ທັນສະໄໝ ເພື່ອສ້າງຄວາມຫຼາກຫຼາຍ ແລະ ສ້າງມູນຄ່າເພີ່ມຂອງການຜະລິດສິນຄ້າ; ສົ່ງເສີມຫັດຖະກໍາ-ຈັກສານ, ຕໍ່າແຜ່ນແພຊົນເຜົ່າທີ່ເປັນເອກະລັກ, ຫົວໜ່ວຍທຸລະກິດຂະໜາດນ້ອຍ ແລະ ກາງ (SMEs), ສ້າງກົນໄກ ແລະ ຕ່ອງໂສ້ງການຜະລິດ, ຈັດຕັ້ງກຸ່ມ ແລະ ສະຫະກອນການຜະລິດຢ່າງເປັນລະບົບ; ຍູ້ແຮງການຄ້າໃຫ້ເຂົ້າສູ່ລະບົບ ແລະ ກາຍເປັນຕ່ອງໂສ້ງຕົ້ນຕໍເພື່ອກະຕຸ້ນການເຕີບໂຕທາງດ້ານເສດຖະກິດ, ເປັນຖານລາຍຮັບງົບປະມານທີ່ໝັ້ນຄົງ ແລະ ຍືນຍົງ; ຫັນການຜະລິດກະສິກໍາ ຕາມທິດກະສິກໍາ 3 ຂັ້ນ ຄື: ສະອາດ, ຜະລິດເປັນກຸ່ມ, ຫຼຸດຜ່ອນການເພິ່ງພາທໍາມະຊາດ ແລະ ຍົກສະມັດຕະພາບການຜະລິດໃຫ້ສູງຂຶ້ນ; ສະໜອງອຸປະກອນ, ສະໜອງແນວພັນພືດ, ສັດ ແລະ ຄວບຄຸມການຂະຫຍາຍຖານການຜະລິດກະສິກໍາທີ່ບໍ່ສົມເຫດສົມຜົນ; ສູ້ຊົນຜະລິດເຂົ້າໃຫ້ໄດ້ 24,928 ໂຕນ; ພືດສະບຽງອາຫານໃຫ້ໄດ້ 27,500 ໂຕນ; ພືດເປັນສິນຄ້າ 135,130 ໂຕນ; ສົ່ງເສີມການລ້ຽງສັດ ແລະ ສ້າງຕັ້ງກຸ່ມລ້ຽງສັດແບບຄົວເຮືອນໃຫ້ໄດ້ 35 ກຸ່ມ.
 |
ທ່ານ ສົມພອນ ສາຍສຸວັນ ໃຫ້ຮູ້ຕື່ມວ່າ: ໃນໄລຍະ 5 ປີຜ່ານມາ, ເມືອງດາກຈຶງ ສາມາດສົ່ງອອກສິນຄ້າ ຜົນຜະລິດກະສິກໍາ, ເຄື່ອງປ່າຂອງດົງ ແລະ ອື່ນໆ ໄດ້ທັງໝົດ 123.04 ຕື້ກີບ ລື່ນແຜນ 3 ເທົ່າຕົວ. ໃນນີ້, ປີ 2020 ປະຕິບັດໄດ້ 9.05 ຕື້ກີບ; ປີ 2021 ປະຕິບັດໄດ້ 10.90 ຕື້ກີບ; ປີ 2022 ປະຕິບັດໄດ້ 30.02 ຕື້ກີບ; ປີ 2023 ປະຕິບັດໄດ້ 19.97 ຕື້ກີບ ແລະ ປີ 2024 ປະຕິບັດໄດ້ 24.50 ຕື້ກີບ. ສ່ວນການນໍາເຂົ້າ 5 ປີ ປະຕິບັດໄດ້ 46.68 ຕື້ກີບ, ສະເລ່ຍປີ 9.33 ຕື້ກີບ ທຽບໃສ່ແຜນບໍ່ບັນລຸແຜນ (ແຜນ 1.01 ຕື້ກີບ/ປີ).
(ຂ່າວ: ສັນຍາ)
ຄໍາເຫັນ