ເມືອງແກ່ນທ້າວ ໄດ້ແຕ່ງຕັ້ງຄະນະຮັບຜິດຊອບການກະກຽມສ້າງຕັ້ງຕາແສງຢູ່ພາຍໃນເມືອງ, ຊຶ່ງຄະນະຮັບຜິດຊອບພວກເຮົາໄດ້ນໍາພາສ້າງບົດວິພາກເສດຖະກິດ, ເກັບກໍາຂໍ້ມູນພື້ນທີ່, ຂໍ້ມູນຈໍານວນພົນ, ກວດກາຄວາມພ້ອມດ້ານສະຖານທີ່ ແລະ ກະກຽມວຽກງານຕ່າງໆເຊັ່ນ: ການກໍານົດຈໍານວນຕາແສງ. ເມືອງແກ່ນທ້າວປະກອບມີ 47ບ້ານ, ມີພົນລະເມືອງທັງໝົດ 44,700 ກວ່າຄົນ ຍິງ 21,700 ກວ່າຄົນ. ໃນເບື້ອງຕົ້ນແມ່ນໄດ້ກໍານົດເປັນ 5 ຕາແສງ ແລະ ໄດ້ສະເໜີຫາແຂວງ, ທາງແຂວງໄດ້ຄົ້ນຄວ້າພິຈາລະນາກໍານົດໃຫ້ເມືອງແກ່ນທ້າວ ສ້າງຕັ້ງຕາແສງຈໍານວນ 4 ຕາແສງຄື: ຕາແສງທ້າວແກ່ນ, ຕາແສງປາກແຄມ, ຕາແສງຫ້ວຍເລິກ ແລະ ຕາແສງດອນເມນ.
ຕາແສງທ້າວແກ່ນ ປະກອບມີ 21 ບ້ານ, ມີ 3,700 ກວ່າຄອບຄົວ, ມີ 18,900 ກວ່າຄົນ, ມີເນື້ອທີ່ທັງໝົດ 45,200 ກວ່າເຮັກຕາ. ຕາແສງປາກແຄມ ປະກອບມີ 13 ບ້ານ, ມີ 2,300 ກວ່າຄອບຄົວ, ມີ 12,400 ກວ່າຄົນ, ມີເນື້ອທີ່ທັງໝົດ 23,200 ກວ່າເຮັກຕາ. ຕາແສງຫ້ວຍເລິກ ປະກອບມີ 6 ບ້ານ, ມີ 1,400 ກວ່າຄອບຄົວ, ມີ 7,500 ກວ່າຄົນ, ມີເນື້ອທີ່ທັງໝົດ 28,000 ກວ່າເຮັກຕາ ແລະຕາແສງ ດອນເມນ ປະກອບມີ 7 ບ້ານ, ມີ 1,000 ກວ່າຄອບຄົວ, ມີ 5,200 ກວ່າຄົນ, ມີເນື້ອທີ່ທັງໝົດ 26,000 ກວ່າເຮັກຕາ. ຄາດຄະເນໂຄງປະກອບບຸກຄະລາກອນແຕ່ລະຕາແສງ ມີປະທານຕາແສງ 1 ທ່ານ, ມີຮອງປະທານຕາແສງ 2 ທ່ານ, ກໍາມະການ 4 ທ່ານ, ພະນັກງານ ຊ່ວຍວຽກ 5 ທ່ານ.
ທ່ານຮອງປະທານຄະນະກໍາມະການປົກຄອງເມືອງ ຍັງໄດ້ລາຍງານໃຫ້ຮູ້ຕື່ມວ່າ: ເພື່ອເປັນການກະກຽມປະກາດສ້າງຕັ້ງຕາແສງຢູ່ພາຍໃນເມືອງ ໃຫ້ທ່ວງທັນກໍານົດເວລາ ແລະ ຮັບປະກັນທາງດ້ານຄວາມພ້ອມຕ່າງໆ ຄະນະຮັບຜິດຊອບໄດ້ເຫັນດີກໍານົດເອົາຕາແສງດອນເມນ ປະກາດສ້າງຕັ້ງເປັນຕາແສງທໍາອິດຂອງເມືອງ ເນື່ອງຈາກເຫັນວ່າມີຄວາມພ້ອມຫຼາຍດ້ານ.
(ຂ່າວ: ແກ່ນທ້າວ)
ຄໍາເຫັນ