ທ່ານ ຈັນທະນົງສິນ ຈັນທະພິມ ຮອງເລຂາພັກເມືອງ ປະທານຄະນະກຳມະການປົກຄອງເມືອງ ໄດ້ໃຫ້ຮູ້ໃນວັນທີ 12 ກຸມພານີ້ວ່າ: ຂ້າພະເຈົ້າຕາງໜ້າໃຫ້ອົງການປົກຄອງເມືອງ ທັງໃນນາມພົນລະເມືອງລາວຜູ້ໜຶ່ງ ມີຄວາມພາກພູມໃຈທີ່ຈະໄດ້ໃຊ້ສິດປະຊາທິປະໄຕ ແລະ ຮຽກຮ້ອງໃຫ້ປະຊາຊົນທີ່ມີອາຍຸ 18 ປີຂຶ້ນໄປອອກມາໃຊ້ສິດປ່ອນບັດຕາມກົດໝາຍ ແລະ ລະບຽບການຂອງ ສປປ ລາວ ຢ່າງພ້ອມພຽງກັນ.
ໂອກາດນີ້, ປະທານຄະນະກຳມະການປົກຄອງເມືອງ ຍົກໃຫ້ເຫັນວ່າ: ໃນທົ່ວເມືອງ ມີ 57 ໜ່ວຍບັດ.ໃນນັ້ນ, 4 ໜ່ວຍບັດ ແມ່ນບໍ່ສາມມາດເປີດເຜີຍຕົວເລກຄື: ກອງບັນຊາການ ປກສ, ປກຊ ເມືອງ ແລະ ກອງຮ້ອຍ 525, 526; ມີຈໍານວນພົນ ລວມທັງໝົດ 104,171 ຄົນຍິງ 52,486 ຄົນ, ຈໍານວນຜູ້ມີສິດບ່ອນບັດເລືອກຕັ້ງ (ຕາມສໍາມະໂນຄົວ) ມີ 64,102 ຄົນຍິງ 33,122 ຄົນ.ໃນນັ້ນ, ຜູ້ສາມາດປ່ອນບັດໃນບ້ານຂອງຕົນ (ຕາມສໍາມະໂນຄົວ) ມີ 43,880 ຄົນຍິງ 22,472 ຄົນ, ຈໍານວນຜູ້ມີສິດເລືອກຕັ້ງຢູ່ທ້ອງຖິ່ນອື່ນ (ຕາມສໍາມະໂນຄົວ) ມີ 5,755 ຄົນຍິງ 2,830 ຄົນ, ມີຈໍານວນຜູ້ໄປເຮັດວຽກຢູ່ຕ່າງປະເທດ (ຕາມສໍາມະໂນຄົວ) 14,467 ຄົນຍິງ 7,820 ຄົນ ແລະ ຈໍານວນຜູ້ມີສິດປ່ອນບັດທີ່ມາຈາກທ້ອງຖິ່ນອື່ນມີ 348 ຄົນຍິງ 122 ຄົນ. ເພື່ອໃຫ້ປະຊາຊົນໃນທົ່ວເມືອງໂຂງ ໄດ້ຮັບຮູ້ຂໍ້ມູນຂ່າວສານ ແລະ ເຂົ້າໃຈຕໍ່ກົດລະບຽບການເລືອກຕັ້ງ ທາງຄະນະພັກ-ອຳນາດການປົກຄອງເມືອງ ໄດ້ເລັ່ງເຜີຍແຜ່ຂໍ້ມູນຂ່າວສານຜ່ານຫຼາຍຊ່ອງທາງເປັນຕົ້ນ: ທາງສື່ສັງຄົມອອນລາຍ, ຜ່ານລະບົບວິທະຍຸປະຈຳເມືອງ ແລະ ລະບົບໂທລະໂຄງໃນແຕ່ລະບ້ານ 144 ບ້ານ ເພື່ອເຮັດໃຫ້ທຸກຄົວເຮືອນໄດ້ຮັບຂໍ້ມູນຂ່າວສານຢ່າງທົ່ວເຖິງ.
ສໍາລັບຜູ້ອາຍຸສູງ ຫຼື ຜູ້ພິການ ທີ່ບໍ່ສາມາດເດີນທາງມາໜ່ວຍປ່ອນບັດໄດ້, ທາງຄະນະກຳມະການຈະໄດ້ຈັດຕັ້ງ "ຫີບປ່ອນບັດເຄື່ອນທີ່" ໄປບໍລິການໃຫ້ເຖິງເຮືອນ ເພື່ອຮັບປະກັນໃຫ້ປະຊາຊົນໄດ້ໃຊ້ສິດຂອງຕົນ 100%. ດ້ານການຮັກສາຄວາມປອດໄພ ໄດ້ມີການວາງກຳລັງ ປກສ ບ້ານ ປະຈຳການຢູ່ແຕ່ລະໜ່ວຍປ່ອນບັດ, ພ້ອມທັງປະສານສົມທົບກັບກຳລັງ ປກສ ກຸ່ມ, ປກສ ເມືອງ ເພື່ອຕິດຕາມ ແລະ ເຝົ້າລະວັງສະພາບການຢ່າງໃກ້ຊິດ ຮັບປະກັນໃຫ້ການເລືອກຕັ້ງໃນຄັ້ງນີ້ດຳເນີນໄປດ້ວຍຄວາມສະຫງົບ ແລະ ຈົບງາມ.
(ຂ່າວ-ພາບ: ພຸດທະສິນ ວົງວິໄລທອງ)
ຄໍາເຫັນ