 |
ທ່ານ ຈັນທະລົງສິນ ກິ່ນອົ້ມ ຮອງຫົວໜ້າຫ້ອງການແຜນການ ແລະ ການລົງທຶນເມືອງ ກ່າວລາຍງານວ່າ: ໃນຕົ້ນປີ 2025 ເມືອງພວກເຮົາໄດ້ຮັບການແບ່ງເຂດສໍາຫຼວດເບື້ອງຕົ້ນທີ່ສູນກາງມີ 114 ເຂດສໍາຫຼວດ,ໃນອັດຕາສ່ວນ 150-210 ຄົວເຮືອນຕໍ່ 1 ເຂດສໍາຫຼວດ, ບຸກຄະລາກອນທັງໝົດ 176 ທ່ານ, ໂດຍບໍ່ລວມເອົາຄະນະຊີ້ນໍາຂັ້ນເມືອງ ແລະ ຫ້ອງການສໍາຫຼວດຂັ້ນເມືອງ. ໃນນີ້, ປະກອບມີຄູຝຶກຂັ້ນເມືອງ 15 ທ່ານ, ນັກກວດກາ 31 ທ່ານ, ສໍາຮອງ 2 ທ່ານ, ນັກເດີນສໍາຫຼວດ 130 ທ່ານ, ສໍາຮອງ 16 ທ່ານ, ການເດີນສໍາຫຼວດພາກສະໜາມກໍານົດ 21 ວັນ. ປັດຈຸບັນເມືອງພວກເຮົາໄດ້ຮັບການແບ່ງເຂດສໍາຫຼວດຄືນໃໝ່ອີກທັງໝົດ 109 ເຂດສໍາຫຼວດ ໃນອັດຕາສ່ວນ 280-300 ຄົວເຮືອນຕໍ່ 1 ເຂດສໍາຫຼວດ, ບຸກຄະລາກອນທັງໝົດ 151 ທ່ານ, ໂດຍບໍ່ລວມເອົາຄະນະນໍາຂັ້ນເມືອງ, ຫ້ອງການສໍາຫຼວດຂັ້ນເມືອງ ແລະ ຄູຝຶກຂັ້ນເມືອງ, ຊຶ່ງປະກອບມີນັກກວດກາ 31 ທ່ານ, ສໍາຮອງ 3 ທ່ານ, ນັກເດີນສໍາຫຼວດ 120 ທ່ານ, ສໍາຮອງ 11 ທ່ານ, ເມືອງອຸທຸມພອນມີຄູຝຶກຈໍານວນ 10 ທ່ານ, ນັກເດີນພາກສະໜາມ ແລະ ນັກກວດກາຈະໄດ້ລົງສໍາຫຼວດກໍານົດເວລາ 42 ວັນ.
ທ່ານ ຈັນທະລົງສິນ ກິ່ນອົ້ມ ເວົ້າຕື່ມວ່າ: ມາຮອດປັດຈຸບັນ ທາງສູນກາງໄດ້ແຈ້ງຕົວເລກແບ່ງເຂດສໍາຫຼວດສຸດທ້າຍໃຫ້ເມືອງພວກເຮົາທັງໝົດ 113 ເຂດ. ໃນນີ້, ສໍາຮອງ 11 ເຂດ, ນັກເດີນສໍາຫຼວດຈໍານວນ 125 ທ່ານ, ສໍາຮອງ 12 ທ່ານ ແລະ ນັກກວດກາອີກ 32 ທ່ານ, ສໍາຮອງ 3 ທ່ານ. ພາຍຫຼັງສໍາເລັດການຝຶກອົບຮົມແລ້ວແມ່ນຈະໄດ້ເລີ່ມຕົ້ນການລົງເດີນພາກສະໜາມໃນໄລຍະນັດໝາຍການສໍາຫຼວດເລີ່ມແຕ່ວັນທີ 3 ພະຈິກ-ວັນທີ 14 ທັນວາ 2025 ກໍານົດເວລາ 42 ວັນ. ຈາກນັ້ນ, ຍັງໄດ້ຜ່ານຂໍ້ຕົກລົງຂອງຫົວໜ້າຄະນະຊີ້ນໍາການສໍາຫຼວດພົນລະເມືອງ ແລະ ທີ່ຢູ່ອາໃສທົ່ວປະເທດຄັ້ງທີ V ປີ 2025 ຂັ້ນເມືອງ ອີກດ້ວຍ
ໂອກາດນີ້, ທ່ານ ໂພໄຊ ອິນທະວົງສາ ຮັກສາການເຈົ້າເມືອງອຸທຸມພອນ ຍັງເນັ້ນວ່າ: ເຮັດແນວໃດມັນຊິບັນລຸຕາມເປົ້າໝາຍ ພວກເຮົາຕ້ອງພ້ອມກັນຕັດສິນໃຈໃຫ້ສູງ, ນັກສໍາມະນາກອນແຕ່ລະທ່ານອັນໃດທີ່ບໍ່ເຂົ້າໃຈກໍຕ້ອງມີການແລກປ່ຽນບົດຮຽນນໍາກັນ, ຄັນບໍ່ເຂົ້າໃຈອັນໃດກໍຂໍໃຫ້ຖາມຄູຝຶກ, ບໍ່ແມ່ນເຮັດແລ້ວເພື່ອແລ້ວຕ້ອງໃຫ້ມັນໄດ້ຄຸນະພາບ,ວຽກອັນນີ້ແມ່ນຄວາມຈໍາເປັນ, ແມ່ນພາລະບົດບາດປະກອບສ່ວນເພື່ອສັງຄົມ
ເຊິ່ງການຍົກລະດັບຄວາມຮູ້ ກ່ຽວກັບນັກເດີນສໍາຫຼວດ ແລະ ນັກກວດກາຂອງເມືອງອຸທຸມພອນຄັ້ງນີ້ ຈະໄດ້ດໍາເນີນເປັນເວລາ 10 ວັນເຕັມ, ນັບແຕ່ວັນທີ 20-30 ຕຸລາ 2025 ຈິ່ງສໍາເລັດຕາມແຜນການ.
(ພາບ,ຂ່າວ: ບຸນຊູ ພົມມະເທບ)
ຄໍາເຫັນ