ທ່ານ ນາງ ພຽງໃຈ ມໍລະຄາສຸກ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໄດ້ຜ່ານຂໍ້ຕົກລົງເຈົ້າແຂວງບໍລິຄຳໄຊ ເລກທີ 855/ຂບຊ, ລົງວັນທີ 4 ທັນວາ 2024 ວ່າດ້ວຍການອະນຸມັດສ້າງຕັ້ງສູນບໍລິການຜ່ານປະຕູດຽວ ຢູ່ເມືອງປາກກະດິງ ເພື່ອເປັນການສ້າງສິ່ງອຳນວຍຄວາມສະດວກໃຫ້ແກ່ປະຊາຊົນ ແລະ ແກ້ໄຂການບໍລິການເອກະສານທີ່ຕ້ອງຜ່ານຫຼາຍຂັ້ນຕອນ, ປະຢັດເວລາ, ປະຢັດຄ່າໃຊ້ຈ່າຍ ແລະ ລາຍຮັບເຂົ້າງົບປະມານຢ່າງລວມສູນ. ຜ່ານຂໍ້ຕົກລົງເຈົ້າເມືອງປາກກະດິງ ເລກທີ 395/ມປດ, ລົງວັນທີ 24 ກັນຍາ 2025 ວ່າດ້ວຍການສ້າງຕັ້ງສູນບໍລິການຜ່ານປະຕູດຽວ ຂອງເມືອງປາກກະດິງ ຂຶ້ນກັບຫ້ອງວ່າການປົກຄອງເມືອງ, ພາຍໄຕ້ການຊີ້ນຳ-ນຳພາໂດຍກົງຂອງເຈົ້າເມືອງ ແລະ ຜ່ານຂໍ້ຕົກລົງປະທານຄະນະກຳມະການປົກຄອງເມືອງປາກກະດິງ ວ່າດ້ວຍການແຕ່ງຕັ້ງຜູ້ຊີ້ນຳສູນບໍລິການຜ່ານປະຕູດຽວຂັ້ນຫ້ອງການ: ແຕ່ງຕັ້ງທ່ານ ສີອຳພອນ ໝາຍໝັ້ນ ຫົວໜ້າຫ້ອງວ່າການເປັນຫົວໜ້າ, ແຕ່ງຕັ້ງທ່ານ ສົມສະຫວັດ ມັງແກ້ວບິດາ ຫົວໜ້າຫ້ອງການອຸດສາຫະກຳ ແລະ ການຄ້າ ແລະ ທ່ານ ວົງສານ ທອງປະເສີດ ຫົວໜ້າຫ້ອງການໂຍທາທິການ ແລະ ຂົນສົ່ງ ເປັນຮອງ ໂດຍມີຄະນະ 4 ທ່ານ ແລະ ແຕ່ງຕັ້ງພະນັກງານຜູ້ປະຈຳການຢູ່ສູນບໍລິການຜ່ານປະຕູດຽວ ຂອງເມືອງປາກກະດິງ: ແຕ່ງຕັ້ງທ່ານ ບົວເງີນ ອຸ່ນຊຽງໃໝ່ ຮອງຫົວໜ້າຄະນະຈັດຕັ້ງ ເປັນຫົວໜ້າ, ແຕ່ງຕັ້ງທ່ານ ທົງໄຊ ເພັດຊົມພູ ຫ້ອງການວັດທະນະທຳ ແລະ ທ່ອງທ່ຽວ ແລະ ທ່ານ ເຢລີ ກ່າເຢ່ ເປັນຮອງ ໂດຍມີຄະນະອີກ 4 ທ່ານ.
ທ່ານປະທານກອງປະຊຸມ ໄດ້ຮຽກຮ້ອງໃຫ້ທຸກພາກສ່ວນຈົ່ງໄດ້ໃຫ້ການສະໜັກສະໜູນ, ຊຸກຍູ້ ພ້ອມທັງຕິດຕາມ, ກວດກາ ວຽກງານບໍລິການຜ່ານປະຕູດຽວ ຢ່າງເອົາໃຈໃສ່, ເຮັດໃຫ້ວຽກດັ່ງກ່າວນັ້ນ ໄດ້ຖືກຈັດຕັ້ງປະຕິບັດ ຖືກຕ້ອງ ແລະ ສອດຄ່ອງຕາມລະບຽບກົດໝາຍ, ແນໃສ່ອຳນວຍຄວາມສະດວກໃຫ້ປະຊາຊົນສາມາດເຂົ້າເຖິງການບໍລິການໄດ້ຢ່າງສະດວກ, ວ່ອງໄວ ແລະ ຍຸຕິທຳສຳລັບທຸກຄົນ. ຈາກນັ້ນ, ກໍໄດ້ຕັດແຖບຜ້າ, ເປີດປ້າຍ ແລະ ລັ່ງຄ້ອງ 9 ບາດ ເປັນສັນຍາລັກເປີດນຳໃຊ້ສູນບໍລິການຜ່ານປະຕູດຽວ ຢ່າງເປັນທາງການ.
(ຂ່າວ: ແສງທອງ)
ຄໍາເຫັນ