ເມືອງພຽງ ປືກສາຫາລືການແຂ່ງຂັນດົນຕີ ແລະ ຂັບລຳທ້ອງຖີ່ນ

ກອງປະຊຸມໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າເມືອງວ່າດ້ວຍການແຕ່ງຕັ້ງອານຸກຳມະການແບງຄວາມຮັບຜິດຊອບແຕ່ລະໜ້າວຽກເປັນຕົ້ນແມ່ນ ຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຈັດງານການແຂ່ງຂັນດົນຕີ ແລະ ຂັບລຳທ້ອງຖີ່ນພື້ນເມືອງລາວ 3 ເມືອງກາງ ແລະ ຂໍ້ຕົກລົງວ່າດ້ວຍການແຕ່ງຕັ້ງພະນັກງານຂອງເມືອງຊ່ວຍກະກຽມເປີດພິທີປະກາດຮັບຮອງວັດສີມຸງຄຸນໄຊຍະຣາມເປັນມໍລະດົກທ້ອງຖີ່ຂັ້ນແຂວງ. ຈາກນັ້ນ ຜູ້ເຂົ້າຮ່ວມແຕ່ລະພາກສ່ວນໄດ້ປະກອບຄຳຄິດ ເຫັນກ່ຽວກັບການຈັດຕັ້ງປະຕິບັດວຽກງານຕົວຈິງເພຶ່ອເຮັດໃຫ້ຖືກຕ້ອງສອດຄອງກັບສິດພາລະບົດບາດຂອງໜ້າວຽກແຕ່ລະອານຸກຳມະການ.

ທ່ານ ນາງ ດາວັນ ພະວົງຈິດ ໄດ້ຍົກໃຫ້ເຫັນໜ້າວຽກຕ່າງໆ ຂອງແຕ່ລະອານຸກຳມະການທີ່ຈະໄດ້ຈັດຕັ້ງປະຕິບັດພ້ອມເນັ້ນໃຫ້ເອົາໃຈໃສ່ຮັບຜິດຊອບຕໍ່ກັບໜ້າທີ່ການເມືອງຂອງຕົນໃຫ້ສຳເລັດຕາມຄາດໝາຍເພື່ອເປັນການອານຸລັກຮັກສາຮິດຄອງປະເພນີຂອງບັນດາເຜົ່າໄວ້ໃຫ້ຍືນຍົງ ແລະ ປູກຈິດສຳນືກໃຫ້ຊາວໜຸ່ມ, ໄວໜຸ່ມ, ລູກຫຼາ ກໍຄືຄົນຮຸ່ນຫຼັງ ຮູ້ຮັກສິລະປະ ວັດທະນະທຳລາວ ທັງເປັນການສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ອົງຄະນະພັກແຂວງໄຊຍະບູລີຄັ້ງທີ VIII ທີ່ຈະໄຂຂຶ້ນໃນຕໍ່ໜ້ານີ້ໃຫ້ເປັນຂະບວນການຢ່າງຟົດຟື້ນ.

(ຂ່າວ: ວົງສະຫວັນ ສຸທິໂວຫານ)