 |
ກອງປະຊຸມໄດ້ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານປະຈຳປີ 2025 ແລະ ທິດທາງແຜນການປະຈຳປີ 2026, ຮັບຟັງການຜ່ານແຜນດຳເນີນງານປະຈຳປີ 2026 ຂອງຄະນະບໍລິຫານງານພັກເມືອງ ສະໄໝທີ IX ໂດຍໄດ້ຍົກໃຫ້ເຫັນຜົນງານດ້ານດີທີ່ຕັ້ງໜ້າ ບົດຮຽນທີ່ຖອດຖອນໄດ້ ແລະ ດ້ານອ່ອນຂໍ້ຄົງຄ້າງທີ່ຈະຕ້ອງແກ້ໄຂໃນຕໍ່ໜ້າ. ຊຶ່ງໃນໄລຍະ 1 ປີຜ່ານມາເມືອງພຽງແມ່ນສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພໂດຍພື້ນຖານ, ວຽກງານປ້ອງກັນຊາດ-ປ້ອງກັນຄວາມສະຫງົບໄດ້ເອົາໃຈໃສ່ຊີ້ນໍາກອງຫຼອນແຕ່ລະເຂດອອກເຄືອນໄຫວຂອບເຂດຄວາມຮັບຜີດຊອບ ພ້ອມທັງສຸມໃສ່ແກ້ໄຂປະກົດການຫຍໍ້ທໍ້ໃນສັງຄົມຢ່າງຕັ້ງໜ້າ ໂດຍສະເພາະແມ່ນລົງຈັດຕັ້ງປະຕິບັດວາລະແຫ່ງຊາດວ່າດ້ວຍແກ້ໄຂ ບັນຫາຢາເສບຕິດຕິດພັນກັບການແກ້ໄຂປະກົດການຫຍໍ້ທໍ້ໃນດ້ານຕ່າງໆ, ວຽກງານເສດຖະກິດໄດ້ສຸມໃສ່ໃນການຄົ້ນຄວ້າທ່າແຮງບົມຊ້ອນເຂົ້າໃນການພັດທະນາເສດຖະກິດຢ່າງຕັ້ງໜ້າເຮັດໃຫ້ເສດຖະກິດຂອງເມືອງມີການຂະຫຍາຍຕົວໃນລະດັບເກີບ 7%ຕໍ່ປີ, ລວມຍອດຜະລິດຕະພັນພາຍໃນປີ 2025 ບັນລຸ 1,800 ກວ່າຕື້ກີບ, ສະເລ່ຍໃສ່ຫົວຄົນໜຶ່ງໄດ້ 28 ລ້ານກວ່າກີບຕໍ່ຄົນນຕໍ່ປີໂດຍສາມາດຈັດເກັບລາຍຮັບໄດ້ທັງໝົດ 7 ຕື້ກວ່າກີບ ລື່ນແຜນການປີ 20%, ສາມາດຜະລິດເຂົ້າໄດ້ທັງໝົດ 39 ພັນກວ່າໂຕ່ນ ສະເລ່ຍໃສ່ຫົວຄົນໄດ້ 600 ກວ່າກິໂລຕໍ່ຄົນຕໍ່ປີ, ການປູກພືດເປັນສິນຄ້າປະຕິບັດໄດ້ 19 ພັນກວ່າເຮັກຕາ, ຜົນຜະລິິດໄດ້ທັງໝົດ 4 ແສນກວ່າໂຕນ, ການປູກພືດສະບຽງອາຫານປະຕິບັດໄດ້ 800 ກວ່າເຮັກຕາ ຜົນຜະລີດໄດ້ 4 ພັນ 7 ຮ້ອຍກວ່າໂຕ່ນ, ການລ້ຽງສັດກໍໄດ້ມີການຂະຫຍາຍຕົວ ສາມາດຕອບສະໜອງຊີ້ນ, ໄຂ່ ແລະ ປາ ສະເລ່ຍໃສ່ຫົວຄົນໜຶ່ງ 50 ກວ່າກິໂລຕໍ່ຄົນຕໍ່ປີ. ອັນພົ້ນເດັ່ນແມ່ນໄດ້ຊຸກຍູ້ປະຊາຊົນບັນດາເຜົ່າປະກອນສ່ວນທືນຮອນເຂົ້າໃນການກໍ່ສ້າງເສັ້ນທາງຊອຍເບຕົງຢູ່ພາຍໃນບ້ານຂອງຕົນໄດ້ທັງໝົດ 9 ບ້ານມີ 10 ເສັ້ນ, ຍາວ 2 ພັນກວ່າເເມັດ, ລວມມູນຄ່າ 2 ຕື້ກວ່າກີບ, ດ້ານວັດທະນະທຳສັງຄົມກໍ່ມີຫຼາຍດ້ານໄດ້ບັດລຸຕາມຄາດໝາຍ. ຈາກນັ້ນ, ບັນດາຜູ້ເຂົ້າຮ່ວມ ກໍໄດ້ປະກອບຄຳຄິດເຫັນເພຶ່ອພ້ອມກັນຊອກຫາວິທີແກ້ໄຂບັນດາດ້ານອ່ອນທີ່ຍັງຄົງຄ້າງ.
ສະຫາຍ ອາເມ ຊົງເຢ້ຽເລັ່ງ ໄດ້ເນັ້ນໃຫ້ຄະນະນໍາຂອງເມືອງເອົາໃຈໃສ່ເພີ່ມທະວີສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວສະມາຊິກພັກ ພະນັກງານ ແລະ ປະຊາຊົນບັນດາເຜົ່າໃຫ້ມີຄວາມໜັກແໜ້ນ ເຂັ້ມແຂງ ມີຄວາມເຊື່ອໝັ້ນຕໍ່ແນວທາງນະໂຍບາຍ ແລະ ການນຳພາທີ່ຖືກຕ້ອງຂອງພັກ, ສ້າງໃຫ້ໄດ້ຄວາມສາມັກຄີເປັນປຶກແຜ່ນຂອງປະຊາຊົນບັນດາເຜົ່າ ແລະ ຊັ້ນຄົນຕ່າງໆໃນສັງຄົມເພຶ່ອພ້ອມກັນຈັດຕັ້ງປະຕິບັດໜ້າທີ່ການເມືອງກໍຄືແຜນພັດທະນາເສດຖະກິດ-ສັງຄົມໃຫ້ບັນລຸຕາມຄາດໝາຍ ຕາມແຜນຍຸດທະສາດຂອງເມືອງທີ່ວ່າ “ສ້າງເມືອງພຽງ ໃຫ້ເປັນເມືອງຜະລິດສະບຽງອາຫານ ຕິດພັນກັບການປຸງແຕ່ງສົ່ງອອກ, ພັດທະນາການບໍລິການທາງຜ່ານ ແລະ ການທ່ອງທ່ຽວ ທີ່ເປັນມິດກັບສິ່ງແວດລ້ອມ”.
(ຂ່າວ: ວົງສະຫວັນ ສຸທິໂວຫານ)
ຄໍາເຫັນ