 |
ທ່ານ ພິມມະເສນ ຄູນສີລິວົງ ຫົວໜ້າພະແນກກະສິກໍາ ແລະ ສິ່ງແວດລ້ອມແຂວງ ໄດ້ຜ່ານບົດລາຍງານ ກ່ຽວກັບການຈັດຕັ້ງປະຕິບັດ ຕົວເມືອງຍືນຍົງດ້ານສິ່ງແວດລ້ອມ ອາຊຽນ ຄັ້ງທີVI ປີ 2025 ໃຫ້ຮູ້ວ່າ: ຜົນການຄັດເລືອກຂອງ ຄະນະປະທານກອງປະຊຸມ, ກອງເລຂາສິ່ງແວດລ້ອມ ອາຊຽນ ແລະ ຕາງໜ້າຄະນະກຳມະການເຈົ້າໜ້າທີ່ອາວຸໂສສິ່ງແວດລ້ອມ ອາຊຽນ ຈາກ 10 ປະເທດໃນວັນທີ 22 ກໍລະກົດ 2025, ໃນກອງປະຊຸມ ຄັ້ງທີ 23 ທີ່ນະຄອນຫຼວງຈາກາຕາ, ປະເທດອິນໂດເນເຊຍ ໄດ້ຕົກລົງເຫັນດີໃຫ້ ເມືອງໄຊ ແຂວງອຸດົມໄຊ ຜ່ານການຄັດເລືອກ ແລະ ໄດ້ຮັບລາງວັນ ຕົວເມືອງດີເດັ່ນທີ່ມີຄວາມຍືນຍົງທາງດ້ານສິ່ງແວດລ້ອມ ຂອງອາຊຽນ ຄັ້ງທີ VI ປີ 2025 ດ້ວຍ 4 ມາດຕະຖານຄື: ມີການຈັດການຄວາມສ່ຽງຈາກໄພພິບັດ, ມີການປັບຕົວເຂົ້າກັບການປ່ຽນແປງດິນຟ້າອາກາດຕາມລະບົບນິເວດວິທະຍາ, ສະຖານທີ່ຢູ່ອາໄສທີ່ປັບຕົວໄດ້ກັບສະພາບການປ່ຽນແປງດິນຟ້າອາກາດໃນທ້ອງຖິ່ນ ແລະ ມີການຈັດການສິ່ງເສດເຫຼືອໂດຍສະເພາະພລາສຕິກ. ຈາກນັ້ນ, ກໍຜ່ານຂໍຕົກລົງ ວ່າດ້ວຍການຮັບຮອງເອົາເມືອງໄຊ ເປັນເມືອງຍືນຍົງດ້ານສິ່ງແວດລ້ວມ ອາຊຽນ ຄັ້ງທີVI ພ້ອມທັງມອບລາງວັນ ໃຫ້ແກ່ ເມືອງໄຊ ຢ່າງເປັນທາງການ, ເປັນກຽດມອບໂດຍ ທ່ານ ລິນຄຳ ດວງສະຫວັນ ແລະ ຮັບໂດຍທ່ານ ສົມຄິດ ກັນສະໜິດ ກຳມະການພັກແຂວງ ເລຂາຄະນະບໍລິຫານງານພັກເມືອງໄຊຢ່າງສົມກຽດ.
(ຂ່າວ: ສຸໄພລິນ ອິນພູວຽງ)
ຄໍາເຫັນ