ເມືອງໄຊຍະເປີດງານຕະຫຼາດນັດໃນງານບຸນອອກພັນສາປະວໍລະນາແລະບຸນຊ່ວງເຮືອ

ໃນຕອນເຊົ້າວັນທີ 25 ຕຸລານີ້, ເມືອງໄຊຍະບູລີ ແຂວງໄຊຍະບູລີໄດ້ຈັດພິທີເປີດງານຕະຫຼາດນັດໃນງານເທດສະການ ບຸນອອກພັນສາປະວໍລະນາ ແລະ ບຸນຊ່ວງເຮືອປະຈຳປີ 2023. ໂດຍການໃຫ້ກຽດເຂົ້າຮ່ວມຂອງທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ,  ມີບັນດາທ່ານ ການນໍາຂອງແຂວງ, ຂອງເມືອງ, ຫົວໜ້າ-ຮອງຫົວໜ້າພະແນກການ-ກົມກອງອ້ອມຂ້າງແຂວງ, ອ້ອມຂ້າງເມືອງ, ນັກທຸລະກິດ, ພໍ່ຄ້າ ຊາວຂາຍ ຕະຫຼອດຮອດພໍ່ແມ່ປະຊາຊົນບັນດາເຜົ່າພາຍໃນເມືອງ ໄຊຍະບູລີເຂົ້າຮ່ວມຢ່າງພ້ອມພຽງ; ໃນພິທີທ່ານ ຄຳພຸດ ອິນທະວົງ ຮອງເຈົ້າເມືອງໄຊຍະບູລີ ໄດ້ຂຶ້ນກ່າວເປີດພິທີບາງຕອນທ່ານກ່າວວ່າ: ການຈັດພິທີເປີດຕະຫລາດນັດວາງສະແດງສິນຄ້າໃນຄັ້ງນີ້ ແມ່ນເພື່ອດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມງານບຸນຊ່ວງເຮືອຢູ່ເມືອງໄຊຍະບູລີ ແຂວງໄຊຍະບູລີໃຫ້ນັບມື້ນັບຫຼາຍຂຶ້ນ ແລະ ກໍເພື່ອເປັນການສ້າງວຽກເຮັດງານທໍາໃຫ້ປະຊາຊົນມີລາຍຮັບເພີ່ມຂຶ້ນ ໃນນັ້ນ, ໃນການຈັດງານເທດສະການບຸນອອກພັນສາປະວໍລະນາ ແລະ ບຸນຊ່ວງເຮືອປະຈຳປີ ພສ 2566 ປີນີ້,ໄດ້ມີກິດຈະກໍາເປັນຕົ້ນແມ່ນ ການແຂ່ງຂັນເຮືອຊ່ວງຍິງ-ຊາຍ,ການແຂ່ງຂັນເຮືອໄຟທໍາມະຊາດ, ການແຂ່ງຂັນກອງຫາງ, ການປະກວດນາງທິດາເຮືອຊ່ວງ, ການປະກວດອາຫານພື້ນບ້ານ, ການຈູດບັ້ງໄຟດອກເພື່ອບູຊາເຈົ້ານໍ້າ-ເຈົ້າທ່າ, ການເລາະລາດ ແລະ ກິດຈະກໍາໃສ່ບາດຕາມຮີດຄອງປະເພນີ ໃນນັ້ນ, ກິດຈະກໍາຕະຫລາດນັດງານວາງສະແດງສິນຄ້າາກໍ່ເປັນກິດຈະກຳໜຶ່ງ ທີ່ຈັດຢູ່ໃນງານບຸນປີນີ້ ແລະ ປະກອບມີຮ້ານວາງສະແດງສິນຄ້າ ໂອດັອບເຂົ້າຮ່ວມທັງໝົດ 103 ຮ້ານ, ມີໂອດັອບຂອງເມືອງໄຊຍະບູລີ 1 ຮ້ານ, ມາຈາກແຂວງຫລວງພະບາງ  1  ຮ້ານ, ເມືອງພຽງ 1 ຮ້ານ,ເມືອງຊຽງຮ່ອນ 1 ຮ້ານ.  ມາຮອດປະຈຸບັນນີ້ມີທຸລະກິດ, ຜູ້ປະກອບການ ໄດ້ນໍາເອົາສິນຄ້າ ມາວາງຂາຍໃນງານບຸນ ຈໍານວນ 103 ຮ້ານ   ໃນນັ້ນ, ຮ້ານຂາຍເຄື່ອງອຸດສະຫະກໍາ ແລະ ຫັດຖະກໍາຈໍານວນ 50 ຮ້ານ, ຮ້ານຂາຍປະເພດອາຫານ  30 ຮ້ານ, ຮ້ານຊັດໝາກປູມເປົ້າ ຈໍານວນ 15 ຮ້ານ, ສະໄລເດີ ຈໍານວນ 3 ຊຸດ,ມີບໍລິສັດເຂົ້າມາຕັ້ງບູດເພື່ອໂຄສະນາ ແລະ ຈໍາໜ່າຍສິນຄ້າຈໍານວນ 5 ບູດ,ຊຶ່ງບັນດາຫ້າງຮ້ານດັ່ງກ່າວໄດ້ເລີ່ມຂາຍສິນຄ້າມາແຕ່ວັນທີ 15 ຕຸລາ 2023 ເປັນຕົ້ນມາ ຈົນກວ່າຈະສຳເລັດການແຂ່ງຂັນຊ່ວງເຮືອ, ຈາກນັ້ນໃນພິທີຄະນະປະທານ ແລະ ຜູ້ເຂົ້າຮ່ວມກໍໄດ້ເຂົ້າຮ່ວມຕັດລິບບີນເພື່ອເປັນສັນຍາລັກໃນການເປີດງານດັ່ງກ່າວ ແລະ ຊົມການວາງຂາຍສິນຄ້າຕື່ມອີກ. (ຂ່າວ-ພາບ: ສົມພົງ ສີສະຫັວດ)