ໜຶ່ງໃນການປະກອບສ່ວນທີ່ພົ້ນເດັ່ນທີ່ສຸດຂອງຊາວຫວຽດກຽວ ທີ່ອາໃສຢູ່ຕ່າງປະເທດ ໃນຍຸກແຫ່ງການພັດທະນາ ແມ່ນແຫຼ່ງລາຍຮັບຈາກຊາວຫວຽດນາມ ທີ່ສົ່ງເງິນກັບບ້ານ (ຄິວໂຮສ). ຈຳນວນເງິນຄິວໂຮສ ທີ່ຖືກສົ່ງກັບຄືນຫວຽດນາມ ໃນຫຼາຍປີຕໍ່ເນື່ອງ ຖືກຈັດຢູ່ໃນອັນດັບ 10 ປະເທດ ທີ່ຮັບເງິນຄິວໂຮສ ສູງທີ່ສຸດໃນໂລກ. ສະເພາະປີ 2024, ຫວຽດນາມ ໄດ້ຮັບເງິນຄິວໂຮສ ເກືອບ 19 ຕື້ໂດລາ, ກວມປະມານ 4.5% ຂອງ GDP ປະເທດ. ເງິນຄິວໂຮສ ບໍ່ພຽງແຕ່ມີສ່ວນຊ່ວຍໃນການປັບປຸງຊີວິດການເປັນຢູ່ຂອງຫຼາຍລ້ານຄົວເຮືອນເທົ່ານັ້ນ, ແຕ່ຍັງມີບົດບາດສຳຄັນໃນການຮັກສາອັດຕາແລກປ່ຽນເງິນຕາໝັ້ນຄົງ, ດຸນດ່ຽງດ້ານການເງິນ ແລະ ສະໜັບສະໜູນການພັດທະນາຂົງເຂດເຊັ່ນ: ອະສັງຫາລິມະຊັບ, ການບໍລິໂພກ, ການລົງທຶນຂະໜາດນ້ອຍ ແລະ ການເລີ່ມຕົ້ນທຸລະກິດ. ຊາວຫວຽດນາມ ທີ່ອາໃສຢູ່ຕ່າງປະເທດ ຈໍານວນຫຼາຍ ຍັງໄດ້ລົງທຶນໂດຍກົງ ໃນບັນດາວິສາຫະກິດຢູ່ພາຍໃນປະເທດ, ຂະຫຍາຍການຜະລິດ, ຖ່າຍທອດເຕັກໂນໂລຊີ ຫຼື ສ້າງຕັ້ງບໍລິສັດຮ່ວມທຸລະກິດຢູ່ຫວຽດນາມ.
ຈຸດພົ້ນເດັ່ນໜຶ່ງຂອງວົງຄະນາຍາດຊາວຫວຽດນາມ ທີ່ອາໃສຢູ່ຕ່າງປະເທດ ໃນຍຸກສະໄໝແຫ່ງການເຂົ້າໂຍງສາກົນ ແມ່ນແຫຼ່ງກຳລັງປັນຍາຊົນ ແລະ ຜູ້ຊ່ຽວຊານລະດັບສູງ, ພິເສດ ໃນບັນດາຂະແໜງທີ່ເປັນຂໍກະແຈສໍາຄັນເຊັ່ນ: ສາທາລະນະສຸກ, ເຕັກໂນໂລຊີຂໍ້ມູນຂ່າວສານ, ພະລັງງານທົດແທນ, ການບິນ, ການສຶກສາ, ການຄົ້ນຄ້ວາວິທະຍາສາດ, ການຫັນປ່ຽນດີຈີຕອນ...ຕາມຂໍ້ມູນຈາກຄະນະກຳມະການລັດ ວ່າດ້ວຍຊາວຫວຽດນາມ ທີ່ອາໃສຢູ່ຕ່າງປະເທດ, ປັດຈຸບັນ ນັກປັນຍາຊົນ ແລະ ຜູ້ຊ່ຽວຊານຊາວຫວຽດປະມານ 500,000 ຄົນ ທີ່ກຳລັງເຮັດວຽກຢູ່ຕ່າງປະເທດ, ມີຫຼາຍຄົນ ດຳລົງຕຳແໜ່ງສຳຄັນໃນສະຖາບັນຄົ້ນຄ້ວາ, ໂຮງຮຽນມະຫາວິທະຍາໄລທີ່ມີຊື່ສຽງ ແລະ ກຸ່ມບໍລິສັດເຕັກໂນໂລຊີຂະໜາດໃຫຍ່ຂອງສາກົນ. ນີ້ແມ່ນແຫຼ່ງກໍາລັງ "ຄັງປັນຍາ" ອັນລໍ້າຄ່າ ຊຶ່ງບໍ່ແມ່ນວ່າປະເທດທີ່ກໍາລັງພັດທະນາໃດກໍ່ເຮັດໄດ້.
ໃນຍຸກສະໄໝການສື່ສານ ແລະ ການເຊື່ອມໂຍງຮອບດ້ານ, ບົດບາດຂອງຊາວຫວຽດນາມ ທີ່ອາໃສຢູ່ຕ່າງປະເທດ ບໍ່ໄດ້ຈຳກັດຢູ່ພຽງດ້ານເສດຖະກິດ – ວິທະຍາສາດ ເທົ່ານັ້ນ, ແຕ່ຍັງສະແດງໃຫ້ເຫັນຢ່າງຊັດເຈນ ໃນການເຄື່ອນໄຫວການຕ່າງປະເທດຂອງປະຊາຊົນ, ການຮັກສາເອກະລັກວັດທະນະທຳຂອງຊາດ ແລະ ການເຜີຍແຜ່ພາບລັກຂອງຫວຽດນາມ ໄປສູ່ສາກົນ. ມີຫຼາຍສະມາຄົມຊາວຫວຽດນາມ ທີ່ອາໃສຢູ່ໃນປະເທດລາວ, ໄທ, ອາເມຣິກາ, ຝຣັ່ງ, ເຢຍລະມັນ, ຍີ່ປຸ່ນ, ອົສຕຣາລີ, ການາດາ... ໄດ້ຈັດງານມະໂຫລານວັດທະນະທຳ ຫວຽດນາມ, ສັບປະດາອາຫານປະຈຳຊາດ, ການສະແດງຊຸດປະຈໍາຊາດ “ອາວຢາຍ”, ວັນກະວີ, ງານວາງສະແດງຮູບພາບ, ກອງປະຊຸມວິທະຍາສາດການທ່ອງທ່ຽວ–ການລົງທຶນຢູ່ຫວຽດນາມ...ກິດຈະກຳເຫຼົ່ານີ້ ບໍ່ພຽງແຕ່ຊ່ວຍໃຫ້ເພື່ອນມິດສາກົນ ເຂົ້າໃຈເພີ່ມເຕີມກ່ຽວກັບປະເທດ ແລະ ຊາວຫວຽດນາມ, ແຕ່ຍັງເປັນການເສີມສ້າງຄວາມຜູກພັນສະໜິດແໜ້ນ ແລະ ການເຊື່ອມໂຍງວົງຄະນາຍາດຊາວຫວຽດນາມ ທີ່ອາໃສຢູ່ຕ່າງປະເທດ. ພິເສດ ແມ່ນໄວໜຸ່ມ ທີ່ເກີດໃໝ່ ແລະ ເຕີບໃຫຍ່ຢູ່ໃນປະເທດທີ່ເຂົາເຈົ້າກຳລັງດໍາລົງຊີວິດຢູ່.
ໂດຍຢຶດໝັ້ນທັດສະນະ “ມະຫາສາມາຄີທົ່ວປວງຊົນທັງຊາດ” ແລະ ແນວຄິດປະທານ ໂຮ່ຈິມິນ ກ່ຽວກັບຊາວຫວຽດນາມ ທີ່ອາໃສຢູ່ຕ່າງປະເທດ, ພັກ ແລະ ລັດຫວຽດນາມ ໄດ້ເອກະພາບຍືນຢັນວ່າ: ຊາວຫວຽດນາມ ທີ່ອາໃສຢູ່ຕ່າງປະເທດ ແມ່ນພາກສ່ວນທີ່ແຍກອອກບໍ່ໄດ້ ແລະ ແມ່ນກໍາລັງແຮງສຳຄັນຂອງຊາດ. ໃນຫຼາຍປີຜ່ານມາ, ລັດຖະບານຫວຽດນາມ ໄດ້ປະກາດໃຊ້ນະໂຍບາຍຫຼາຍຢ່າງ ທີ່ເປັນຮູບປະທໍາ ແນໃສ່ສະໜັບສະໜູນ ປົກປ້ອງ ແລະ ດຶງດູດຊາວຫວຽດນາມ ທີ່ອາໃສຢູ່ຕ່າງປະເທດ ປະກອບສ່ວນພັດທະນາປະເທດຊາດຄື: ຜ່ອນຜັນຂັ້ນຕອນການເຮັດເອກະສານກັບຄືນປະເທດ, ຂໍສັນຊາດ, ຂໍໃບຢັ້ງຢືນທີ່ຢູ່ອາໄສ; ສະໜັບສະໜູນການລົງທຶນເຮັດທຸລະກິດ, ການຖ່າຍທອດເຕັກໂນໂລຊີ, ການຈົດທະບຽນຊັບສິນ; ການປົກປ້ອງສິດຜົນປະໂຫຍດດ້ານກົດໝາຍຂອງພົນລະເມືອງຫວຽດນາມ ຢູ່ຕ່າງປະເທດ; ສົ່ງເສີມການປົກປັກຮັກສາພາສາຫວຽດ, ເປີດໂຮງຮຽນ ແລະ ຫ້ອງຮຽນວັດທະນະທຳຢູ່ເຂດຊຸມຊົນຊາວຫວຽດນາມ ທີ່ອາໃສຢູ່ຕ່າງປະເທດ; ພ້ອມທັງຈັດກິດຈະກໍາປະຈຳປີເຊັ່ນ: “ລະດູບານໃໝ່ປະເທດຊາດ”, “ການຕັ້ງແຄ້ມພັກແລ້ງຫວຽດນາມ” ແລະ “ການພົບປະແລກປ່ຽນນັກທຸລະກິດເອກະຊົນຫວຽດນາມ” ແລະ ອື່ນໆ.
ສາມາດເວົ້າໄດ້ວ່າ, ນະໂຍບາຍເຫຼົ່ານັ້ນ ບໍ່ພຽງແຕ່ສະແດງໃຫ້ເຫັນເຖິງຄວາມເອົາໃຈໃສ່ອັນແທ້ຈິງຂອງພັກ ແລະ ລັດຖະບານຫວຽດນາມ ຕໍ່ຊາວຫວຽດນາມ ທີ່ອາໃສຢູ່ຕ່າງປະເທດເທົ່ານັ້ນ, ແຕ່ຫາກຍັງໄດ້ຢັ້ງຢືນຊັດເຈນວ່າ: ຊາວຫວຽດນາມທຸກຄົນ ທີ່ອາໃສຢູ່ຕ່າງປະເທດ, ບໍ່ວ່າຈະຢູ່ໃສ, ເຮັດຫຍັງ, ກໍລ້ວນແຕ່ເປັນສ່ວນໜຶ່ງອັນສັກກາລະບູຊາ ຂອງແຜ່ນດິນແມ່ຫວຽດນາມ. ໃນຫຼາຍທົດສະວັດແຫ່ງຄວາມຍາກລຳບາກ ໃນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ແລະ ຈັກກະພັດອາເມຣິກາ ຈົນເຖິງຍຸກສະໄໝແຫ່ງການພັດທະນາ ແລະ ການເຊື່ອມໂຍງເຂົ້າກັບສາກົນ ໃນປັດຈຸບັນ, ຊາວຫວຽດນາມ ທີ່ອາໃສຢູ່ຕ່າງປະເທດ ລ້ວນແຕ່ເປັນບ່ອນອີງທາງດ້ານຈິດໃຈ, ແມ່ນເພື່ອນຮ່ວມເດີນທາງທີ່ຊື່ສັດຕໍ່ປະເທດຊາດ. ຄວາມມີນໍ້າໃຈຜູກພັນສະໜິດແໜ້ນ ແລະ ບັນດາການປະກອບສ່ວນຢ່າງບໍ່ຮູ້ອິດຮູ້ເມື່ອຍຂອງຊາວຫວຽດນາມ ທີ່ອາໃສຢູ່ຕ່າງປະເທດ ເປັນການຢັ້ງຢືນເຖິງກໍາລັງແຮງແຫ່ງການດໍາລົງຊີວິດຂອງມະຫາສາມັກຄີທົ່ວປວງຊົນທັງຊາດຫວຽດນາມ.
ໂດຍ: ຫອມໄຊຍະເດດ
ຄໍາເຫັນ